సముద్రంలోనే మీ నౌకలను తగలబెట్టేస్తాం.. అమెరికాకు స్ట్రాంగ్ వార్నింగ్ ఇచ్చిన IRGC..

అమెరికా- ఇరాన్ దేశాల మధ్య ఉద్రిక్తతలు ప్రమాదకర స్థాయికి చేరుకున్నాయి. ఇరాన్ ఇస్లామిక్ రివల్యూషనరీ గార్డ్ కార్ప్స్ (IRGC) అమెరికాకు అత్యంత కఠినమైన హెచ్చరికలు జారీ చేసింది. వాషింగ్టన్ కనుక ఏదైనా కొత్త సైనిక చర్యకు పూనుకుంటే.. పశ్చిమ ఆసియాలోని తన మిత్ర దేశాల నెట్‌వర్క్ అయిన "రెసిస్టెన్స్ ఫ్రంట్"ను సమీకరించి బహుముఖ దాడులు చేస్తామని హెచ్చరించింది. ముఖ్యంగా అమెరికా నౌకాదళంపై నేరుగా గురిపెడతామని హెచ్చరించింది.

అమెరికా మరోసారి తప్పుగా అంచనా వేస్తే వారి భారీ నౌకలను సముద్రంలోనే తగలబెడతామని ఐఆర్‌జిసి నావికాదళ అధికారులు స్పష్టం చేశారు. కొత్త సామర్థ్యాలతో ఆశ్చర్యకరమైన రీతిలో ప్రతీకారం తీర్చుకుంటామని వారు చేసిన ప్రకటన అంతర్జాతీయంగా ఆందోళన కలిగిస్తోంది. మరోవైపు, అమెరికా అధ్యక్షుడు డొనాల్డ్ ట్రంప్ ఇరాన్ పంపిన తాజా శాంతి ప్రతిపాదనల పట్ల తీవ్ర అసంతృప్తితో ఉన్నారు. ఇరాన్ ప్రస్తుతం ఆర్థికంగా, రాజకీయంగా పతనం అంచున ఉందని, అందుకే హార్ముజ్ జలసంధిని వీలైనంత త్వరగా తెరవాలని తాపత్రయపడుతోందని ట్రంప్ విశ్లేషిస్తున్నారు.

అయితే, అణు సమస్యను పరిష్కరించకుండా చర్చల్లో ముందుకు వెళ్లే ప్రసక్తే లేదని ఆయన తేల్చి చెప్పారు. ఇరాన్ వంటి దేశాలు అణు ఆయుధాలను సంపాదించుకుంటే ప్రపంచం మొత్తం వారి చేతుల్లో బందీగా మారుతుందని ట్రంప్ ఆందోళన వ్యక్తం చేశారు. ఇరాన్ తన ప్రతిపాదనలో కాల్పుల విరమణ, జలసంధిని తెరవడంపై దృష్టి సారించినప్పటికీ, అణు కార్యక్రమం, క్షిపణి అభివృద్ధి వంటి కీలక అంశాలను తర్వాతి దశలకు వాయిదా వేయాలని కోరుతోంది. దీనిని వాషింగ్టన్ అంగీకరించడం లేదు.

ఈ దౌత్యపరమైన ఉత్కంఠ మధ్య ఇరాన్ విదేశాంగ మంత్రి అబ్బాస్ అరాఘ్చి అంతర్జాతీయ మద్దతు కోసం ముమ్మర ప్రయత్నాలు చేస్తున్నారు. ఆయన పాకిస్థాన్‌లో పర్యటించడమే కాకుండా, రష్యాకు వెళ్లి అధ్యక్షుడు పుతిన్‌తో సమావేశమై మద్దతు కూడగట్టారు. అయితే, ప్రాంతీయంగా ఇరాన్‌కు వ్యతిరేకత పెరుగుతోంది.

Also Read

ఇరాన్ యుద్దంపై ట్రంప్‌కు అన్నీ అబద్దాలు చెబుతున్నారు.. అమెరికా డేంజర్ జోన్‌లోకి వెళ్లిందంటున్న జేడీ వాన్స్..

సౌదీ అరేబియా నేతృత్వంలోని గల్ఫ్ సహకార మండలి (జీసీసీ) ఇరాన్ చర్యలను తీవ్రంగా ఖండించింది. హార్ముజ్ జలసంధిని మూసివేయడం చట్టవిరుద్ధమని, నౌకాయాన స్వేచ్ఛను వెంటనే పునరుద్ధరించాలని డిమాండ్ చేసింది. ఖతార్, యూఏఈ, బహ్రెయిన్ వంటి దేశాలు కూడా ఈ విషయంలో గల్ఫ్ దేశాల భద్రతకే ప్రాధాన్యత ఇస్తున్నాయి.

పరిస్థితిని గమనిస్తుంటే, ట్రంప్ ఇరాన్‌పై మరింత కఠినమైన ఆర్థిక దిగ్బంధనానికి సిద్ధమవుతున్నట్లు కనిపిస్తోంది. యుద్ధం లేదా పూర్తిగా వెనక్కి తగ్గడం కంటే, ఇరాన్ ఓడరేవులపై ఆంక్షలు కఠినతరం చేసి, వారి చమురు ఎగుమతులను పూర్తిగా నిలిపివేయడం ద్వారా ఆ దేశాన్ని ఆర్థికంగా దెబ్బతీయాలని ఆయన భావిస్తున్నారు.

తక్కువ ప్రమాదంతో ఎక్కువ ఒత్తిడి తీసుకురావడానికి ఈ 'ఆర్థిక దిగ్బంధనం' సరైన మార్గమని ట్రంప్ తన సహాయకులకు సూచించినట్లు సమాచారం. అటు సైనిక హెచ్చరికలు, ఇటు ఆర్థిక ఆంక్షలు, దౌత్యపరమైన ప్రతిష్టంభనల మధ్య హార్ముజ్ జలసంధి అంశం అంతర్జాతీయ రాజకీయాల్లో ఒక పెద్ద అగ్నిగుండంలా మారింది. ఇరాన్ విదేశాంగ విధానం, అమెరికా పట్టుదల మధ్య ఈ సంక్షోభం ఎటు దారితీస్తుందనేది ఇప్పుడు ప్రపంచవ్యాప్తంగా చర్చనీయాంశమైంది.