మహిళా ఉద్యోగులకు వుమెన్స్ డేకి గిఫ్ట్.. ఇక ఏడాదికి మరో 12 లీవ్స్ ఫ్రీగా తీసుకోవచ్చు.. !

భారతదేశపు మల్టీనేషనల్ కంపెనీ లార్సెన్ & టూబ్రో (L&T) పేరు మీరు వినే ఉంటారు. ఈ కంపెనీ ఇండస్ట్రియల్ టెక్నాలజీ, భారీ పరిశ్రమలు, ఇంజనీరింగ్, నిర్మాణం, తయారీ, విద్యుత్, సమాచార సాంకేతికత, సైనిక అండ్ ఆర్థిక సేవలు వంటి రంగాలలో కొనసాగుతుంది. అదేవిధంగా లార్సెన్ & టూబ్రో ఉమెన్స్ డే సందర్భంగా మహిళా ఉద్యోగులకి గుడ్ న్యూస్ అందిస్తూ ఒక కొత్త ఫెసిలిటీ ప్రారంభించింది. కంపెనీలో పనిచేసే మహిళలకు ప్రతి నెలా ఒక రోజు ఋతు సెలవు(period leave) లేదా రుతుక్రమ సెలవు(menstrual leave) ఇవ్వాలని కంపెనీ నిర్ణయించింది.

తయారీ అండ్ ఇంజనీరింగ్ రంగం : టైమ్స్ ఆఫ్ ఇండియా నివేదిక ప్రకారం L&T చైర్మన్ SN సుబ్రమణ్యం మహిళా దినోత్సవానికి ముందు ఈ విషయాన్నీ ప్రకటించారు. ముంబైలోని పోవై ఆఫీసులో 350 మంది మహిళా ఉద్యోగుల సమక్షంలో నిన్న ఈ ప్రకటన చేశారు. ఎల్ అండ్ టిలో మొత్తం 60 వేల మంది ఉద్యోగులు ఉండటం గమనార్హం. వీరిలో దాదాపు 5 వేల మంది మహిళలు. అంటే మొత్తం ఉద్యోగులలో మహిళలు 9% ఉన్నారు.

ఈ సెలవు ఎవరికీ అంటే: తయారీ అండ్ ఇంజనీరింగ్ రంగానికి చెందిన మహిళా ఉద్యోగులకు మాత్రమే ఈ పిరియడ్ లీవ్ సౌకర్యం వర్తిస్తుందని L&T స్పష్టం చేసింది. L&T అన్ని ఇతర వ్యాపారాలు లేదా విభాగాలలో పనిచేసే మహిళలకు ఈ సౌకర్యం లభించదు. ఎందుకంటే కొందరికి వర్క్ ఫ్రొం హోమ్ లేదా సౌకర్యవంతంగా విధులు చేసే సౌకర్యం ఇప్పటికే అందుబాటులో ఉంది. L&T హెడ్ ఆఫీసుల్లో మాత్రం వచ్చి పని చేయడం తప్పనిసరి. ఈ సౌకర్యం తయారీ ఇంకా నిర్మాణ పరిశ్రమలో పూర్తిగా కొత్తది.

ఈ ప్రకటనతో చెలరేగిన గందరగోళం: వారానికి 90 గంటలు పని పై ఎల్ అండ్ టి చైర్మన్ సుబ్రహ్మణ్యన్ ఇంతకుముందు ఒక ప్రకటన చేశారు. ఆదివారం కూడా ఉద్యోగులు పని చేయాలనే కోరికను ఆయన వ్యక్తం చేయగా, అది సాధ్యం కాదని నిరాశ కూడా కొందరు వ్యక్తం చేశారు. ఈ ప్రకటన చాలా వివాదాస్పదమైంది. ఇప్పుడు ఈ కొత్త ప్రకటనతో చర్చ మళ్ళీ మొదలైంది. సంవత్సరానికి 12 రోజుల ఈ రుతుక్రమ సెలవు విధానాన్ని ఎలా అమలు చేస్తారో ఇంకా స్పష్టంగా లేదు. ఎందుకంటే ఈ సెలవులు ఇప్పటికే ఉన్న సెలవులకు అదనంగా సెలవులు అవుతుందా అనేది తేలాల్సి ఉంది. కానీ ఒక నెలలో ఏ రోజున మహిళలు ఈ సెలవు తీసుకోవచ్చో లేదో కూడా నిర్ణయించలేదు.

మహిళా ఉద్యోగులకు ఏడాదికి మరో 12 సెలవులు ఉంటాయా: ఈ సెలవులు ప్రస్తుత సెలవులకి అదనంగా ఉంటే మహిళా ఉద్యోగులకు సంవత్సరంలో 12 రోజులు అదనంగా సెలవులు లభిస్తాయి. దీని వల్ల వారికి ఒత్తిడి లేకుండా రిలీఫ్ కలిగిస్తుంది. ముఖ్యంగా శారీరక అసౌకర్యాన్ని అనుభవించే మహిళలకు. ఈ విధానాన్ని కంపెనీ ఎలా అమలు చేస్తుందో, మహిళా ఉద్యోగులపై దాని ప్రభావం ఏంటో వేచి చూడాలి. ఈ చర్య ఇతర కంపెనీలకు కూడా ఒక ఉదాహరణగా మారవచ్చు. బహుశా ఇతర కంపెనీలు కూడా మహిళా ఉద్యోగులకు ఇలాంటి విధానాలను రూపొందించాలి. మహిళలకు వర్క్ లైఫ్ ఈజీ చేయడానికి ఇది ఒక మంచి అడుగు కావచ్చు.