కార్మికులకు కేంద్రం దీపావళి కానుక..డీఏ పెంపుపై కార్మిక శాఖ కీలక ప్రకటన.. కొత్త డీఏ రేట్లు, అమలు తేదీ ఇదే..

Variable DA Hike News: కేంద్ర కార్మిక, ఉపాధి మంత్రిత్వ శాఖ దేశంలోని లక్షలాది మంది అసంఘటిత, కనీస వేతన కార్మికులకు ద్రవ్యోల్బణం భారం నుంచి ఉపశమనం కలిగిస్తూ వేరియబుల్ డియర్‌నెస్ అలవెన్స్ పెంపును ప్రకటించింది. పెరుగుతున్న నిత్యావసరాల ధరలు, జీవన వ్యయాన్ని తట్టుకోవడానికి వీలుగా కేంద్ర పరిధిలోని వివిధ రంగాలలో పనిచేస్తున్న రోజువారీ కార్మికుల కనీస వేతన రేట్లను నేరుగా పెంచుతూ ఈ నిర్ణయం తీసుకుంది.

వేతనాల కోడ్ 2019లోని సెక్షన్ 69(2) కింద లేబర్ బ్యూరో జారీ చేసిన ఈ కొత్త సమీక్ష ఉత్తర్వులు అక్టోబర్ 1, 2026 నుంచి దేశవ్యాప్తంగా అధికారికంగా అమలులోకి వచ్చాయి. అర్ధవార్షిక ప్రాతిపదికన జరిగే ఈ సాధారణ సర్దుబాటు ద్వారా పారిశ్రామిక కార్మికుల వినియోగదారుల ధరల సూచిక ఆధారంగా కరువు భత్యాన్ని సవరించారు. జూన్ 30, 2026 నాటికి ముగిసిన వ్యవధిలో సగటు సూచిక పాయింట్లు 6.62 పెరిగి 424.80 నుంచి 431.42 కి చేరడంతో ఈ వేతన పెంపు సాధ్యమైంది.

ఈ ఆధునీకరించబడిన వేతన రేట్లు కేంద్ర ప్రభుత్వ పరిధిలోకి వచ్చే వ్యవసాయం, నిర్మాణ, నిర్వహణ రంగాలు, లోడింగ్, అన్‌లోడింగ్ పనులు, శానిటేషన్, సెక్యూరిటీ సేవలతో పాటు దాదాపు 35 రకాల గనుల త్రవ్వకాల్లో పనిచేసే కార్మికులకు నేరుగా వర్తిస్తాయి. బాక్సైట్, ఐరన్ ఓర్, రాగి, మార్బుల్, గ్రాఫైట్, మాంగనీస్, లిగ్నైట్, కంకర గనుల వంటి కీలక మైనింగ్ రంగాల ఉద్యోగుల రోజువారీ ఆదాయంలో ఈ నిర్ణయం గణనీయమైన మార్పును తీసుకొస్తుంది. కార్మికుల నైపుణ్యం, వారు నివసించే ప్రాంత ఆధారిత కేటగిరీలను బట్టి రోజువారీ వేతనాలను నిర్ణయించారు. దీనిప్రకారం ప్రధాన మెట్రో నగరాలు కలిగిన ఏరియా 'ఎ' లో నైపుణ్యం లేని కార్మికునికి రోజువారీ కనీస వేతనం 537 రూపాయలుగా మారగా.. ఏరియా 'బి' లో 491 రూపాయలు, ఏరియా 'సి' లో 486 రూపాయలుగా నిర్ణయించబడింది.

Also Read

ప్రభుత్వ ఉద్యోగులకు గుడ్ న్యూస్.. పలు రాష్ట్రాల్లో డీఏ పెంపు.. ఏ రాష్ట్రం ఎంత శాతం పెంచిందంటే..

అలాగే సెమీ-స్కిల్డ్ లేదా అన్‌‌స్కిల్డ్ సూపర్‌వైజరీ స్థాయి కార్మికులకు ఏరియా 'ఎ' లో 587 రూపాయలు, ఏరియా 'బి' లో 539 రూపాయలు, ఏరియా 'సి' లో 496 రూపాయలు అందుతాయి. స్కిల్డ్, క్లరికల్ విధుల్లో ఉన్న ఉద్యోగులకు వరుసగా ఏరియా 'ఎ' లో 637 రూపాయలు, ఏరియా 'బి' లో 587 రూపాయలు, ఏరియా 'సి' లో 538 రూపాయలు చెల్లించనుండగా, అత్యంత నైపుణ్యం కలిగిన హైలీ-స్కిల్డ్ కార్మికులకు గరిష్టంగా ఏరియా 'ఎ' లో 705 రూపాయలు, ఏరియా 'బి' లో 655 రూపాయలు, ఏరియా 'సి' లో 587 రూపాయలు రోజువారీ పరిహారంగా లభిస్తుంది.

పారిశ్రామిక కార్మికుల సీపీఐ సూచీ యొక్క ఆరు నెలల సగటు కదలికలను సమీక్షించి ఏటా ఏప్రిల్ 1, అక్టోబర్ 1 నాటికి లేబర్ బ్యూరో ఈ ప్రతిపాదనలను తయారు చేస్తుంది. మార్కెట్‌లో వస్తువుల ధరల పెరుగుదలకు అనుగుణంగా వేతనాలు పెరగడం వల్ల అసంఘటిత రంగానికి చెందిన పేద, దిగువ మధ్యతరగతి కుటుంబాల కొనుగోలు శక్తి మెరుగుపడి వారి జీవన ప్రమాణాలు నిలకడగా ఉండేందుకు ఈ భత్యం పెంపు ఎంతో ఉపయోగపడుతుంది.

డిస్క్లైమర్: ఈ వెబ్‌సైట్‌లోని అభిప్రాయాలు, సూచనలు పూర్తిగా వ్యక్తిగత విశ్లేషకులు లేదా ఇతర సంస్థలవి మాత్రమే. ఇవి Goodreturns.in లేదా Greynium Information Technologies Private Limited అధికారిక అభిప్రాయాలు కాదని గమనించగలరు.మేము ఈ విషయం యొక్క ఖచ్చితత్వం, సమగ్రత లేదా విశ్వసనీయతపై ఎటువంటి హామీ ఇవ్వడం కాని, అనుమతించడం కాని బాధ్యత వహించడం జరగదు. మేము ఎలాంటి పెట్టుబడి సలహా ఇవ్వము. అలాగే ఎటువంటి సెక్యూరిటీ కొనుగోలు లేదా అమ్మకాలు ప్రోత్సహించము. ఈ వెబ్‌సైట్‌లోని కథనం పూర్తిగా సమాచారం, విద్యా ప్రయోజనాల కోసమే అందించబడుతుంది. మీరు ఏదైనా పెట్టుబడి నిర్ణయం తీసుకునే ముందు, లైసెన్స్ పొందిన ఆర్థిక సలహాదారుల సహాయం తీసుకోండి. ఈ కథనాన్ని కేవలం సమాచారంగా మాత్రమే పరిగణించండి.