Vizag: ఏపీకి గూగుల్ రాకతో ముప్పు తప్పదా? AI సర్వర్ల కోసం మన భూగర్భ జలాలు ఖాళీ అవుతాయా?

ఆంధ్రప్రదేశ్ విశాఖ తీరం ఇప్పుడు ప్రపంచ టెక్నాలజీ పటంలో హాట్ టాపిక్‌గా మారింది. గూగుల్ సుమారు 15 బిలియన్ డాలర్ల భారీ పెట్టుబడితో ఇక్కడ తన AI హబ్‌ను ఏర్పాటు చేస్తుండటం దేశవ్యాప్తంగా చర్చనీయాంశమైంది. కొత్త సబ్-సీ కేబుల్స్ రాకతో భారత్ గ్లోబల్ సౌత్ దేశాలకు AI రూటింగ్ హబ్‌ గా మారుతుందని అంతా సంబరపడుతున్నారు. కానీ, ఈ డిజిటల్ విజయం వెనుక ఉన్న భౌతిక , పర్యావరణ భారాల గురించి ఎవరూ మాట్లాడటం లేదు. ప్రముఖ టెక్ విశ్లేషకులు శరవణన్ జైచంద్రన్ ఈ ప్రాజెక్ట్ వల్ల తలెత్తబోయే ప్రమాదాల గురించి గట్టిగా హెచ్చరిస్తున్నారు.

నీటి సంక్షోభం: సర్వర్ల కోసం మన దాహం?

AI సర్వర్లు నిరంతరం పని చేస్తూ విపరీతమైన వేడిని విడుదల చేస్తాయి. వీటిని చల్లబరచడానికి 'ఎవాపరేటివ్ కూలింగ్' పద్ధతిని వాడుతుంటారు. ఒక సాధారణ హైపర్-స్కేల్ డేటా సెంటర్ రోజుకు లక్షలాది లీటర్ల స్వచ్ఛమైన నీటిని వినియోగిస్తుంది. మన మున్సిపాలిటీలు ఇప్పటికే తాగునీటి ఎద్దడితో సతమతమవుతుంటే, సిలికాన్ వ్యాలీ సర్వర్లను చల్లబరచడానికి మన విలువైన భూగర్భ జలాలను ధారపోయడం ఎంతవరకు సమంజసం? కేవలం టెక్నాలజీ కోసం ప్రకృతి వనరులను పణంగా పెట్టడం ప్రమాదకరంగా మారవచ్చు.

విద్యుత్ వినియోగం: 10 రెట్లు ఎక్కువ భారం

సాధారణ వెబ్ సెర్చ్‌తో పోలిస్తే, ఒక జనరేటివ్ AI క్వెరీ సుమారు 10 రెట్లు ఎక్కువ విద్యుత్ తీసుకుంటుంది. కంపెనీలు తాము 100 శాతం పునరుత్పాదక ఇంధనాన్ని (Renewable Energy) వాడుతామని చెబుతున్నప్పటికీ, అది పూర్తి నిజం కాదు. సోలార్ పవర్ పగలు మాత్రమే అందుబాటులో ఉంటుంది. కానీ AI సర్వర్లు రాత్రి పగలు 24 గంటలు నడుస్తూనే ఉంటాయి. అర్థరాత్రి వేళ ఈ సర్వర్లు పనిచేయడానికి మన గ్రిడ్ లోని బొగ్గు ఆధారిత విద్యుత్ పైనే ఆధారపడాలి. దీనివల్ల కార్బన్ ఉద్గారాలు పెరిగి పర్యావరణానికి మరింత నష్టం వాటిల్లుతుంది.

సముద్రపు నీటి శుద్ధి - ఒక వినాశకర వలయం

సర్వర్లను చల్లబరచడానికి సముద్రపు నీటిని శుద్ధి (Desalination) చేసి వాడుతామని కంపెనీలు చెబుతున్నాయి. అయితే ఈ నీటిని శుద్ధి చేయడానికి మళ్ళీ భారీ మొత్తంలో విద్యుత్ అవసరం. అంటే, విద్యుత్ కోసం పర్యావరణాన్ని దెబ్బతీస్తూ, మళ్ళీ అదే పర్యావరణం పేరుతో నీటిని శుద్ధి చేయడం ఒక అంతులేని వినాశకర వలయంగా మారుతుంది. మనం కేవలం వేగవంతమైన ఇంటర్నెట్ కోసం పశ్చిమ దేశాల థర్మల్ ఫుట్‌ప్రింట్‌ను దిగుమతి చేసుకుంటున్నామే తప్ప, మన గ్రీన్ ఎనర్జీని మన కోసం కాపాడుకోలేకపోతున్నాం.

నిజమైన ఆవిష్కరణ అంటే ఏమిటి?

నిజమైన సాంకేతిక విప్లవం కేవలం డిజిటల్‌గా ఉంటే సరిపోదు; అది ప్రకృతిని కాపాడేదిగా (Regenerative) ఉండాలి. బిలియన్ల కొద్దీ నిధులను కేవలం సర్వర్ల కోసం కాకుండా, వ్యర్థాల నుంచి ఇంధనం తయారీ, సర్క్యులర్ ఎకానమీ వంటి భూస్థాయి సమస్యలను పరిష్కరించడానికి ఉపయోగించాలి. ప్రకృతి నుంచి వనరులను కేవలం వెలికితీయడం (Extracting) కాకుండా, భూమికి తిరిగి ఇచ్చే సాంకేతికతను నిర్మించాల్సిన సమయం ఆసన్నమైంది. విశాఖపట్నం (Vizag) వంటి నగరాల్లో ఇలాంటి ప్రాజెక్టులు చేపట్టేటప్పుడు పాలకులకు, పారిశ్రామికవేత్తలకు పర్యావరణ స్పృహ ఉండటం ఎంతో అవసరం.