వైరల్ అవుతున్న 2009 నాటి హోటల్ బిల్లు! అప్పట్లో ధరలు చూస్తే షాక్ అవ్వాల్సిందే!

ప్రస్తుత కాలంలో ఒక కప్పు కాఫీ తాగాలన్నా కనీసం రూ.30 నుండి రూ.50 ఖర్చు చేయాల్సి వస్తోంది. మరి అదే రూ. 50 రూపాయలకు ఇద్దరు వ్యక్తులు టిఫిన్ చేసి, కాఫీ కూడా తాగే రోజులు ఉండేవని చెబితే నమ్ముతారా? అవును ఇప్పుడు సోషల్ మీడియా ట్రెండింగ్ (trending)లో ఉన్న ఒక పాత రెస్టారెంట్ బిల్లు చూస్తే ఆ రోజులు ఎంత బాగుండేవో అర్థమవుతుంది. చెన్నైలోని వడపలనిలో ఉన్న అత్యంత పాపులర్ 'హోటల్ శరవణ భవన్' (Saravana Bhavan) కు సంబంధించిన 2009 నాటి బిల్లు ఇప్పుడు ఇంటర్నెట్‌ను ఊపేస్తోంది.

బిల్లులో ఏముంది?

ఎక్స్ (ట్విట్టర్), రెడిట్ ప్లాట్‌ఫారమ్‌లలో వైరల్ అవుతున్న ఈ బిల్లు ప్రకారం.. 2009 లో శరవణ భవన్‌ లో ధరలు ఇలా ఉన్నాయి.

• • ఒక ప్లేట్ ఇడ్లీ (2): రూ.14.50
• • చపాతీ విత్ సైడ్ డిష్: రూ.26
• • మినీ స్పెషల్ ఫిల్టర్ కాఫీ: రూ.8.83

వ్యాట్ (VAT) తో కలిపి మొత్తం బిల్లు కేవలం రూ.50 మాత్రమే కావడం విశేషం. అయితే నేడు అదే హోటల్‌ లో కేవలం ఒక్క కాఫీ తాగడానికి ఈ రూ.50 సరిపోవని నెటిజన్లు కామెంట్స్ చేస్తున్నారు.

నెటిజన్ల ఆసక్తికర స్పందనలు

ఈ పాత బిల్లును చూసిన వారు రకరకాలుగా స్పందిస్తున్నారు.

• ఏమి ఆ రోజులు: "పాత జ్ఞాపకాలు గుర్తొస్తున్నాయి. అప్పట్లో తక్కువ డబ్బుతోనే విలాసవంతమైన భోజనం చేసేవాళ్లం" అని కొందరు నోస్టాల్జియాకు లోనవుతున్నారు.
• పెరిగిన ధరలు: "జీతాలు పెరిగిన మాట నిజమే. కానీ, ధరల పెరుగుదల అంతకు మించి ఉంది. ఇప్పుడు రూ.50 తో హోటల్‌ లో వాటర్ బాటిల్ కూడా రావడం లేదు" అని మరికొందరు చమత్కరిస్తున్నారు.
• ఇంక్ మ్యాజిక్: "15 ఏళ్లు దాటినా బిల్లు మీద ఉన్న అక్షరాలు ఇంత స్పష్టంగా ఎలా ఉన్నాయో!" అని ఆశ్చర్యం వ్యక్తం చేస్తున్నారు.

పాత బిల్లులు ఎందుకు 'ట్రెండింగ్' అవుతాయి?

గతంలో కూడా 2007 నాటి ఢిల్లీ బార్ బిల్లు ఒకటి సోషల్ మీడియాలో ట్రెండ్ అయ్యింది. ఇలాంటి పాత బిల్లులు బయటకు వచ్చినప్పుడు ప్రజలకు గతానికి, వర్తమానానికి ఉన్న తేడాను పోల్చి చూసుకోవడం ఒక సరదాగా మారుతుంది. అప్పటి ఆర్థిక వ్యవస్థ, ధరల సూచీ, మన జీవనశైలి ఎలా ఉండేదో ఈ చిన్న కాగితపు ముక్కలు గుర్తుచేస్తాయి. ఈ బిల్లు శరవణ భవన్ వంటి ఐకానిక్ హోటల్ ది కావడంతో ఈ పోస్ట్‌కు ప్రాధాన్యత మరింత పెరిగింది.

ఏదేమైనా కాలం మారుతున్న కొద్దీ ధరలు పెరగడం సహజమే. అయినా ఇలాంటి పాత బిల్లులు చూసినప్పుడు మాత్రం "అరే.. అప్పట్లో ఎంత తక్కువకే వచ్చేవి కదా!" అనే ఫీలింగ్ కలగడం సహజం. అలాగే ఇవి దేశంలో పెరుగుతున్న ద్రవ్యోల్భణం గురించి కూడా గుర్తు చేస్తాయి. మరి మీ దగ్గర కూడా ఇలాంటి పాత జ్ఞాపకాలు ఏమైనా ఉన్నాయా?