రాజ్ నిడిమోరు ఆస్తులు ఎంతో తెలుసా.. సమంతను పెళ్లాడిన ప్రముఖ దర్శకుడు..? పూర్తి వివరాలు ఇవే..

ప్రముఖ నటి సమంతా రూత్ ప్రభు, ప్రముఖ దర్శకుడు రచయిత రాజ్ నిడిమోరు వివాహం గురించి ఊహాగానాలు సోషల్ మీడియాలో పెద్ద కలకలం రేపుతున్నాయి. ఇద్దరు ప్రముఖులు అధికారికంగా ధృవీకరించకపోయినా డిసెంబర్ 1, సోమవారం ఉదయం ఇషా యోగా సెంటర్‌లోని లింగ భైరవి ఆలయంలో గుప్తంగా వివాహం జరిగినట్లు హిందూస్తాన్ టైమ్స్ వర్గాలు వెల్లడించాయి. నివేదికల ప్రకారం దాదాపు 30 మంది అతిథులు మాత్రమే ఈ వేడుకకు హాజరయ్యారు. సమంతా సంప్రదాయ ఎరుపు చీరలో మెరిసిందని కూడా వార్తలు సూచిస్తున్నాయి. ప్రస్తుతం ఈ సమాచారాన్ని గుడ్ రిటర్న్స్ తెలుగు స్వతంత్రంగా నిర్ధారించలేకపోయినప్పటికీ.. సోషల్ మీడియా అంతటా ఇది పెద్ద చర్చకు దారితీసింది.

సమంతా, 'ది ఫ్యామిలీ మాన్', 'ఫర్జీ' వంటి బ్లాక్‌బస్టర్ వెబ్ సిరీస్‌లకు దర్శకత్వం వహించిన రాజ్ నిడిమోరుతో కొన్ని నెలలుగా డేటింగ్‌లో ఉన్నారని Bollywood, Tollywood మీడియా వర్గాలు తెలిపాయి. Amazon Prime వెబ్ సిరీస్ సిటాడెల్: హన్నీ బన్నీ షూటింగ్ సమయంలో ఇద్దరూ దగ్గరయ్యారని తెలుస్తోంది. రాజ్ నిడిమోరు గతంలో శ్యామలి దే ను వివాహం చేసుకున్నారు. 2022లో ఇద్దరూ విడిపోయారు. సమంతా నటుడు నాగచైతన్యతో 2021లో విడాకులు తీసుకున్నారు.

ఒక సాధారణ కుటుంబంలో పుట్టి, అంతర్జాతీయ స్థాయిలో గుర్తింపు పొందిన దర్శకునిగా ఎదగడం వరకూ రాజ్ నిడిమోరు ప్రయాణం ఎంతో ప్రేరణాత్మకం. ఆయన ఆంధ్రప్రదేశ్‌లోని తిరుపతిలో తెలుగు మాట్లాడే కుటుంబంలో జన్మించారు. చదువులో ప్రతిభ కనబరిచిన రాజ్ SVU ఇంజనీరింగ్ కళాశాలలో కంప్యూటర్ సైన్స్‌లో B.Tech పూర్తి చేశారు. అక్కడే ఆయన భవిష్యత్తు సహదర్సకుడు కృష్ణ డీకెను (కృష్ణ దిక్షిత్) పరిచయం చేసుకున్నారు. ఇద్దరూ తరువాత అమెరికాకు వెళ్లి సాఫ్ట్‌వేర్ ఇంజనీరింగ్ కోర్సులు చదివారు. కొన్నేళ్లు ఐటీ రంగంలో పనిచేసిన తర్వాత, తమ అసలైన అభిరుచి అయిన సినిమారంగానికి అడుగుపెట్టారు. అక్కడే రాజ్ & డీకే పేరిట భాగస్వామ్యాన్ని ఏర్పరచి అత్యుత్తమ కథా చిత్రాలు, వెబ్ సిరీస్‌లు రూపొందించారు.

సినిమా ప్రపంచంలో తొలి అడుగు 'Flavors' అనే ఇండిపెండెంట్ ఫిల్మ్‌తో వేసిన రాజ్ & డీకే, తరువాత '99', 'శోర్ ఇన్ ది సిటీ', 'గో గోవా గాన్', 'హ్యాపీ ఎండింగ్', 'ఎ జెంటిల్‌మన్' వంటి చిత్రాలతో ప్రేక్షకులను ఆకట్టుకున్నారు. అయితే వారి కెరీర్‌లో భారీ మలుపు వచ్చింది 'ది ఫ్యామిలీ మాన్' వెబ్ సిరీస్‌తోనే. ఈ సిరీస్ అద్భుత విజయాన్ని సాధించి, దేశంలోనే కాక అంతర్జాతీయంగా కూడా విశేష ప్రసంశలు అందుకుంది. ప్రస్తుతం 'ది ఫ్యామిలీ మాన్ - సీజన్ 3' నిర్మాణ దశలో ఉంది.

పింక్‌విల్లా, డైలీ జాగ్రన్ నివేదికల ప్రకారం, రాజ్ నిడిమోరు నికర విలువ రూ. 83-85 కోట్లు (సుమారు $10 మిలియన్) గా అంచనా వేయబడింది. దర్శకుడు, నిర్మాత, స్క్రీన్‌రైటర్ పాత్రల ద్వారా ఆయన ఆస్తులు సంపాదించారు. స్ట్రీమింగ్ రైట్స్, థియేట్రికల్ రిలీజ్‌లు, కాపీరైట్ రాయల్టీలు కూడా ముఖ్య ఆదాయ వనరులుగా ఉన్నాయి. వృత్తిపరంగా పెద్ద విజయాలను సాధించిన రాజ్ నిడిమోరుకు, వ్యక్తిగత జీవితంలో కొత్త అధ్యాయం ప్రారంభమైనట్లు వార్తలు చెబుతున్నాయి. ప్రస్తుతం ఇండస్ట్రీ అంతా ఈ వివాహంపై అధికారిక ప్రకటన కోసం వేచి చూస్తోంది. అధికారిక ధృవీకరణ వెలువడితే, ఇది 2024-25లో ఎంటర్‌టైన్‌మెంట్ రంగంలో అత్యంత పెద్ద వార్తగా నిలవడం ఖాయం.