WPI Inflation: పెరిగిన టోకు ద్రవ్యోల్బణం..

ఆహార వస్తువుల ధరల పెరుగుదల ప్రభావం డిసెంబర్ నెలలో టోకు ద్రవ్యోల్బణం రేటుపై కనిపించింది. టోకు ద్రవ్యోల్బణం డిసెంబర్‌లో 0.73 శాతానికి పెరిగింది. ఇది అంతకు ముందు నెలలో అంటే నవంబర్ 2023లో 0.26 శాతంగా ఉంది. ఈ టోకు ద్రవ్యోల్బణం రేటు గత 9 నెలల్లో అత్యధిక స్థాయి కావడం గమనార్హం. ఈ మేరకు వాణిజ్య మంత్రిత్వ శాఖ ఈ రోజు మధ్యాహ్నం టోకు ద్రవ్యోల్బణ గణంకాలు విడుదల చేసింది.

టోకు ద్రవ్యోల్బణం ఆధారిత సూచీ లేదా టోకు ద్రవ్యోల్బణం నవంబర్‌లో 0.26 శాతం ఉండగా, గత ఏడాది డిసెంబర్ 2022లో ఇది 5.02 శాతంగా ఉంది. టోకు ద్రవ్యోల్బణం రేటు సున్నా కంటే ఎక్కువ స్థాయికి పెరగడం ఇది వరుసగా రెండో నెల. టోకు ధరల సూచీ (డబ్ల్యుపిఐ) ఆధారిత ద్రవ్యోల్బణం డిసెంబరులో 0.73 శాతానికి పెరగడానికి ప్రధానంగా ఆహార ధరల పెరుగుదల కారణంగా చెబుతున్నారు.

WPI ద్రవ్యోల్బణం ఏప్రిల్ నుంచి అక్టోబర్ వరకు ప్రతికూల జోన్‌లో ఉంది. ఆహార ద్రవ్యోల్బణం నవంబర్ 2023లో 8.18 శాతం నుంచి డిసెంబర్‌లో 9.38 శాతానికి పెరిగింది. కూరగాయల ద్రవ్యోల్బణం 26.30 శాతంగా ఉంది. పప్పుధాన్యాల ద్రవ్యోల్బణం 19.60 శాతంగా ఉంది. గత వారం విడుదల చేసిన గణాంకాల ప్రకారం డిసెంబర్‌లో రిటైల్ లేదా వినియోగదారు ధరల ఆధారిత ద్రవ్యోల్బణం (CPI) ప్రింట్ 4 నెలల గరిష్ట స్థాయి 5.69 శాతానికి పెరిగింది.

ఇంధనం, తయారు చేసిన ఉత్పత్తులతో సహా అన్ని ప్రధాన సమూహాల సూచిక గత నెల నెలవారీగా క్షీణించింది.