Bangalore News: ఎలక్ట్రానిక్ సిటీ బెంగళూరు ఇప్పటికీ మెట్రో నగరం కాదని తెలుసా? ఎందుకంటే..

Income tax: ఆదాయపు పన్ను చెల్లింపుదారులకు పాత విధానంలో కేంద్రం కొన్ని మినహాయింపులను ఇచ్చింది. వీటిలో ప్రముఖమైనది ఇంటి అద్దె భత్యం (HRA). అయితే ఆయా వ్యక్తులు నివసిస్తున్న నగరాలు, పట్టణాలను బట్టి ఇది మారుతూ ఉంటుంది. కానీ బెంగళూరు పరిస్థితి మాత్రం కొంత భిన్నంగా ఉంటుంది.

కర్ణాటక రాజధాని బెంగళూరుకు మోడ్రన్ గ్లోబల్ మెట్రోపాలిటన్ నగరానికి ఉండాల్సిన అన్ని లక్షణాలు ఉన్నాయి. అభివృద్ధి చెందుతున్న IT మరియు స్టార్టప్ హబ్ గా కొనసాగుతోంది. కాస్మోపాలిటన్ సంస్కృతి, ప్రీమియం మౌలిక సదుపాయాలతో అలరారుతోంది. అయినప్పటికీ విచిత్రంగా ఆదాయపు పన్ను చట్టాల ప్రకారం HRA మినహాయింపు విషయానికి వచ్చేసరికి ఇది నాన్ మెట్రో నగరంగా పరిగణించబడుతోంది.

'అధిక జనాభా సాంద్రత, గణనీయమైన ఆర్థిక కార్యకలాపాలు, వేగవంతమైన జీవనశైలి పరంగా చూస్తే బెంగళూరును మెట్రో సిటీ కాదనలేము. దురదృష్టవశాత్తు ఇప్పటికీ HRA ప్రయోజనాల కోసం నాన్-మెట్రోగా వర్గీకరించబడింది. అంటే ఇక్కడ నివాసించే ఉద్యోగులు తమ బేసిక్ శాలరీలో 40 శాతం మాత్రమే పన్ను మినహాయింపుగా క్లెయిమ్ చేయగలరు. ఇతర 4 మెట్రో నగరాల్లో మాత్రం 50 శాతం క్లెయిమ్ చేసుకునేందుకు అవకాశం ఉంది' అని టాక్స్2విన్ CEO మరియు సహ వ్యవస్థాపకులు అభిషేక్ సోని తెలిపారు.

'1990ల ప్రారంభంలో ఆమోదించబడిన మెట్రో నగరాల జాబితాకు మార్పులు చేయలేదు. తద్వారా లక్షలాది మంది IT, బ్యాంకింగ్, ఇతర నిపుణులు భారీ జీతాలు పొందుతున్నప్పటికీ వారిపై పెనాల్టీ విధించబడుతోంది. కాలం చెల్లిన HRA మెట్రో నగరాల జాబితాను సమకాలీన వాస్తవాలకు అనుగుణంగా మార్చాల్సిన అవసరం ఉంది. ఎందుకంటే గత 3 దశాబ్దాల్లో బెంగళూరు ఎంతో వృద్ధిని కోల్పోయింది' అని షేర్ ఇండియా ఫిన్‌క్యాప్ ఎగ్జిక్యూటివ్ డైరెక్టర్ అగం గుప్తా అభిప్రాయపడ్డారు.