బంగారం ధర కుప్పకూలాల్సిన సమయం ఎందుకు మిస్ అయింది.. ఇంత అకస్మాత్తుగా ఎందుకు పెరిగింది.. కారణాలు ఇవే..

బంగారం ధరలు భారీగా పెరిగిన తర్వాత కాస్త విరామం తీసుకున్నాయి. అంతర్జాతీయంగా స్పాట్ బంగారం ధరలు ఔన్స్‌కు 5 వేల డాలర్ల స్థాయికి రాకెట్ వేగంతో చేరుకున్నాయి. భారతదేశంలో 10 గ్రాముల బంగారం ధర గత వారం రూ. 1,50,000ను దాటింది. ఇది కేవలం ప్రపంచ మార్కెట్ల ప్రభావమే కాకుండా, దేశీయ కరెన్సీ పరిస్థితులు కూడా బలంగా ప్రతిబింబిస్తున్నాయని విశ్లేషకులు చెబుతున్నారు. ఈ ఏడాది ప్రారంభం నుంచి ఇప్పటివరకు బంగారం ధర ఇప్పటికే 12 శాతం కంటే ఎక్కువ పెరగడం.. పెట్టుబడిదారుల భావోద్వేగాలు ఎంత వేగంగా సురక్షిత ఆస్తుల వైపు మళ్లాయో స్పష్టంగా చూపిస్తోంది.

ఇటీవల బంగారం ధరల్లో కనిపిస్తున్న ఈ బలమైన ర్యాలీకి ప్రధానంగా భౌగోళిక రాజకీయ ఉద్రిక్తతలు, వాణిజ్య విధానాలపై అనిశ్చితి, అలాగే అమెరికా ఆస్తులపై పెట్టుబడిదారుల విశ్వాసం తగ్గడం వంటి అంశాలు కారణమవుతున్నాయి. ముఖ్యంగా అమెరికా అధ్యక్షుడు డొనాల్డ్ ట్రంప్ గ్రీన్‌ల్యాండ్‌ను కొనుగోలు చేయాలనే అంశాన్ని మళ్లీ తెరపైకి తీసుకురావడం మార్కెట్లలో కలకలం రేపింది. ఈ ప్రయత్నం యూరప్‌తో దౌత్యపరమైన ఘర్షణకు దారి తీసింది. గ్రీన్‌ల్యాండ్ విషయంలో వెనక్కి తగ్గం అన్న ట్రంప్ వ్యాఖ్యలు.. దీనికి తోడు యూరోపియన్ దేశాలపై సుంకాలు విధించే బెదిరింపులు, ప్రపంచ ఆర్థిక వ్యవస్థలో అనిశ్చితిని మరింత పెంచాయి.

ఈ వాణిజ్య సుంకాల బెదిరింపులు అట్లాంటిక్ ఇరువైపులా పెద్ద స్థాయి వాణిజ్య యుద్ధ భయాలను మళ్లీ ప్రబలించాయి. దీని ప్రభావంగా అమెరికా డాలర్‌పై ఒత్తిడి పెరిగింది. ఫలితంగా పెట్టుబడిదారులు ఈక్విటీలు.. కొన్ని సందర్భాల్లో అమెరికా ట్రెజరీల నుంచి కూడా నిధులను ఉపసంహరించుకుని, బంగారం వంటి హార్డ్ ఆస్తుల వైపు మళ్లారు. ఈ పరిణామాల మధ్య Gold ధరలు 4,950 డాలర్లకు పైగా కొత్త రికార్డు స్థాయిలను నమోదు చేశాయి.

ఇదే సమయంలో మధ్యప్రాచ్యంలో, ముఖ్యంగా ఇరాన్‌లో చోటు చేసుకుంటున్న పరిణామాలు మరో పెద్ద అనిశ్చితిగా మారాయి. ప్రభుత్వ వ్యతిరేక నిరసనలు, అమెరికా సైనిక కదలికలు, అలాగే ప్రాంతీయ ఘర్షణ ప్రమాదం పెరగడం వల్ల పెట్టుబడిదారులలో ఆందోళన పెరిగింది. చరిత్రను పరిశీలిస్తే.. ఇరాన్ చుట్టూ ఉద్రిక్తతలు పెరిగిన ప్రతి సందర్భంలోనూ బంగారం వంటి సురక్షిత ఆస్తులపై డిమాండ్ పెరిగింది. ప్రస్తుతం పరిస్థితులు కూడా అదే దిశలో సాగుతున్నాయని మార్కెట్ వర్గాలు భావిస్తున్నాయి.

ఈ భౌగోళిక రాజకీయ షాక్‌లు అమెరికా ఆస్తుల నుంచి పెట్టుబడుల ఉపసంహరణను వేగవంతం చేశాయి. సుంకాల బెదిరింపులు, విధాన సంబంధిత అనిశ్చితి, ఫెడరల్ రిజర్వ్ స్వాతంత్ర్యంపై ఒత్తిళ్లు వంటి అంశాలు కలసి అమెరికాను అమ్మండి అనే భావనను మళ్లీ బలపరిచాయి. ఇటీవలి రోజుల్లో అమెరికా స్టాక్‌లు, బాండ్‌లు, డాలర్ ఒకేసారి ఒత్తిడిని ఎదుర్కొనగా, బంగారు ETFలలో భారీగా పెట్టుబడులు ప్రవేశించాయి.

స్థూల ఆర్థికంగా చూస్తే.. నిజమైన వడ్డీ రేట్లు బంగారం ధర దిశను నిర్ణయించే కీలక అంశంగా మారాయి. ద్రవ్యోల్బణాన్ని పరిగణలోకి తీసుకున్న తర్వాత వడ్డీ రేట్లు తక్కువగా లేదా ప్రతికూలంగా ఉన్నప్పుడు, బంగారం కలిగి ఉండే అవకాశ వ్యయం తగ్గుతుంది. ఈ పరిస్థితి బంగారాన్ని మరింత ఆకర్షణీయంగా మారుస్తుంది. ప్రస్తుతం ప్రపంచవ్యాప్తంగా కేంద్ర బ్యాంకుల విధానాలు, ద్రవ్యోల్బణ ఒత్తిళ్లు నిజమైన దిగుబడులను కుదించుతున్నాయి.

భారతదేశంలో కూడా ఈ అంతర్జాతీయ పరిస్థితులకు తోడు బలహీనమైన రూపాయి బంగారం ధరలను మరింత ఎత్తుకు తీసుకెళ్లింది. Gold ధరలు పెరిగినప్పటికీ, వివాహాల సీజన్ కొనుగోళ్లు, పాత ఆభరణాల మార్పిడి, తేలికపాటి డిజైన్ల వైపు వినియోగదారుల మార్పు వల్ల భౌతిక బంగారం డిమాండ్ నిలకడగా ఉంది. అదే సమయంలో బంగారు ETFల ద్వారా పెట్టుబడి డిమాండ్ గణనీయంగా పెరుగుతోంది.

డిస్క్లైమర్: ఈ వెబ్‌సైట్‌లోని అభిప్రాయాలు, సూచనలు పూర్తిగా వ్యక్తిగత విశ్లేషకులు లేదా ఇతర సంస్థలవి మాత్రమే. ఇవి Goodreturns.in లేదా Greynium Information Technologies Private Limited అధికారిక అభిప్రాయాలు కాదని గమనించగలరు.మేము ఈ విషయం యొక్క ఖచ్చితత్వం, సమగ్రత లేదా విశ్వసనీయతపై ఎటువంటి హామీ ఇవ్వడం కాని, అనుమతించడం కాని బాధ్యత వహించడం జరగదు. మేము ఎలాంటి పెట్టుబడి సలహా ఇవ్వము. అలాగే ఎటువంటి సెక్యూరిటీ కొనుగోలు లేదా అమ్మకాలు ప్రోత్సహించము. ఈ వెబ్‌సైట్‌లోని కథనం పూర్తిగా సమాచారం, విద్యా ప్రయోజనాల కోసమే అందించబడుతుంది. మీరు ఏదైనా పెట్టుబడి నిర్ణయం తీసుకునే ముందు, లైసెన్స్ పొందిన ఆర్థిక సలహాదారుల సహాయం తీసుకోండి. ఈ కథనాన్ని కేవలం సమాచారంగా మాత్రమే పరిగణించండి.