Vodafone Idea: రివ్వున ఎగసిన ఐడియా స్టాక్.. గుడ్‌న్యూస్ ఏమిటంటే..

Vodafone Idea: దేశీయ టెలికాం రంగంలో ప్రస్తుతం అతిపెద్ద పోటీ నడుస్తోంది. ఇక్కడ కేవలం టెక్నాలజీ, తగినన్ని నిధులు కలిగినవారిదే పై చేయిగా ఉంది. అయితే ఈ పోటీలో నలిగిపోయిన వొడాఫోన్ ఐడియా నుంచి కీలక ప్రకటన వచ్చింది.

తీవ్రమైన పోటీతో పెరుగుతున్న నష్టాలతో పాటు అప్పుల ఊబిలో కూరుకుపోయిన టెలికాం కంపెనీ వొడాఫోన్ ఐడియాకు పెద్ద శుభవార్త ఉంది. కంపెనీ ప్రస్తుతం తన అవసరాల కోసం రూ.14,000 కోట్ల నిధులను పొందనుంది. ఈ మొత్తంలో సగం కంపెనీకి ఇప్పటికే ఉన్న ఇద్దరు ప్రమోటర్లు పెట్టుబడి పెట్టవచ్చని తెలుస్తోంది. కంపెనీ ప్రమోటర్లలో ఇండియాకు చెందిన ఆదిత్య బిర్లా గ్రూప్, UK ఆధారిత వోడాఫోన్ ఉన్నాయి.

అత్యంత ఒత్తిడితో కూడిన పరిస్థితుల్లో వ్యాపారం చేస్తున్నప్పటికీ కంపెనీ ప్రస్తుతం దేశంలో మూడవ అతిపెద్ద టెలికాం ఆపరేటర్ గా కొనసాగుతోంది. అయితే భారీ అప్పుల కారణంగా ఆర్థిక పరిస్థితి అధ్వాన్నంగా మారిపోయింది. ఈ క్రమంలో ఇప్పటి వరకు 5జీ సేవలను సైతం దేశంలో ప్రారంభించలేకపోయింది. సమాచారం ప్రకారం కంపెనీ ప్రభుత్వానికి ఒక ప్రణాళికను సమర్పించిందని తెలుస్తోంది. దీని ప్రకారం ప్రమోటర్లు ఇద్దరూ త్వరలో కంపెనీలో రూ.2,000 కోట్లు చొప్పున పెట్టుబడి పెట్టనున్నారని వెల్లడైంది. ఈ వార్తల నేపథ్యంలో స్టాక్ ఏకంగా 10 శాతం మేర లాభపడింది.

సెప్టెంబర్ 2021లో ప్రభుత్వం టెలికాం పునరుద్ధరణ ప్యాకేజీతో ముందుకు వచ్చింది. అప్పటి నుంచి ప్రమోటర్లు వోడాఫోన్ ఐడియాలో రూ.5,000 కోట్ల తాజా ఈక్విటీని పెట్టుబడి పెట్టారు. అలాగే వారు కంపెనీకి రూ.7,000 కోట్లను సమీకరించడంలో సహాయం చేస్తారు. కంపెనీలో ఆదిత్య బిర్లా గ్రూప్‌కు కంపెనీలో 18 శాతం వాటా ఉంది. అలాగే కంపెనీ మెుత్తం బ్యాంక్ రుణాలు రూ.40,000 కోట్ల నుంచి రూ.12,000 కోట్లకు తగ్గాయి. అంచనాల ప్రకారం 2026 నాటికి కంపెనీ రూ.25,000 కోట్ల నగదు కొరతను ఎదుర్కొంటుందని తెలుస్తోంది. ఫిబ్రవరిలో కేంద్ర ప్రభుత్వం కంపెనీపై తన రూ.16,133 కోట్ల బకాయిలను ఈక్విటీగా మార్చింది.