Wipro News: విప్రో వ్యాపారంపై అజీమ్ ప్రేమ్‌జీ కీలక వ్యాఖ్యలు.. ఏమన్నారంటే..??

Wipro News: విప్రో సంస్థ ఛైర్మన్, ఫౌండర్ అజీమ్ ప్రేమ్‌జీ గురించి ప్రత్యేకంగా చెప్పుకోనక్కర్లేదు. ఆయన సంపాదించిన దానిలో ఎక్కువ భాగం ఛారిటీ చేస్తూ సమాజానికి తిరిగి వాటిని ఇస్తుంటారు. వ్యాపార అనిశ్చితులు కొనసాగుతున్న వేళ తాజాగా ఆయన విప్రో వ్యాపారంపై కీలక కామెంట్స్ చేశారు.

వ్యాపార ప్రతికూలతలు కొనసాగుతున్న తరుణంలో విప్రో వ్యవస్థాపక చైర్మన్ అజీమ్ ప్రేమ్‌జీ తమ కన్జూమర్ కేర్ వ్యాపారంపై ఆశాజనకంగా ఉన్నారు. విప్రో కన్స్యూమర్ కేర్ & లైటింగ్ కింద పనిచేసే సంస్థ FY23లో రూ.10,000 కోట్ల ఆదాయాన్ని సాధించిన సంగతి తెలిసిందే. అలాగే కంపెనీ ఫ్లాగ్‌షిప్ సంతూర్ సోప్ బ్రాండ్ ద్వారా రూ.2,650 కోట్లను ఆర్జించింది. కంపెనీ యార్డ్లీ, ఎన్‌చాన్‌టూర్, చంద్రిక, సాఫ్ట్‌టచ్ పోర్ట్‌ఫోలియోను కలిగి ఉంది. దేశీయంగా, విదేశీ మార్కెట్ల మధ్య ఆదాయాలు సమానంగా ఉండటం గమనించాల్సిన విషయం.

ఎక్కువగా అభివృద్ధి చెందుతున్న మార్కెట్‌లలో విప్రో కన్స్యూమర్ కేర్ & లైటింగ్‌ ఉన్నట్లు ప్రేమ్‌జీ వెల్లడించారు. తలసరి వినియోగం ప్రస్తుతం తక్కువగా ఉన్నందున అభివృద్ధి చెందుతున్న మార్కెట్లలో FMCG బాగా వృద్ధి చెందుతోందని వెల్లడించారు. భారత్, ఇండోనేషియా, వియత్నాం, ఫిలిప్పీన్స్‌లో కంపెనీ వృద్ధి కొనసాగుతోంది. ఈ మార్కెట్లలో ముఖ్యమైన ఎఫ్‌ఎమ్‌సీజీ ప్లేయర్‌గా స్థిరపడటానికి ఉన్న అద్భుతమైన వ్యాపార అవకాశాన్ని విప్రో అందిపుచ్చుకుంది.

విప్రో నుంచి వేరుచేయబడిన కన్స్యూమర్ వ్యాపారం.. హిందుస్థాన్ లీవర్ (రూ. 61,092 కోట్లు), అదానీ విల్మార్, ఐటీసీ (నాన్ సిగరెట్ ఎఫ్‌ఎంసీజీ), నెస్లే ఇండియా, బ్రిటానియా, డాబర్‌లు ముందున్నాయి. 2003లో విప్రో కన్స్యూమర్ రూ.300 కోట్ల ఆదాయాన్ని కలిగి ఉండగా దానిలో సగం సంతూర్ నుంచి వచ్చింది. ప్రస్తుతం కంపెనీ బ్రాండ్ బిల్డింగ్ పై ఎక్కువగా దృష్టి సారించింది.