విమాన ప్రయాణికులకు షాక్.. ఎయిర్ ఇండియా, ఇండిగో టికెట్లు ఖరీదవుతాయా? ATF పన్ను పెంపు ప్రభావం ఏంటి?

మధ్యప్రాచ్యంలో నెలకొన్న తీవ్ర ఉద్రిక్తతల నేపథ్యంలో దేశీయంగా ఇంధన లభ్యతను నిర్ధారించడానికి, అంతర్జాతీయ మార్కెట్లో పెరిగిన ధరల వల్ల చమురు ఎగుమతిదారులు అక్రమ ప్రయోజనం పొందకుండా నిరోధించడానికి కేంద్ర ప్రభుత్వం కీలక నిర్ణయం తీసుకుంది.

డీజిల్, ఏవియేషన్ టర్బైన్ ఫ్యూయల్ (ATF-విమాన ఇంధనం) ఎగుమతులపై విండ్‌ఫాల్ గెయిన్స్ పన్నును (Windfall Gains Tax) పెంచుతున్నట్లు ఆర్థిక మంత్రిత్వ శాఖ ఒక నోటిఫికేషన్‌లో వెల్లడించింది. అయితే, పెట్రోల్‌పై ఉన్న పన్నును మాత్రం యథాతథంగా కొనసాగించింది. జూన్ 16 నుండి ప్రారంభమయ్యే రాబోయే పక్షం రోజుల (15 రోజులు) కాలానికి ఈ సరికొత్త సుంకాల రేట్లు అమల్లోకి రానున్నాయి.

ఆర్థిక మంత్రిత్వ శాఖ విడుదల చేసిన తాజా నోటిఫికేషన్ ప్రకారం.. ఇంధన ఎగుమతులపై ప్రత్యేక అదనపు ఎక్సైజ్ సుంకం (SAED) సవరించిన వివరాలు ఈ విధంగా ఉన్నాయి. డీజిల్ ఎగుమతిపై ప్రస్తుతం ఉన్న పన్ను రేటు లీటరుకు రూ. 13.5 నుండి రూ. 14కి పెరిగింది. అలాగే విమాన ఇంధనమైన ఏటీఎఫ్ ఎగుమతిపై సుంకం లీటరుకు రూ. 9.5 నుండి ఏకంగా రూ. 12.5కి పెంచబడింది. మరోవైపు, పెట్రోల్ ఎగుమతులపై ఉన్న సుంకం రేటులో ఎలాంటి మార్పులు చేయకుండా, దానిని లీటరుకు రూ. 1.5 గానే యథాతథంగా కొనసాగించారు. విదేశాలకు ఎగుమతి చేసే ఇంధనాలపైనే ఈ అదనపు పన్నుల భారం పడనుండగా, దేశీయ వినియోగం కోసం క్లియర్ చేయబడిన పెట్రోల్, డీజిల్‌పై ప్రస్తుతం ఉన్న సాధారణ సుంకం రేట్లలో ప్రభుత్వం ఎలాంటి మార్పులు చేయలేదు.

ఈ విండ్‌ఫాల్ పన్ను విధింపు వెనుక బలమైన భౌగోళిక రాజకీయ కారణాలు ఉన్నాయి. ఇరాన్‌పై అమెరికా-ఇజ్రాయెల్ జరిపిన దాడులు, దానికి ప్రతిగా జరిగిన భారీ ప్రతీకార చర్యల కారణంగా మధ్యప్రాచ్యంలో యుద్ధ వాతావరణం నెలకొంది. దీనివల్ల ప్రపంచవ్యాప్తంగా ముడి చమురు ధరలు ఒక్కసారిగా పెరిగాయి.

ఈ అంతర్జాతీయ సంక్షోభ పరిస్థితుల నేపథ్యంలో, భారతీయ చమురు కంపెనీలు దేశీయ అవసరాలను పక్కనబెట్టి, విదేశాల్లో లభించే అధిక ధరల కోసం ఇంధనాన్ని భారీగా ఎగుమతి చేయకుండా నిరుత్సాహపరచడమే ఈ పన్ను యొక్క ముఖ్య ఉద్దేశ్యం. అందుకోసమే ప్రభుత్వం మార్చి 26న డీజిల్, ఏటీఎఫ్‌లపై ఎగుమతి సుంకాన్ని విధించి, ప్రతి పక్షం రోజులకు ఒకసారి అంతర్జాతీయ పరిస్థితులకు అనుగుణంగా రేట్లను సవరిస్తూ వస్తోంది. ఆ తర్వాత మే 16న పెట్రోల్‌పై కూడా ఈ ఎగుమతి సుంకాన్ని వర్తింపజేశారు.

విమానయాన రంగంపై ప్రభావం: జెట్ ఇంధన (ATF) ధరల పెంపుతో పాటు ప్రభుత్వం తీసుకున్న తాజా విండ్‌ఫాల్ పన్ను నిర్ణయం, నూతన ధరల స్థిరీకరణ పథకం దేశీయ విమానయాన రంగంపై భిన్నమైన ప్రభావాలను చూపబోతున్నాయి. భౌగోళిక రాజకీయ ఉద్రిక్తతలు లేదా యుద్ధాల వంటి అసాధారణ పరిస్థితుల వల్ల కంపెనీలకు అయాచితంగా వచ్చే అదనపు లాభాలను నియంత్రించడానికి ప్రభుత్వం ప్రామాణిక పన్ను రేటుకు అదనంగా ఈ విండ్‌ఫాల్ పన్నును విధిస్తుంది.

భారాన్ని ప్రయాణికులపైకి నెట్టే అవకాశం: తాజాగా జెట్ ఇంధన ఎగుమతులపై ఈ పన్నును లీటరుకు రూ. 9.5 నుండి రూ. 12.5కు పెంచడం వల్ల ప్రభుత్వానికి ఆదాయం పెరుగుతుంది. అయితే, బజాజ్ ఫిన్‌సర్వ్ విశ్లేషణ ప్రకారం ఇటువంటి పన్నులు కంపెనీల నికర లాభాలను తగ్గించడమే కాకుండా, పరిశోధన, అభివృద్ధి పెట్టుబడులను కూడా పరిమితం చేస్తాయి. అంతిమంగా కంపెనీలు తమ లాభాల మార్జిన్‌లను కాపాడుకోవడానికి ఈ పన్ను భారాన్ని ప్రయాణికులపైకి నెట్టే అవకాశం ఉండటంతో విమాన టిక్కెట్ల ధరలు పెరిగే అవకాశాలు ఎక్కువగా కనిపిస్తున్నాయి.

60 శాతం కేవలం జెట్ ఇంధనానికే : మరోవైపు, విమానయాన సంస్థల మొత్తం నిర్వహణ ఖర్చులలో సుమారు 60 శాతం కేవలం జెట్ ఇంధనానికే కేటాయించాల్సి వస్తుంది. పశ్చిమ ఆసియా సంఘర్షణల కారణంగా ఇప్పటికే వేలాది విమానాలు ఆలస్యం కావడం లేదా రద్దు కావడం వల్ల విమానయాన సంస్థల లాభదాయకత దెబ్బతినగా, తాజాగా ఆయిల్ మార్కెటింగ్ కంపెనీలు జెట్ ఇంధన ధరలను 10 శాతం పైగా పెంచాయి. దీనివల్ల గతంలో ఢిల్లీలో లీటరుకు రూ. 104.927 గా ఉన్న బేస్ ధర ఇప్పుడు రూ. 115కు చేరుకోనుంది.

పోలిక కోసం చూస్తే, ఏప్రిల్ 1 నాటికి కోల్‌కతాలో రూ. 1,09,450, ముంబైలో రూ. 98,247, చెన్నైలో రూ. 1,09,873 చొప్పున ధరలు నమోదయ్యాయి. ఈ పరిస్థితుల్లో ఇంధన ధరల పెంపు ఇండిగో, ఎయిర్ ఇండియా, అకాసా ఎయిర్ వంటి విమానయాన సంస్థలను తీవ్ర ఆర్థిక ఒత్తిడిలోకి నెట్టడంతో, నష్టాలను అరికట్టడానికి కేంద్ర మంత్రివర్గం రూ. 10,000 కోట్ల నిధితో ఒక తాత్కాలిక స్థిరీకరణ చర్యను ఆమోదించింది.

ఈ సరికొత్త ధరల స్థిరీకరణ పథకం కింద, పాల్గొనడానికి ఇష్టపడే భారతీయ విమానయాన సంస్థలకు ఆయిల్ మార్కెటింగ్ కంపెనీలు ముందుగా నిర్ణయించిన స్థిరమైన ధరకే (లీటరుకు రూ. 115 చొప్పున) మూడేళ్లపాటు ఇంధనాన్ని సరఫరా చేస్తాయి. ఇందుకోసం ఓఎంసీలకు ప్రభుత్వం వడ్డీ లేని అడ్వాన్స్‌లను అందిస్తుంది. ఒకవేళ ఈ స్థిరీకరణ పథకాన్ని ఎంచుకోని విమానయాన సంస్థలు ఉంటే, వారు మార్కెట్ ఆధారిత ఛార్జీలను చెల్లించాల్సి ఉంటుంది, ప్రస్తుతం ఈ ఓపెన్ మార్కెట్ ధర లీటరుకు సుమారు రూ. 142గా ఉంది.

ఇది ఎలాంటి సబ్సిడీ కాదని, అంతర్జాతీయంగా ధరలు తగ్గినప్పుడు ఆ వ్యత్యాసపు అదనపు మొత్తాన్ని ఓఎంసీల నుండి వసూలు చేసి పారదర్శకమైన ట్రూ-అప్ యంత్రాంగం ద్వారా మళ్లీ భారత సంఘటిత నిధికి జమ చేస్తారని ప్రభుత్వం స్పష్టం చేసింది. ఈ విధానం వల్ల విమానయాన సంస్థలకు ఇంధన ఖర్చులపై ఒక స్పష్టత లభించి తమ కార్యాచరణను సమర్థవంతంగా ప్రణాళిక చేసుకోవడానికి వీలు కలిగినప్పటికీ, పెరిగిన మూల ధరల కారణంగా అంతిమంగా విమాన ప్రయాణికులపై టిక్కెట్ ఛార్జీల భారం పడటం దాదాపు ఖాయంగా కనిపిస్తోంది.