Reliance News: రిలయన్స్‌తో జతకట్టిన అమెరికన్ దిగ్గజం.. ఇవాళో, రేపో అఫీషియల్ అనౌన్స్‌మెంట్‌

Disney News: ఎంతో కాలంగా మార్కెట్లో వినబడుతున్న ఓ వార్తకు సంబంధించి తాజాగా అప్‌డేట్ వచ్చింది. మీడియా రంగంలో రిలయన్స్‌తో ఓ ప్రఖ్యాత కంపెనీ జతకట్టేందుకు ముందడుగు పడింది. ఈ మేరకు అతి త్వరలో ఇన్వెస్టర్లకు శుభవార్త వినేందుకు ఆ సంస్థలు రెడీ అవుతున్నాయి.

వాల్ట్ డిస్నీ కో. మరియు రిలయన్స్ ఇండస్ట్రీస్ లిమిటెడ్ భారత్‌లో తమ మీడియా కార్యకలాపాలను విలీనం చేయడానికి ఓ ఒప్పందాన్ని కుదుర్చుకున్నట్లు వార్తలు వస్తున్నాయి. దేశంలోని భారీ మార్కెట్‌పై యుఎస్ ఎంటర్‌టైన్‌మెంట్ దిగ్గజం కన్నేసింది. దీంతో ఇండియాలోని అతిపెద్ద కంపెనీతో కలిసి మీడియా రంగంలో వండర్స్ సృష్టించేందుకు ప్లాన్ చేసింది.

ఈ జాయింట్ వెంచర్‌లో రిలయన్స్ మీడియా యూనిట్ సహా దాని అనుబంధ సంస్థలు 61 శాతం వాటా కలిగి ఉంటాయని భావిస్తున్నారు. మిగిలిన మొత్తాన్ని డిస్నీ హోల్డ్ చేయనున్నట్లు సమాచారం. ఈ వారం ప్రారంభంలో ఇరు కంపెనీలు పూర్తి వివరాలు ప్రకటించే అవకాశం ఉంది. ఇందుకు సంబంధించిన ప్రశ్నలపై స్పందించేందుకు రెండు సంస్థలూ నిరాకరించాయి.

ఇదే సమయంలో టాటా ప్లే లిమిటెడ్‌లో డిస్నీ మైనారిటీ వాటాను కలిగి ఉన్నట్లు మీడియా నివేదికలు చెబుతున్నాయి. దీనిని రిలయన్స్ కొనుగోలు చేయాలని భావిస్తున్నట్లు సమాచారం. డిస్నీ తన సబ్‌స్క్రైబర్‌లను నిలబెట్టుకోవడం సహా మీడియా ఆస్తులను భద్రపరచుకోవడం వంటి సవాళ్లను అధిగమించేందుకు భారత్‌లో అడుగుపెట్టేందుకు తహతహలాడుతోంది.