ఏడాదిలో మూడోసారి వడ్డీ రేట్ కట్: పావు శాతం తగ్గించిన అమెరికా ఫెడ్

అమెరికా: అమెరికా ఫెడరల్ రిజర్వ్ బ్యాంక్ బుధవారం మరోసారి కీలక వడ్డీ రేట్లను తగ్గించింది. క్రితంసారి వడ్డీ రేట్లు తగ్గించినప్పుడే మరోసారి తగ్గింపుపై ఓ విధంగా హింట్ ఇచ్చింది. తాజాగా, బుధవారం 25 బేసిస్ పాయింట్లు తగ్గించింది. ఈ ఏడాది ఫెడ్ వడ్డీ రేట్లను తగ్గించడం ఇది మూడోసారి.

అమెరికాలో ఇప్పటి వరకు కీలక వడ్డీ రేట్లు 1.75 శాతం నుంచి రెండు శాతం మధ్య ఉన్నాయి. ఈ రేట్లను పావు శాతం తగ్గిస్తున్నట్టు బ్యాంక్ చైర్మన్ జెరోమ్ పావెల్‌ ప్రకటించారు. ఎగుమతులు, వ్యాపార వాతావరణం అంత అనుకూలంగా లేదని, అందుకే ఈ నిర్ణయం తీసుకున్నట్లు తెలిపారు. వచ్చేసారి వడ్డీ రేట్లను యథాతథంగా కొనసాగించనున్నట్టు ఫెడ్‌ రిజర్వ్‌ సంకేతాలు ఇచ్చింది.

ప్రస్తుత వడ్డీ రేటు తగ్గింపుతో అమెరికాపై ప్రపంచ ఆర్థిక వ్యవస్థ మందగమన ప్రభావం తగ్గుతుందని భావిస్తున్నారు. అమెరికా ఆర్థిక వ్యవస్థ మాంద్యంలోకి జారిపోకుండా అడ్డుకుంటుందని అంచనా వేస్తున్నారు. తాజా నిర్ణయం నేపథ్యంలో మరోసారి మాత్రం వడ్డీ రేట్ల కోత ఉండకపోవచ్చు. ప్రస్తుత తగ్గింపుతో వడ్డీ రేట్లు 1.50 శాతం నుంచి 1.75 శాతం మధ్య ఉన్నాయి.

తగ్గింపు నిర్ణయంపై వచ్చే స్పందనను విశ్లేషించి ఆర్థిక అంచనాలు తయారు చేస్తామని ఫెడ్ బ్యాంకు చైర్మన్ వెల్లడించారు. ఫెడ్ అంచనాల ప్రకారం అమెరికా ఆర్థిక వ్యవస్థ స్థిరంగా ఉంది. ఉద్యోగ మార్కెట్ బలంగా ఉంది. ఆర్థిక కార్యకలాపాల రేటు కూడా పెరిగింది.