IT News: సిబ్బందికి విప్రో శుభవార్త.. పెరగనున్న ఉద్యోగుల జీతాలు.. కానీ ఇన్ఫీ మాత్రం..

Wipro News: అంతర్జాతీయ ఆర్థిక మందగమనం కారణంగా విదేశీ క్లయింట్స్ ITపై వెచ్చించే మొత్తాన్ని తగ్గించుకుంటూ వచ్చారు. దీంతో ఇండియన్ IT రంగం కొంతమేర కుదేలైంది. ఇదికాస్తా ఉద్యోగుల వేరియబుల్ పే, హైక్‌ లపై తీవ్ర ప్రభావం చూపించింది. ఇప్పుడిప్పుడే పరిస్థితులు చక్కబడుతున్న వేళ.. ఇండియన్ సాఫ్ట్‌వేర్ దిగ్గజం విప్రో తన సిబ్బందికి గుడ్‌న్యూస్ చెప్పింది.

గత రెండు త్రైమాసికాల్లో సగటున 80 శాతం చొప్పున విప్రో తన ఉద్యోగులకు వేరియబుల్ పే విడుదల చేసింది. కాగా ప్రస్తుత ఆర్థిక సంవత్సరం మూడవ త్రైమాసికంలో ఆ మొత్తాన్ని మరో 5 శాతం పెంచినట్లు నివేదికలు చెబుతున్నాయి. అయితే కంపెనీ ఆదాయంలో మూడింట ఒక వంతు వాటా కలిగి ఉన్న ఫుల్‌స్ట్రైడ్ క్లౌడ్ బిజినెస్ శ్రేణికి సెప్టెంబర్ త్రైమాసికంలో 100 శాతం చెల్లించగా.. డిసెంబర్‌లో 89.74 శాతం ఫిక్స్ చేయనున్నట్లు తెలుస్తోంది.

వేరియబుల్ చెల్లింపు 3 అంశాలకు లింక్ చేయబడుతుందని విప్రో తన ఉద్యోగులకు ఇటీవల పంపించిన మెయిల్‌లో పేర్కొంది. రాబడి (40 శాతం), స్థూల మార్జిన్ (30 శాతం) మరియు మొత్తం కాంట్రాక్ట్ విలువ (30 శాతం) ఆధారంగా పేమెంట్ చేయనున్నట్లు తెలిపింది. మార్జిన్లను పెంచడానికి కంపెనీ తన ఉద్యోగులకు జీతాల పెంపును రెండు నుంచి మూడవ త్రైమాసికానికి వాయిదా వేసింది.

గత త్రైమాసికాలను పరిగణలోనికి తీసుకుంటే విప్రో 22 వేల 205 కోట్ల ఆదాయంతో మార్కెట్ అంచనాలను అధిగమించింది. బలహీనమైన డిమాండ్, సీజనల్ కారణాలు, ఉద్యోగులకు జీతాల పెంపు వంటి గట్టి సవాళ్లు ఉన్నప్పటికీ.. కంపెనీ మార్జిన్‌లు స్థిరంగా ఉన్నాయి. ప్రత్యర్థి IT మేజర్ ఇన్ఫోసిస్ మొదటి రెండు త్రైమాసికాల్లో విప్రో మాదిరిగా 80 శాతం వేరియబుల్ చెల్లించింది. అయితే మూడో త్రైమాసికంలో దాని సగటు వేరియబుల్ పేని 73 శాతానికి తగ్గించడం గమనార్హం.