cyber scam: కూరగాయల వ్యాపారి సైబర్ మోసాలు.. 6 నెలల్లోనే 21 కోట్లు హాంఫట్!

cyber scam: సాంకేతికత విపరీతంగా పెరిగిపోయిన రోజులివి. IT రంగం అభివృద్ధి కారణంగా పెద్దగా కష్టపడకుండానే ఎంచక్కా డబ్బు సంపాదించే మార్గాలు అందుబాటులోకి వచ్చాయి. ఇలా ఏ సాఫ్ట్ వేర్ ఉద్యోగిగానో వెనకేసుకుంటే ఇబ్బంది ఉండదు. కానీ అడ్డదారులు తొక్కితేనే చివరకు ఊచలు లెక్కించాల్సిన పరిస్థితి ఏర్పడుతుంది.

రిషబ్ శర్మ అనే 27 ఏళ్ల వ్యక్తి గతంలో కూరగాయలు అమ్మి జీవనం సాగిస్తూ ఉండేవాడు. కాగా అందుబాటులో ఉన్న సాంకేతికత సహాయంతో ఇప్పుడు పెద్ద సైబర్ స్కామర్ గా మారాడు. కేవలం 6 నెలల్లోనే ఉద్యోగార్థులను మోసం చేస్తూ 21 కోట్లు సంపాదించాడు. వర్క ఫ్రమ్ హోమ్ స్కీమ్స్ పేరిట దేశంలోని 10 రాష్ట్రాల ప్రజలను దగా చేశాడు.

ప్రముఖ మీడియా సంస్థ నివేదిక ప్రకారం.. కరోనా విజృంభింజిన సమయంలో రిషబ్ తీవ్ర నష్టాలపాలయ్యాడు. వాటి నుంచి బయట పడటానికి మోసపూరిత విధానాల వైపు మొగ్గు చూపాడు. ప్రముఖ హోటల్ కు అనుకూలంగా రివ్యూలు రాయాలంటూ వర్క్ ఫ్రమ్ హోమ్ జాబ్స్ ఆఫర్ చేసేవాడు. ఈ తప్పుడు దారిలో ఎంతగా ఎదిగాడంటే ఏకంగా 37 చీటింగ్ కేసులలో ప్రధాన నిందితుడిగా మారాడు. 855 స్కామ్స్ లో ఇతడి హస్తం ఉంది.

చైనా, సింగపూర్ వంటి ఇతర దేశాల క్రిమినల్ గ్రూపులతో కలిసి రహస్య పద్ధతుల్లో నగదు ట్రాన్సఫర్ చేసేవాడని నివేదిక పేర్కొంది. తన స్నేహితుడి సాయంతో నకిలీ ఉద్యోగ అవకాశాలు కల్పిస్తూ.. ఓ టెలిగ్రామ్ గ్రూపు కూడా నిర్వహించినట్లు వెల్లడించింది. అయితే ఎట్టకేలకు అక్టోబరు 28న పోలీసులు అతడిని అరెస్టు చేశారు.