Indian Enonomy: బడ్జెట్ ముందు.. ఆర్థిక వృద్ధి గురించి ప్రభుత్వ అంచనాలు ఇవే..!

Economic Growth: కేంద్ర ఆర్థిక మంత్రి నిర్మలా సీతారామన్ దేశ వార్షిక బడ్జెట్ ప్రవేశపెట్టడానికి కేవలం ఒక్కరోజు మాత్రమే సమయం ఉంది. ఈ క్రమంలో వృద్ధి అంచనాలపై కీలక చర్చ కొనసాగుతోంది.

భారతదేశ ఆర్థిక వ్యవస్థ 2024-25 ఆర్థిక సంవత్సరంలో 7% వృద్ధి చెందుతుందని అంచనా వేయబడింది. అయితే దీనికి ముందు 2023-24లో అంచనా వేసిన 7.3%గా ఉంది. తాజా వృద్ధి అంచనా వివరాలను కేంద్ర ప్రభుత్వం సోమవారం సమీక్షలో ప్రకటించింది. దేశంలో బలమైన డిమాండ్ కనిపిస్తోందని అలాగే ప్రైవేట్ వినియోగం, పెట్టుబడులతో పాటు గడచిన పదేళ్లుగా మోదీ సర్కార్ అమలు చేసిన సంస్కరణల గురించి సమీక్షలో ప్రస్తావించబడింది.

ఈ వేసవిలో దేశం సాధారణ ఎన్నికలకు వెళ్లడానికి ముందు ప్రధాని నరేంద్ర మోడీ ప్రభుత్వం తన చివరి బడ్జెట్‌ను సమర్పించడానికి ముందు తాజా వృద్ధి అంచనాలు వచ్చాయి. ప్రభుత్వం మొదటి ముందస్తు అంచనాల ప్రకారం.. 2022-23లో 7.2%, 2021-22లో 8.7% వృద్ధి, అలాగే ప్రస్తుత ఆర్థిక సంవత్సరంలో భారతదేశ ఆర్థిక వ్యవస్థ 7.3% రేటుతో వేగంగా అభివృద్ధి చెందుతున్న దేశంగా కొనసాగుతోందని గణాంకాలు చెబుతున్నాయి.

ఇదే క్రమంలో రేటింగ్ సంస్థల అంచనాలను పరిశీలిస్తే.. S&P గ్లోబల్ రేటింగ్స్ ప్రకారం భారత్ రానున్న మూడేళ్లలో అత్యంత వేగంగా అభివృద్ధి చెందుతున్న ప్రధాన ఆర్థిక వ్యవస్థగా కొనసాగుతుందని పేర్కొంది. అలాగే 2030 నాటికి జపాన్, జర్మనీలను అధిగమించి ప్రపంచంలో మూడవ అతిపెద్ద ఆర్థిక వ్యవస్థగా అవతరించగలదని అంచనా వేసింది. ఈ క్రమంలోనే బడ్జెట్ కి ముందర భారత స్టాక్ మార్కెట్లు సానుకూలంగా స్పందిస్తున్నాయి. సోమవారం రోజున బెంచ్ మార్క్ సూచీ సెన్సెక్స్ 1240 పాయింట్ల, నిఫ్టీ 385 పాయింట్ల మేర లాభాలపడి బుల్ ర్యాలీకి ఆజ్యం పోశాయి.