భారత ఐటీ పరిశ్రమలోనే అత్యధికం, విప్రో సీఈవో వేతనం రూ.80 కోట్లు

విప్రో చీఫ్ ఎగ్జిక్యూటివ్ ఆఫీసర్(CEO) అండ్ మేనేజింగ్ డైరెక్టర్ థియెర్రీ డెలాపోర్ట్స్ గత ఆర్థిక సంవత్సరానికి గాను 10.5 మిలియన్ డాలర్ల వేతనాన్ని అందుకున్నారు. మన కరెన్సీలో ఇది రూ.79.66 కోట్లు. ఇతర ఐటీ సంస్థల సీఈవోల కంటే 2021-22 ఆర్థిక సంవత్సరంలో అత్యధిక వేతనం తీసుకున్నారు డెలాపరేట్. దీంతో భారత ఐటీ సర్వీసెస్ సంస్థల్లో భారీ వేతనం తీసుకున్న వారిగా నిలిచారు.

అమెరికా సెక్యూరిటీస్ అండ్ ఎక్స్చేంజీ కమిషన్‌కు ఇచ్చిన సమాచారం మేరకు గత ఆర్థిక సంవత్సరానికి గాను డెలాపోర్ట్స్ 1.7 మిలియన్ డాలర్లు వేతనం మరియు అలవెన్స్ కింద, 2.5 మిలియన్ డాలర్లు కమిషన్ అండ్ వేరియేబుల్ కింద, 2 మిలియన్ డాలర్లు లాంగ్ టర్మ్ కంపెన్సేషన్ కింద, 4 మిలియన్ డాలర్లు ఇతర కేటగిరీల కింద అందుకున్నారు. అమెరికా, మేజర్ యూరోపియన్ ప్రాంతాల్లో ఉండేవారికి అత్యధిక వేతనాలు వస్తుంటాయి ఆయా ఐటీ కంపెనీలలో.

ఇక, ఇన్ఫోసిస్‌ సీఈవో సలీల్ పరేక్ 10.2 మిలియన్ డాలర్లు, HCL టెక్నాలజీస్ సీఈవో విజయకుమార్ 4.15 మిలియన్ డాలర్లు, టీసీఎస్ సీఈవో రాజేష్ గోపినాథన్ 3.32 మిలియన్ డాలర్లు, టెక్ మహీంద్రా సీఈవో సీపీ గుర్ణానీ 2.83 మిలియన్ డాలర్ల వేతనం అందుకున్నారు.