Youtube: యూట్యూబ్‍లో ఆ వీడియోలు చూడాలంటే డబ్బులు కట్టాల్సిందేనా..!

యూట్యూబ్ పరిచయం అక్కర్లేని పదం. స్మార్ట్ ఫోన్ ఉంటే చాలు యూట్యూబ్ లో చాలా వీడియోలు చూడొచ్చు. వీడియోలు చూడడమే కాదు.. యూట్యూబ్ నుంచి డబ్బులు కూడా సంపాదించవచ్చు. అందుకే జీ మెయిల్ ఉన్న దాదాపు అందరు యూట్యూబ్ ఛానల్ పెట్టుకున్నారు. అయితే త్వరలో యూజర్లకు యూట్యూబ్ షాక్ ఇచ్చే అవకాశం ఉంది.

హై క్వాలిటీ వీడియోలు

వినియోగదారులు ఇకపై యూట్యూబ్‌లోని హై క్వాలిటీ వీడియోలు చూడాలంటే డబ్బులు చెల్లించాల్సి రావొచ్చని సమాచారం. యూట్యూబ్‌లో 4K రెజుల్యూషన్‌ వీడియోలను యూజర్లు చూసేందుకు ప్రీమియం సబ్‌స్క్రిప్షన్‌ తప్పనిసరి చేసేందకు యూట్యూబ్ ఆలోచిస్తుంది. ప్రసుత్తం యూట్యూబ్‌లో యాడ్స్‌ లేకుండా వీడియోలు చూసేందుకు ప్రీమియం సబ్‌స్క్రిప్షన్‌ చేసుకోవాలి.

ప్రీమియం సబ్‌స్క్రిప్షన్‌

యూట్యూబ్ ఇందుకోసం నెలకు రూ.129, మూడు నెలలకు రూ. 399, సంవత్సరానికి రూ.1290 వసూలు చేస్తుంది. ప్రీమియం సబ్‌స్క్రిప్షన్‌ లాగా 4k వీడియోలు చూడాలంటే కూడా ప్రీమియం తప్పనిసరి చేయాలని ఆ సంస్థ భావిస్తున్నట్లు తెలుస్తోంది. అయితే దీనిపై ఎలాంటి ప్రకటన అధికారికంగా చేయకపోయినా.. దీనిపై చర్చ జరుగుతోంది.

నోటిఫికేషన్స్

4కే వీడియోలు చూడాలంటే యూట్యూబ్ ప్రీమియం సబ్‌స్క్రైబ్ చేసుకోవాలని తమకు నోటిఫికేషన్స్ వస్తున్నట్టు కొందరు వినియోగదారులు రెడిట్ ప్లాట్‌ఫాంలో పేర్కొన్నారు. ఇందుకు సంబంధించి ఫొటోలు కూడా పెట్టారు.