Youtube: ఇండియన్ యువతపై యూట్యూబ్ ఎండీ ప్రశంసలు.. కంటెంట్ క్రియేషన్‌ భవిష్యత్తు..

AI: భాగ్యనగరంలో జరిగిన హైదరాబాద్‌ పబ్లిక్‌ స్కూల్‌ (HPS) స్టార్ట్‌ఎక్స్‌ సమ్మిట్‌ శతాబ్ది ఉత్సవాల్లో ప్రముఖ సోషల్ మీడియా దిగ్గజం యూట్యూబ్ ఇండియా మేనేజింగ్ డైరెక్టర్ ఇషాన్ ఛటర్జీ పాల్గొన్నారు. ఈ సందర్భంగా యూట్యూబ్ భవిష్యత్ ప్రణాళికలు, భారతీయ యువత గురించి ఆసక్తికర వ్యాఖ్యలు చేశారు.

'నావిగేటింగ్ ది క్రియేటర్ ఎకానమీ' పేరిట నిర్వహించిన కార్యక్రమంలో ఇషాన్ మాట్లాడారు. యూట్యూబ్ వంటి ప్లాట్‌ ఫారమ్స్ ద్వారా యువతలోని సృజనాత్మకత, కళలు బయట ప్రపంచానికి పరిచయం అవుతున్నట్లు చెప్పారు. భాషతో సంబంధం లేకుండా కంటెంట్ క్రియేటర్స్‌కు యూట్యూబ్ ఓ వేదికగా నిలిచిందన్నారు. తద్వారా క్రియేటివ్ కంటెంట్ సృష్టించడం సాధ్యమవుతున్నట్లు అభిప్రాయపడ్డారు.

ఇండియాలో ప్రతిభావంతులైన యువతకు కొదువ లేదన్నారు. మరో 10 ఏళ్లపాటు భారతీయ మార్కెట్ వండర్స్ సృష్టిస్తుందని తెలిపారు. అయితే రాబోయే రెండేళ్లలో కంటెంట్ ల్యాండ్‌ స్కేప్‌ లో తీవ్ర మార్పులు జరుగుతాయని యూట్యూబ్ ఎండీ అంచనా వేశారు. జనరేటివ్ AI వినియోగంతో హైపర్ లోకలైజేషన్ పెరుగుతుందని భావిస్తున్నట్లు చెప్పారు.

ఈ హైదరాబాద్ పబ్లిక్ స్కూల్‌ లోనే ఇషాన్ విద్యనభ్యసించారు. అనంతరం ఢిల్లీలోని స్టీవెన్స్ కాలేజీలో డిగ్రీ, అమెరికాలోని వార్టన్ యూనివర్సిటీ నుంచి MBA పూర్తిచేశారు. గూగుల్ మరియు మెకెన్సీ వంటి కంపెనీలకూ గతంలో ఆయన సేవలందించారు.