ఏఐ రాకతో యూట్యూబ్ మరో సంచలన నిర్ణయం... యూజర్ అనుభవాన్ని సరికొత్తగా మార్చేలా..

ప్రపంచంలోనే అగ్రగామి వీడియో ప్లాట్‌ఫారమ్ అయిన యూట్యూబ్ (YouTube) తన భవిష్యత్ దిశగా ఒక కీలకమైన వ్యూహాత్మక మలుపు తీసుకుంది. యూట్యూబ్ చేసే ప్రతి పనిలోనూ కృత్రిమ మేధస్సు (AI) కేంద్ర బిందువుగా ఉండబోతోందని CEO నీల్ మోహన్ ప్రకటించారు. ఈ మార్పులో భాగంగా కంపెనీ తన అమెరికా (US)లోని కొంతమంది ఉద్యోగులకు స్వచ్ఛంద నిష్క్రమణ ప్యాకేజీలను (Voluntary Exit Packages) అందించింది. ఇది యూట్యూబ్ దశాబ్దంలో చేసిన అతి పెద్ద పునర్వ్యవస్థీకరణ చర్యగా పరిగణించబడుతోంది.

యూట్యూబ్ తన ఉత్పత్తి విభాగాన్ని పూర్తిగా పునర్నిర్మించబోతోంది. ఈ మార్పులు కంపెనీ AI ఆధారిత కంటెంట్ సృష్టి, వీడియో రికమెండేషన్లు, వినియోగదారు అనుభవం (User Experience)ను మరింత మెరుగుపరచడం లక్ష్యంగా రూపొందించబడ్డాయి. నీల్ మోహన్ ఉద్యోగులకు పంపిన సందేశంలో యూట్యూబ్‌లో AI అనేది మా తదుపరి పెద్ద అడుగ అని స్పష్టం చేశారు. యూట్యూబ్ ప్రతినిధి కూడా CNBCతో మాట్లాడుతూ.. మేము భవిష్యత్తులో AIని ప్రతి స్థాయిలో ఉపయోగించి యూజర్ అనుభవాన్ని మార్చాలని చూస్తున్నాం అని తెలిపారు.

ఈ చర్య యూట్యూబ్‌ మాతృ సంస్థ అయిన గూగుల్ (Google) దిశను ప్రతిబింబిస్తోంది. గూగుల్ CEO సుందర్ పిచాయ్ ఇప్పటికే అన్ని ఉత్పత్తుల్లో AIను కేంద్రంగా ఉంచి వ్యూహాత్మక మార్పులు ప్రారంభించారు. ఉద్యోగులు మరింత వేగంగా, సమర్థవంతంగా పనిచేయడానికి AI టూల్స్ వినియోగాన్ని ప్రోత్సహిస్తున్నారు.

యూట్యూబ్‌ ప్రొడక్ట్ విభాగం ఇప్పుడు మూడు ప్రధాన విభాగాలుగా విభజించబడుతుంది. అవేంటంటే.. Viewer Products, Creator & Community Products, Subscription Products ఈ మూడు విభాగాలు నేరుగా CEO నీల్ మోహన్‌కి నివేదిస్తాయి. ప్రతి సమూహం యూట్యూబ్‌ ఎకోసిస్టమ్‌లోని విభిన్న భాగాలను పర్యవేక్షిస్తుంది, తద్వారా నిర్ణయాలు వేగంగా తీసుకోవడం, పెట్టుబడులను సమర్థవంతంగా వినియోగించడం సులభం అవుతుంది.

జోహన్నా వూలిచ్ వ్యూయర్ ప్రొడక్ట్స్ విభాగానికి నాయకత్వం వహిస్తారు. ఈ విభాగం ప్రధానంగా యూట్యూబ్ యాప్, సెర్చ్ & డిస్కవరీ, యూట్యూబ్ కిడ్స్, లెర్నింగ్, లివింగ్ రూమ్ (టీవీ అనుభవం) ట్రస్ట్ & సేఫ్టీ విభాగాలను నిర్వహిస్తుంది. మోహన్ ప్రకారం ఈ బృందం లక్ష్యం టీవీలలో యూట్యూబ్ ఉనికిని పెంపొందించడం, అలాగే వినియోగదారుల భద్రత, బాధ్యత పట్ల నిబద్ధతను మరింత బలోపేతం చేయడం.

క్రిస్టియన్ ఓస్ట్లియన్ నాయకత్వంలోని సబ్‌స్క్రిప్షన్ బృందం YouTube Music, YouTube Premium, YouTube TV, Primetime Channels, Podcasts, Commerce విభాగాలను పర్యవేక్షిస్తుంది.
ప్రస్తుతం యూట్యూబ్ ప్రీమియం, యూట్యూబ్ టీవీ సేవలకు కలిపి 125 మిలియన్లకు పైగా చెల్లింపు వినియోగదారులు ఉన్నారు. సబ్‌స్క్రిప్షన్‌లు యూట్యూబ్‌కి వేగంగా పెరుగుతున్న ఆదాయ వనరులలో ఒకటిగా నిలుస్తున్నాయి.

నీల్ మోహన్ స్పష్టం చేసినట్లు, ఎవరినీ నేరుగా తొలగించడం లేదు. అయితే, ఈ స్వచ్ఛంద కొనుగోలు ఆఫర్లు (Voluntary Buyouts) యూట్యూబ్ తన బృందాలను సరళీకృతం చేయడం, AI ఆధారిత ఆవిష్కరణలకు అనుగుణంగా మార్పులు చేసుకోవడం కోసం ఒక ముందడుగుగా చెప్పవచ్చు.