చెప్పులు ధరించి విమానం ఎక్కాలనే సామాన్యుడి కలను నెరవేర్చాడు..చివరకు స్నేహితుడి చేతిలోనే..

భారతదేశంలోని అతిపెద్ద విమానయాన సంస్థ ఇండిగో మాతృ సంస్థ ఇంటర్‌గ్లోబ్ ఏవియేషన్ సహ వ్యవస్థాపకుడు రాకేష్ గంగ్వాల్, అతని కుటుంబం మంగళవారం ఒక పెద్ద ఒప్పందం కుదుర్చుకున్నారు. ఆయన రూ.11,564 కోట్ల విలువైన షేర్లను విక్రయించారు. ఇటీవలి కాలంలో జరిగిన అతిపెద్ద బ్లాక్ డీల్స్‌లో ఇది ఒకటిగా చెప్పుకోవచ్చు.

ప్రమోటర్లు ఇంటర్‌గ్లోబ్‌లో 2.21 కోట్ల షేర్లను విక్రయించారు. ఇది 5.72% వాటాకు సమానం. గంగ్వాల్ 22.10 లక్షల షేర్లను విక్రయించారు. ఆయన కుటుంబంతో అనుబంధంగా ఉన్న చింకార్పు ఫ్యామిలీ ట్రస్ట్ 1.99 కోట్ల షేర్లను విక్రయించింది. ఈ షేర్ల ధర ఒక్కో షేరుకు రూ.5,175గా నిర్ణయించబడింది. ఇది ముగింపు ధర రూ.5,420 నుండి 4.5% తగ్గింది. ఈ ఒప్పందం తర్వాత గంగ్వాల్, అతని కుటుంబ సభ్యుల వాటా 7.81%కి తగ్గింది.

గంగ్వాల్, అతని కుటుంబం క్రమంగా ఇండిగో కంపెనీ నుండి నిష్క్రమిస్తున్నారు. ఇది కూడా అదే ప్రణాళికలో భాగంగా అని వార్తలు వస్తున్నాయి. గంగ్వాల్ ఈ కంపెనీని 2006 లో రాహుల్ భాటియాతో కలిసి ప్రారంభించారు. మూడు సంవత్సరాల క్రితం రాకేష్ గంగ్వాల్ కుటుంబ వాటా దాదాపు 37% ఉండేది. కానీ వివాదాల మధ్య, గంగ్వాల్ ఫిబ్రవరి 2022లో ఇండిగో బోర్డుకు రాజీనామా చేశారు. తన వాటాను క్రమంగా తగ్గించుకునే ప్రణాళికను ఆయన బహిరంగంగానే ప్రకటించారు.

అప్పటి నుండి ఆ కుటుంబం తన వాటాను నిరంతరం అమ్ముతూ వచ్చింది. ఆగస్టు 2024లో, అతను 5.25% వాటాను రూ.9,549 కోట్లకు విక్రయించాడు. అంతకుముందు 2024లో అతను 5.8% వాటాను రూ.6,786 కోట్లకు విక్రయించాడు. ఆగస్టు 2023లో శోభా గంగ్వాల్ తన 4% వాటాను రూ.2,944 కోట్లకు విక్రయించడం ద్వారా కంపెనీ నుండి పూర్తిగా నిష్క్రమించారు.

ఎలా మొదలైంది? : ఇండిగోను 2006 సంవత్సరంలో రాహుల్ భాటియా, రాకేష్ గంగ్వాల్ ప్రారంభించారు. నేడు ఇది దేశంలోనే అతిపెద్ద విమానయాన సంస్థ. భారత విమానయాన మార్కెట్లో దీని వాటా దాదాపు 65%. భాటియా ఢిల్లీకి చెందినవాడు కాగా, గంగ్వాల్ అమెరికాలో నివసిస్తున్నాడు. గంగ్వాల్ అనేక పెద్ద విమానయాన సంస్థల్లో పనిచేశాడు.

ఈ రంగం గురించి అనుభవం కూడా ఉంది. గంగ్వాల్ కు ఎయిర్ లైన్స్ ప్రారంభించమని ప్రతిపాదించింది కూడా భాటియానే. ఈ విధంగా ఇండిగో మాతృ సంస్థ ఇంటర్‌గ్లోబ్ ఏవియేషన్ 2004లో ప్రారంభించబడింది. ఆ సమయంలో దేశ విమానయాన పరిశ్రమ భారీ నష్టాలను ఎదుర్కొంటోంది. అయినప్పటికీ వారిద్దరూ ఈ రంగంలోకి ప్రవేశించాలని నిర్ణయించుకున్నారు.

అయితే 2004లోనే అతను విమానయాన సంస్థను ప్రారంభించడానికి లైసెన్స్ కూడా పొందాడు. కానీ కంపెనీ దగ్గర విమానం లేకపోవడంతో 2006 వరకు తన సేవలను ప్రారంభించలేకపోయింది. తనకున్న పరిచయాలను ఉపయోగించి, గంగ్వాల్ కంపెనీ కోసం ఎయిర్‌బస్ నుండి 100 విమానాలను రుణంగా పొందగలిగాడు.

చివరకు ఆ కంపెనీ తన విమానాలను ఆగస్టు 4, 2006 నుండి ప్రారంభించింది. ఇండిగో తన ప్రయాణాన్ని ప్రారంభించినప్పుడు దేశంలో విమానయాన పరిశ్రమ క్లిష్ట దశలో ఉంది. అనేక పెద్ద విమానయాన సంస్థలతో పోటీ పడి తనకంటూ ఒక స్థానాన్ని సంపాదించుకోవడం అంత సులభమేమి కాదు. అటువంటి పరిస్థితిలో ఈ రంగంలోకి ప్రవేశించి అంచెలంచెలుగా ఎదిగారు.

కంపెనీ మొదట విమానంలో ప్రయాణించాలనుకునే పెద్దగా డబ్బు లేని వ్యక్తుల నుండి తన కస్టమర్ బేస్‌ను ఏర్పరచుకుంది. దీని కారణంగా ఇండిగో సంస్థ సామాన్యులకు దగ్గరైంది. ఒకానొక దశలో మిగతా విమానయాన సంస్థలు ఇండిగో దెబ్బకు భారీ నష్టాలను మూటగట్టుకునే పరిస్థితి కూడా వచ్చింది. ఇండిగోలోనే ఎక్కువ టిక్కెట్లు అమ్ముడయ్యేవి. దీనికి కారణం సామాన్యులు కూడా ఇండిగో వైపు వెళ్లడంగా చెప్పుకోవచ్చు. కంపెనీ దాదాపుగా ఎటువంటి నష్టాన్ని చవిచూడలేదు.

మధ్య తరగతి కలను నెరవేర్చారు: దేశంలోని ప్రధాన నగరాలను విమానాల ద్వారా అనుసంధానించడానికి ఆ సంస్థ కృషి చేసి, ప్రజలకు తక్కువ ధరకు విమాన ప్రయాణాన్ని అందించాలనే కలను నెరవేర్చుకుంది. చెప్పులు ధరించి విమానం ఎక్కడం అనే కల ఇండిగో ద్వారా మాత్రమే నెరవేరింది. మధ్యతరగతి కుటుంబానికి విమానంలో ప్రయాణించడం ఒక కల మాత్రమే. ఇండిగో తన కలను నెరవేర్చుకుంది. ఈ కంపెనీ ప్రస్తుతం రోజుకు 1,800 విమానాలను నడుపుతోంది. దాదాపు 25,000 మంది ఉద్యోగులను కలిగి ఉంది. కొన్ని సంవత్సరాల క్రితం, ఇండిగో ఎయిర్‌బస్ నుండి 500 విమానాలను ఆర్డర్ చేసింది .

రాకేష్ గంగ్వాల్ బయటకు ఎందుకు వెళుతున్నారు : 2020 సంవత్సరంలో, రాకేష్ గంగ్వాల్, రాహుల్ భాటియా మధ్య వివాదం తలెత్తింది. కంపెనీ ఆర్టికల్స్ ఆఫ్ అసోసియేషన్ నిబంధనలలో మార్పులు చేయాలని గంగ్వాల్ డిమాండ్ చేశారు. అయితే అతని డిమాండ్ నెరవేరలేదు. దీంతో గంగ్వాల్ ఫిబ్రవరి 2022లో కంపెనీ బోర్డుకు రాజీనామా చేశారు. ఇండిగో పాలన ప్రమాణాలు, భాటియా యొక్క మూడవ పార్టీ లావాదేవీలపై ప్రశ్నలు లేవనెత్తుతూ గంగ్వాల్ ఇండిగో బోర్డు నుండి వైదొలిగాడు. వెళుతూ పాన్ దుకాణంలో కూడా కొంత పాలనను అనుసరిస్తారని కీలక వ్యాఖ్యలు చేశారు.ఆ సమయంలో, అతను కంపెనీలో 37 శాతం వాటాను కలిగి ఉన్నాడు. అప్పటి నుండి గంగ్వాల్ కుటుంబం ఇండిగోలో తమ వాటాలో కొంత భాగాన్ని విక్రయించడానికి ప్రయత్నిస్తోంది.