మాకు విదేశీ నిపుణులు చాలా అవసరం..మా వాళ్లకు అంత టాలెంట్ లేదు.. మళ్ళీ యూటర్న్ తీసుకున్న ట్రంప్

అమెరికా అధ్యక్షుడు డొనాల్డ్ ట్రంప్ తాజాగా H-1B వీసా పథకంపై యూటర్న్ తీసుకున్నారు. ఇప్పటివరకు కఠిన చర్యలతో వ్యవహరించిన ట్రంప్, ఇప్పుడు ఆ పథకాన్ని సమర్థిస్తూ, అమెరికా కొన్ని రంగాల్లో విదేశీ ప్రతిభ అవసరమని స్పష్టం చేశారు. ఫాక్స్ న్యూస్ జర్నలిస్టు లారా ఇంగ్రహామ్‌తో జరిగిన ప్రత్యేక ఇంటర్వ్యూలో ట్రంప్ మాట్లాడుతూ..అమెరికా అన్ని రంగాల్లో తగినంత ప్రతిభ కలిగి లేదు. కొన్ని ముఖ్యమైన రంగాల్లో మేధస్సు, నైపుణ్యం అవసరం ఉంది. ఆ ప్రతిభను ప్రపంచం నలుమూలల నుండి తీసుకురావాలని Trump అన్నారు.

మనం దేశంలోకి ప్రతిభను కూడా తీసుకురావాలి. కొన్ని రంగాల్లో మన దేశంలో సరిపడ నైపుణ్యులు లేరు. కాబట్టి ప్రపంచ ప్రతిభను ఆకర్షించడం తప్పనిసరి అని తెలిపారు. ఇది ట్రంప్‌ ఇప్పటి వరకు H-1B వీసా విధానంపై తీసుకున్న కఠిన చర్యలకు పూర్తి వ్యతిరేకంగా ఉంది. గతంలో ఆయన పరిపాలన H-1B వీసాల మంజూరులో కఠినతను పెంచి, అనేక టెక్ కంపెనీలకు, విదేశీ నిపుణులకు అవరోధాలు సృష్టించింది. ముఖ్యంగా భారతీయ ఐటీ నిపుణులు, వైద్యులు, టెక్ రంగంలో పనిచేసే వేలాది మంది H-1B వీసా హోల్డర్లు ఆ నియంత్రణల వల్ల ఇబ్బందులు ఎదుర్కొన్నారు.

అయితే ఇప్పుడు ట్రంప్‌ దృక్కోణం మారిందని కనిపిస్తోంది. అమెరికాలో తయారీ, రక్షణ రంగాలలో తగిన శిక్షణ లేకుండా స్థానిక కార్మికులను నియమించడం కష్టం అని ఆయన అన్నారు. దీర్ఘకాలిక నిరుద్యోగులలో చాలా మంది సాంకేతిక రంగంలో పని చేయడానికి సరైన నైపుణ్యం కలిగి లేరని, కాబట్టి విదేశీ నిపుణులను ఆకర్షించడం అమెరికా అభివృద్ధికి అవసరమని పేర్కొన్నారు.

ఇదే సమయంలో ట్రంప్ పరిపాలన ఈ సంవత్సరం సెప్టెంబర్‌లో H-1B వీసా సంస్కరణల దిశగా ఒక ముఖ్యమైన అడుగు వేసింది.కొంతమంది నాన్-ఇమ్మిగ్రెంట్ కార్మికుల ప్రవేశంపై పరిమితి అనే శీర్షికతో ఒక ప్రకటనను జారీ చేసింది. దాని ప్రకారం సెప్టెంబర్ 21, 2025 తర్వాత దాఖలు చేయబడిన కొత్త H-1B పిటిషన్లకు అదనంగా 100,000 అమెరికన్ డాలర్లు (సుమారు ₹83 లక్షలు) రుసుము విధించబడింది. అయితే అమెరికా స్టేట్ డిపార్ట్‌మెంట్ తరువాత స్పష్టతనిచ్చింది. ఈ అదనపు ఫీజు కొత్త పిటిషన్లకు, 2026 లాటరీలో ప్రవేశించే దరఖాస్తులకు మాత్రమే వర్తిస్తుందని, ఇప్పటికే వీసాలు కలిగినవారికి లేదా సెప్టెంబర్ 21కి ముందు దాఖలు చేసిన పిటిషన్లకు ఇది వర్తించదని తెలిపింది.

అమెరికా టెక్ రంగంలో H-1B వీసా హోల్డర్లలో భారతీయులు అతిపెద్ద భాగం ఉన్నారు. కాబట్టి ట్రంప్ తాజా వ్యాఖ్యలు భారతీయ ఐటీ నిపుణులకు ఒక ఊరటనిచ్చే సంకేతంగా భావించబడుతున్నాయి. అమెరికా మార్కెట్‌లో నైపుణ్య లోటును నింపేందుకు భారతీయ ప్రతిభ కీలకమని ట్రంప్ పరోక్షంగా అంగీకరించినట్లు ఈ వ్యాఖ్యలు సూచిస్తున్నాయి. గతంలో H-1B వీసాలపై కఠిన విధానాలను అమలు చేసిన ట్రంప్ ఇప్పుడు తన వైఖరిని సడలించడం అమెరికా టెక్ పరిశ్రమకు, విదేశీ నిపుణులకు శుభపరిణామంగా పరిగణించవచ్చు. ఈ మార్పు అమెరికా ఆర్థిక వ్యవస్థలో కొత్త సమతౌల్యాన్ని తీసుకురావడమే కాక, ప్రపంచవ్యాప్తంగా నైపుణ్య వలసదారులకు కొత్త అవకాశాలను తెరుస్తుందని నిపుణులు వ్యాఖ్యానిస్తున్నారు.