WTO: మూడేళ్ల తర్వాత ఇండియాను దోషిగా తేల్చిన WTO.. ఈ వాణిజ్య ఒప్పందాలు ఉల్లంఘించిందని తీర్పు

WTO: కమ్యూనికేషన్ మరియు ఇన్ఫర్మేషన్ టెక్నాలజీకి సంబంధించిన కొన్ని ఉత్పత్తులపై సుంకాలు విధించడం ద్వారా భారతదేశం పలు ఒప్పందాలను ఉల్లంఘించిందని ప్రపంచ వాణిజ్య సంస్థ (WTO) వివాదాల ప్యానెల్ తీర్పునిచ్చింది. పరిస్థితిని సరిదిద్దాలని ఇండియాకు సూచించింది. ఈ మేరకు 146 పేజీల పొడవైన తీర్పును వెలువరించింది.

అంతర్జాతీయ స్థాయిలో అంగీకరించిన దానికంటే ఈ విభాగం ఉత్పత్తులపై భారత్ ఎక్కువగా సుంకాలు విధించిందని ఆరోపిస్తూ.. 2019లో యూరోపియన్ యూనియన్ WTOను ఆశ్రయించింది. ఈ వివాదం తలెత్తడంతో తైవాన్‌, జపాన్ ‌లు కూడా ఇండియాపై కేసు నమోదు చేశాయి. అయితే 1996లో సంతకం చేసిన అంతర్జాతీయ ఒప్పందంలో ఏ అంశాలు చేర్చబడ్డాయి, 1997లో భారతదేశం చేరేటప్పుడు ఏవి ఉన్నాయి అనే దానిపై భిన్నాభిప్రాయాలు ఉన్నాయి.

టెలిఫోన్, టెలివిజన్, రికార్డింగ్ ఉపకరణాలతో సహా కమ్యూనికేషన్లు మరియు సమాచార సాంకేతిక ఉత్పత్తుల గురించి సమస్య మొదలైంది. ప్రపంచ కస్టమ్స్ ఆర్గనైజేషన్ (WCO) చే అభివృద్ధి చేయబడిన హార్మోనైజ్డ్ సిస్టమ్ (HS)ని WTO సభ్య దేశాలు ఫాలో కావాల్సి ఉంటుంది. ఈ దేశాల మధ్య వస్తువుల వర్గీకరణ HS వ్యవస్థతో ముడిపడింది. ఈ సిస్టమ్ కింద కొత్త ఆవిష్కరణలు, ఉత్పత్తులను WCO క్రమం తప్పకుండా అప్ డేట్ చేస్తూ, ఈ డేటాను సభ్య దేశాలకు పంపిస్తుంది.

HS సమాచారాన్ని ఉపయోగించి ప్రతి సభ్య దేశం కొత్త షెడ్యూల్ ప్రకారం ట్రాన్స్ పోజ్ కావాల్సి ఉంటుంది. అయితే తమ సొంత పన్ను విధానాల్లో ఏవైనా మార్పులు చేసినట్లయితే వాటిపై WTO వద్ద చర్చలు జరపాలి. అందుకు అనుగుణంగా ఏళ్ల తరబడి పలుమార్లు ప్రపంచ వాణిజ్య సంస్థతో ఇండియా మాట్లాడింది. కానీ వివిధ కారణాల వల్ల భారత్ సూచించిన మార్పులు చేర్పునకు నోచుకోలేదు. చివరగా ఇప్పడు మన దేశం నిబంధనలు మీరి వ్యవహరిస్తోందని పేర్కొంది.

భారతదేశం కొన్ని వస్తువులపై మొదట అంగీకరించిన దానికంటే ఎక్కువ సుంకాన్ని విధిస్తోందని, ఇవి బేషరతుగా పన్ను రహితంగా ఉండాల్సిన టారిఫ్‌ లు అని ప్యానెల్ భావిస్తోంది. ఒకవేళ ఇండియా ఈ నిర్ణయంపై అప్పీల్ చేస్తే, కొంత కాలం పాటు ఈ విషయాన్ని పక్కకు పెట్టేయవచ్చు. ఎందుకంటే 2019 నుంచి WTO అప్పీళ్ల బెంచ్‌ కు నియామకాలను అమెరికా అడ్డుకుంటూ వస్తోంది. 2024 చివరి నాటికి పూర్తిస్థాయిలో అందుబటాలోకి తీసుకురావడం లక్ష్యంగా పెట్టుకున్నట్లు అగ్రరాజ్యం ఇటీవల వెల్లడించింది.