యూట్యూబ్‌ను షేక్ చేస్తున్న 'AI Slop' వీడియోలు.. ఏఐ వీడియోల వెనుక ఇంత మనీ ఉందా?

కేవలం ఒక కోతి బొమ్మ.. ఒక హల్క్ లాంటి క్యారెక్టర్.. కొన్ని ఏఐ (AI) విజువల్స్! వీటితో ఏడాదికి రూ. 35 కోట్ల సంపాదన అంటే మీరు నమ్ముతారా? అవును! మీరు విన్నది నిజమే. ప్రస్తుతం సోషల్ మీడియా ప్రపంచంలో 'AI Slop' (తక్కువ నాణ్యతతో భారీగా ఉత్పత్తి చేసే ఏఐ వీడియోలు) ఒక కొత్త ఆదాయ వనరుగా మారింది. ముఖ్యంగా భారతదేశానికి చెందిన "Bandar Apna Dost" అనే ఛానెల్ ఇప్పుడు యూట్యూబ్ ట్రెండింగ్ (youtube trending) లో టాప్ ప్లేస్‌లో ఉండటమే కాకుండా.. కళ్లు చెదిరే ఆదాయాన్ని గడిస్తోంది. అసలు ఈ 'ఏఐ స్లాప్' మాయాజాలం ఏంటి? ఇందులో ఇంత డబ్బుఎలా వస్తోంది? పూర్తి వివరాలు మీకోసం..

అసోంకు చెందిన సురజిత్ కర్మాకర్ 2020లో ఈ ఛానెల్‌ను ప్రారంభించారు.గత కొన్ని నెలలుగానే ఇది విపరీతమైన క్రేజ్ సంపాదించుకుంది. ఇందులో ఒక కోతి, ఒక కండలు తిరిగిన హల్క్ లాంటి క్యారెక్టర్ రాక్షసులతో పోరాడటం వంటి వింత వింత ఏఐ వీడియోలు ఉంటాయి. ఈ ఛానెల్‌కు ఇప్పటివరకు 2.4 బిలియన్లకు పైగా వ్యూస్ వచ్చాయి. కాప్వింగ్ (Kapwing) అనే సంస్థ నివేదిక ప్రకారం.. ఈ ఒక్క ఛానెల్ ఏడాదికి సుమారు 4.25 మిలియన్ డాలర్లు (రూ. 35 కోట్లు) ఆర్జిస్తోందని అంచనా.

'AI Slop' అంటే ఏంటి?

ఆర్టిఫిషియల్ ఇంటెలిజెన్స్ టూల్స్ వాడి, చాలా తక్కువ శ్రమతో, ఒకే రకమైన కథలను పదే పదే సృష్టించడాన్ని 'AI Slop' అంటారు. ఈ వీడియోల్లో నాణ్యత (Quality) తక్కువగా ఉన్నప్పటికీ, చిన్న పిల్లలను, సాధారణ ప్రేక్షకులను ఆకర్షించేలా విజువల్స్ ఉంటాయి. ప్రపంచవ్యాప్తంగా ఇలాంటి ఛానెళ్లు చాలానే ఉన్నాయి. సుమారు 278 ఛానెల్‌లు కలిపి 63 బిలియన్ల వ్యూస్‌ను, 221 మిలియన్ల సబ్‌స్క్రైబర్లను కలిగి ఉన్నాయి. కేవలం 5-6 నెలల వ్యవధిలోనే ఈ వీడియోలు మిలియన్ల కొద్దీ వ్యూస్‌ను రాబడుతూ యూట్యూబ్ ట్రెండింగ్ (youtube trending) లో నిలుస్తున్నాయి.

యూట్యూబ్ నిబంధనలు ఏం చెబుతున్నాయి?

నిజానికి యూట్యూబ్ పాలసీ ప్రకారం తక్కువ నాణ్యత గల ఏఐ కంటెంట్‌కు నేరుగా మానిటైజేషన్ (Ad Revenue) ఇవ్వకూడదు. కానీ, ఈ ఛానెల్‌లు ఇతర మార్గాల్లో డబ్బు సంపాదిస్తున్నాయి..

• బ్రాండ్ డీల్స్: భారీగా వ్యూస్ వస్తుండటంతో కంపెనీలు తమ ప్రమోషన్ల కోసం వీటిని వాడుకుంటున్నాయి.
• ఇన్-డైరెక్ట్ రెవెన్యూ: ఇతర ప్లాట్‌ఫారమ్‌లకు ట్రాఫిక్ మళ్లించడం ద్వారా ఆదాయం గడిస్తున్నాయి.
• అల్గారిథమ్ సపోర్ట్: యూట్యూబ్ అల్గారిథమ్ నాణ్యత కంటే 'వాచ్ టైమ్' (ప్రజలు ఎంత సేపు చూస్తున్నారు) కే ఎక్కువ ప్రాధాన్యత ఇస్తుండటంతో, కొత్త అకౌంట్‌లకు కూడా ఈ వీడియోలే ఎక్కువగా రికమెండ్ అవుతున్నాయి.

పెరుగుతున్న అసహనం

మరోవైపు, ఇన్‌స్టాగ్రామ్, ఎక్స్ (ట్విట్టర్) వంటి సోషల్ మీడియా వేదికల్లో ఇలాంటి నాసిరకం ఏఐ పోస్టులు పెరిగిపోవడంపై యూజర్లు అసహనం వ్యక్తం చేస్తున్నారు. దీంతో యూట్యూబ్ ఇటీవల ఫేక్ ఏఐ మూవీ ట్రైలర్లను అప్‌లోడ్ చేస్తున్న రెండు పెద్ద ఛానెల్‌లను బ్లాక్ చేసింది. గూగుల్ తన 'Veo 3' వంటి ఏఐ టూల్స్‌ను షార్ట్స్‌లో ప్రవేశపెడుతున్నప్పటికీ.. కంటెంట్ విషయంలో కచ్చితమైన క్వాలిటీ ఉండాలని స్పష్టం చేస్తోంది.

ఇది సరైన ఆదాయ మార్గమేనా?

తక్కువ సమయంలో ఎక్కువ వ్యూస్ సంపాదించడానికి ఈ 'ఏఐ స్లాప్' ట్రెండ్ ఉపయోగపడవచ్చు. కానీ, యూట్యూబ్ తన అల్గారిథమ్‌ను అప్‌డేట్ చేసినా లేదా నిబంధనలు కఠినతరం చేసినా ఇలాంటి ఛానెల్‌లు రాత్రికి రాత్రే కనుమరుగయ్యే ప్రమాదం ఉంది. కాబట్టి దీర్ఘకాలంలో సక్సెస్ అవ్వాలంటే ఏఐని కేవలం ఒక సాధనంగా వాడుకుంటూ ఒరిజినల్ అండ్ క్రియేటివ్ కంటెంట్‌ను అందించడమే మేలని నిపుణులు సూచిస్తున్నారు.