Paytm News: నిండా మునిగాక కళ్లు తెరచిన పేటీఎం సీఈవో.. ఏం జరిగిందంటే..?

Vijay Shekhar Sharma: వ్యాపారంలో ఎలాంటి బ్యాక్ గ్రౌండ్ లేకపోయినా చిన్న స్థాయి నుంచి ప్రారంభించి డిజిటల్ పేమెంట్స్ స్టార్టప్ పేటీఎం స్థాపించటం వరకు వచ్చారు విజయ శేఖర శర్మ. అయితే ప్రస్తుతం గతంలో ఆయన చేసిన తప్పుల నుంచి గుణపాఠం నేర్చుకున్నానని, ఇంకా మంచిగా పనిచేసి ఉండాల్సిందంటూ తాజాగా స్పందించారు.

పేటీఎం పేమెంట్స్ బ్యాంక్‌పై రిజర్వ్ బ్యాంక్ గతంలో తీసుకున్న కఠిన చర్యలపై వ్యవస్థాపకుడు విజయ శేఖర శర్మ మరోసారి స్పందించారు. ఈ క్రమంలో మాట్లాడుతూ తాను వృత్తిపరమైన బాధ్యతలను మెరుగ్గా నిర్వహించడానికి పాఠాలు నేర్చుకున్నానని, రిజర్వు బ్యాంక్ చర్య వ్యక్తిగత స్థాయిలో భావోద్వేగ షాక్ అని అంగీకరించారు. తాము వృత్తిపరంగా మరింత మెరుగ్గా రాణించి ఉండాల్సిందని పేర్కొన్నారు. తమపై ఉన్న బాధ్యతలను మెరుగైన మార్గాల్లో నెరవేర్చాలన్నారు.

కొన్ని నెలల కిందట ఆర్బీఐ వ్యాపారులతో సహా కస్టమర్ల ఆసక్తిని దృష్టిలో ఉంచుకుని రిజర్వ్ బ్యాంక్ పేటీఎం పేమెంట్స్ బ్యాంక్ లిమిటెడ్‌ను డిపాజిట్లు, క్రెడిట్ లావాదేవీలు లేదా ఏదైనా కస్టమర్ ఖాతా, వాలెట్, ఫాస్టాగ్‌లో టాప్-అప్ చేయడాన్ని నిషేధించిన సంగతి తెలిసిందే. దీనికంటే ఛాలెంజింగ్ టైమ్స్‌ని ఎదుర్కొన్నానని విజయ్ శేఖర్ శర్మ చెప్పారు. 2013-14లో కంపెనీకి నిధుల కొరత ఏర్పడిందని ఆ సమయంలో నిధుల సేకరణకు కంపెనీ వెల్లిందన్నారు. అయితే తనకు కంపెనీ సొంత కూతురు లాంటిదని శర్మ అన్నారు. రోజువారీ వ్యాపారంలో వస్తున్న ఒడిదొడుకులు, సమస్యల నుంచి నేర్చుకుంటూ ఒక కంపెనీగా మేము పరిపక్వం చెందుతున్నామన్నారు. స్కూల్లో టాపర్ అయిన కూతురు ఎంట్రన్స్ ఎగ్జామ్ కి వెళ్తుండగా ప్రమాదంలో పడినట్లేనన్నారు.

డిజిటల్ పేమెంట్స్ స్టార్టప్‌లను ప్రధాన స్రవంతిలోకి తీసుకురావడం ద్వారా ప్రభుత్వం నిజంగా గోల్డెన్ పీరియడ్‌ను ప్రారంభించిందని విజయ్ శేఖర్ శర్మ అన్నారు. స్టార్టప్‌లను కెరీర్‌గా స్వీకరించడంలో అట్టడుగున ఉన్న రోజుల నుంచి ఇది ఆశ్చర్యకరమైన మార్పుగా పేర్కొన్నారు. ఉద్యోగార్థులు విదేశాలకు వెళ్లేందుకు లేదా విదేశీ ఐటీ కంపెనీలు లేదా పెద్ద దేశీయ సాంకేతిక సంస్థలలో ఉద్యోగాలు ఆశించే కాలం నుంచి భారతదేశం చాలా ముందుకు వచ్చిందని శర్మ చెప్పారు. ప్రస్తుతం కాలేజీ నుంచి బయటకు వచ్చి ఉద్యోగాలు వెతుక్కునే వారు విదేశాల్లో ఉద్యోగాల కోసం వెతకడం కంటే భారత్‌లోనే ఉండేందుకు ఇష్టపడుతున్నారని శర్మ పేర్కొన్నారు.