IT News: విప్రో ఉద్యోగులకు ఒక గుడ్ మరో బ్యాడ్ న్యూస్.. జీతాల పెంపుపై పక్కా క్లారిటీ

IT News: భారతీయ టెక్ దిగ్గజం విప్రో తన ఉద్యోగులకు గట్టి షాక్ ఇచ్చింది. సిబ్బంది ఎప్పుడెప్పుడా అని ఆశగా ఎదురుచూస్తున్న జీతాల పెంపుపై బ్యాడ్ న్యూస్ చెప్పింది. అందులోనూ భారీగా జీతభత్యాలను పొందుతున్న ఉద్యోగులను పొమ్మనకుండా పొగపెట్టినట్లు విశ్లేషణలు వెలువడుతున్నాయి.

పాశ్చాత్య దేశాల క్లయింట్లు ఖర్చులు భారీగా తగ్గించుకోవడంతో IT దిగ్గజాల లాభాలు కూడా అదే స్థాయిలో క్షీణించాయి. ఆర్థిక పరిస్థితిని గాడిలో పెట్టేందుకు ఆయా కంపెనీలు సిబ్బందికి లేఆఫ్స్ ఇచ్చి పొదుపు మంత్రాన్ని పఠిస్తున్నాయి. ఇదే కారణంతో కొందరు ఉద్యోగులకు జీతాలు పెంచేందుకు విప్రో నిరాకరించింది.

సెప్టెంబరు 30 నాటికి 2.44 లక్షల మంది ఉద్యోగులు విప్రోలో పనిచేస్తున్నారు. వారికి జీతాల పెంపును ఇప్పటికే ఆలస్యం చేసింది. కాగా త్వరలోనే కంపెనీ నుంచి శుభవార్త వస్తుందని ఎదురుచూస్తున్న ఉద్యోగులకు.. సంస్థ పంపించిన అంతర్గత మెమో చూసి మతిపోయింది. భారీ మొత్తంలో జీతాలు తీసుకుంటున్న సిబ్బంది బాగా పనిచేసినప్పటికీ.. వారికి ఈసారి మొండిచేయి చూపిస్తున్నట్లు అందులో పేర్కొంది.

తక్కువ పరిహారంతో నెట్టుకొస్తున్న ఉద్యోగులకు జీతాల పెంపు అమలు చేసేందుకు సిద్ధమైంది. 'అధిక పరిహారాన్ని పొందిన అత్యుత్తమ ప్రదర్శనకారులు ఈ సైకిల్‌లో కవర్ చేయబడకపోవచ్చు' అని ఎంటర్‌ప్రైజ్ ఫ్యూచరింగ్ బిజినెస్ లైన్ ప్రెసిడెంట్ నాగేంద్ర బండారు మెయిల్ చేశారు. అయితే కంపెనీ నిర్దేశించిన కేటగిరీలోని ఉద్యోగులకు డిసెంబర్ 1న పెంపుదలతో కూడిన జీతం అందనున్నట్లు సమాచారం.