IPO News: ఇన్వెస్టర్లకు షాక్ ఇచ్చిన ఐపీవో.. తొలిరోజే భారీ నష్టం.. మీరూ కొన్నారా..??

IPO News: దేశీయ స్టాక్ మార్కెట్లలో ఈవారం అనేక ఐపీవోలు వచ్చాయి. వీటిలో ఎక్కువ శాతం పెట్టుబడిదారులను తొలిరోజు నుంచే తమ పనితీరుతో లాభాలను తెచ్చిపెట్టాయి. అయితే ఈరోజూ మాత్రం ఇన్వెస్టర్లు పూర్తిగా నిరాశకు గురయ్యారు.

ఇప్పుడు మనం తెలుసుకోబోతున్నది వివా ట్రేడ్‌కామ్ లిమిటెడ్ ఐపీవో(Vivaa Tradecom IPO) గురించే. ఈ ఐపీవోలో పాల్గొన్న ఇన్వెస్టర్లు భారీ షాక్ తగిలిందనే చెప్పుకోవాలి. లాభాల సంగతి పక్కన పెడితే స్టాక్ డిస్కౌంట్ రేటుకు లిస్ట్ కావటంతో వారు నిరాశకు గురయ్యారు. BSE SMEలో ఐపీవో ఇష్యూ ధర కంటే 20 శాతం తక్కువ రేటుకు నిరుత్సాహకరమైన లిస్టింగ్ నమోదు చేసింది.

వాస్తవానికి వివా ట్రేడ్‌కామ్ కంపెనీ ఐపీవో సమయంలో షేర్లను రూ.51 రేటుకు విక్రయించింది. ఎస్ఎమ్ఈ కేటగిరీలో వచ్చిన ఐపీవో లాట్ పరిమాణాన్ని 2000 ఈక్విటీ షేర్లుగా ఉంచింది. రిటైల్ ఇన్వెస్టర్ల సబ్‌స్క్రిప్షన్ కోసం సెప్టెంబర్ 27న తెరచుకున్న ఐపీవో అక్టోబర్ 4న ముగిసింది. ఐపీవో ద్వారా కంపెనీ రూ.7.99 కోట్లను సమీకరించగా.. ఇందుకోసం 15.66 లక్షల తాజా ఈక్విటీ షేర్లను విక్రయించింది. మితేష్ అదానీ ప్రమోటర్ గా ఉన్న కంపెనీ ఒక్కో షేర్ ఫేస్ వాల్యూ రూ.10గా నిర్ణయించింది.

వివా ట్రేడ్‌కామ్ దుస్తులు, వస్త్రాల తయారీ వ్యాపారంలో ఉంది. కంపెనీ డెనిమ్ ఫాబ్రిక్, డెనిమ్ రెడీమేడ్ వస్త్రాలు, పురుషులు మహిళలకు కాటన్ జీన్స్ కంపెనీ ఉత్పత్తుల జాబితాలో ఉన్నాయి. కంపెనీ తాజా ఐపీవో నుంచి సేకరించిన నిధులను సాధారణ కార్పొరేట్ ప్రయోజనాల కోసం వినియోగించాలని నిర్ణయించింది.