Blackstone: ఆ హాస్పిటల్ పై అమెరికా పెట్టుబడి సంస్థ కన్ను.. మ్యాటర్ ఏంటంటే..

Blackstone: ప్రపంచవ్యాప్తంగా ప్రఖ్యాత పెట్టుబడి సంస్థల చూపు ప్రస్తుతం వేగంగా వృద్ధి చెందుతున్న భారత మార్కెట్లపై పడింది. ఈ క్రమంలో అభివృద్ధికి అవకాశం ఉన్న కంపెనీల్లో మెండుగా పెట్టుబడులను పెడుతున్నాయి.

ఈ క్రమంలో అమెరికాకు చెందిన ప్రఖ్యాత ప్రైవేట్ ఈక్విటీ పెట్టుబడుల సంస్థ బ్లాక్‌స్టోన్.. ఇండియాలోని కంపెనీలో పెట్టుబడులు పెట్టాలని చూస్తోంది. అందుబాటులో ఉన్న సమాచారం ప్రకారం అది కేరళలోని ప్రముఖ హాస్పిటల్ చైన్ కిమ్స్ హెల్త్‌కేర్ మేనేజ్‌మెంట్‌లో 75% వరకు వాటా కొనుగోలు చేయడానికి చర్చలు జరుపుతోంది. ఈ డీల్ విలువ రూ.4,000 కోట్లుగా అంచనా వేయబడింది. ఇది సెప్టెంబర్ మధ్య నాటికి ఖరారయ్యే అవకాశం ఉందని నివేదికలు చెబుతున్నాయి.

బ్లాక్‌స్టోన్ ప్రస్తుత పెట్టుబడిదారు ట్రూ నార్త్ వద్ద ఉన్న 55% వాటాను, మైనారిటీ వాటాదారుల వద్ద ఉన్న 20% వాటాను కొనుగోలు చేయాలని లక్ష్యంగా పెట్టుకుంది. మిగిలిన 25% వాటా డాక్టర్ MI సహదుల్లా నేతృత్వంలోని వ్యవస్థాపక కుటుంబం వద్ద ఉంటుంది. ఇదే క్రమంలో హాస్పిటల్ కొనుగోలుకు మణిపాల్ హెల్త్ ఎంటర్‌ప్రైజెస్, మాక్స్ హెల్త్‌కేర్, టెమాసెక్ యాజమాన్యంలోని షీర్స్ హెల్త్‌కేర్, CVC క్యాపిటల్ ప్రారంభ దశ చర్చలు జరుపుతూ పోటీలో ఉన్నాయి.

2002లో స్థాపించబడిన కిమ్స్ హెల్త్‌కేర్ మేనేజ్‌మెంట్, కేరళలో మొత్తం 1,378 పడకల సామర్థ్యంతో నాలుగు ఆసుపత్రులను నిర్వహిస్తోంది. ఇది తిరువనంతపురంలో మూడు వైద్య కేంద్రాలను, నర్సింగ్ కళాశాలను కూడా నడుపుతోంది. తిరువనంతపురం సౌకర్యం కంపెనీ నిర్వహణ ఆదాయంలో 72%, FY22లో దాని నిర్వహణ లాభంలో 82.8% వాటాను కలిగి ఉంది.