అర్థరాత్రి వడ్డి రేట్లు పెంచేసిన ఫెడ్.. మళ్లీ పెంపు సంకేతాలతో తల బాదుకుంటున్న ట్రంప్..

ద్రవ్యోల్బణాన్ని కట్టడి చేసే దిశగా యూఎస్ ఫెడరల్ రిజర్వ్ అత్యంత కీలకమైన నిర్ణయం తీసుకుంది. బుధవారం ముగిసిన విధాన సమీక్ష సమావేశంలో వడ్డీ రేట్లను 0.25 శాతం (25 బేసిస్ పాయింట్లు) పెంచుతున్నట్లు కేంద్ర బ్యాంకు ప్రకటించింది. జూలై 2023 తర్వాత అమెరికాలో వడ్డీ రేట్లు పెరగడం ఇదే మొదటిసారి కాగా, తాజా నిర్ణయంతో ఫెడ్ ఫండ్స్ రేట్ల పరిధి 3.75% నుండి 4%కి చేరుకుంది. ఫెడరల్ ఓపెన్ మార్కెట్ కమిటీలోని 12 మంది సభ్యులూ ఏకగ్రీవంగా రేట్ల పెంపునకు అనుకూలంగా ఓటు వేయడం గమనార్హం.

కేవిన్ వార్ష్ మే నెలాఖరులో ఫెడ్ ఛైర్మన్‌గా బాధ్యతలు చేపట్టిన తర్వాత వడ్డీ రేట్లను పెంచడం కూడా ఇదే తొలిసారి. అమెరికాలో ద్రవ్యోల్బణం ఇంకా తమ 2 శాతం లక్ష్యం కంటే అధికంగానే ఉందనే ఆందోళనల మధ్య ఈ నిర్ణయం వెలువడింది. అమెరికా అధ్యక్షుడు డొనాల్డ్ ట్రంప్ వడ్డీ రేట్లను తగ్గించాలని నిరంతరం పిలుపునిస్తున్నప్పటికీ.. ఫెడ్ స్వతంత్రంగా వ్యవహరిస్తూ స్థూల ఆర్థిక పరిస్థితుల దృష్ట్యా వడ్డీ రేట్ల పెంపుకే మొగ్గు చూపింది.

తాజా సమావేశం నుండి వెలువడిన అత్యంత కీలకమైన అంశం భవిష్యత్ ద్రవ్య విధాన మార్గదర్శకం. ఫెడ్ విడుదల చేసిన నూతన అంచనాల ప్రకారం ఈ రేట్ల పెంపు ముగింపు కాదని, 2026 చివరి నాటికి మరో రేటు పెంపు ఉండే అవకాశం ఉందని తేలింది. కమిటీలోని 18 మంది అధికారులలో 16 మంది ఈ ఏడాది డిసెంబర్ నాటికి వడ్డీ రేట్లు 4% నుండి 4.25% పరిధికి చేరుకోవచ్చని స్పష్టం చేశారు. ఫెడ్ తన ద్రవ్యోల్బణ అంచనాలను కూడా పెంచింది.

Also Read

భారీ నష్టాల్లో ప్రారంభమైన భారత స్టాక్ మార్కెట్లు.. ఫెడ్ రేట్ల సెగ, రష్యా చమురుపై యూఎస్ సుంకాల ముప్పే కారణం..

2026 నాటికి పీసీఈ ద్రవ్యోల్బణం 3.7 శాతంగా నమోదు కావచ్చని, 2 శాతం లక్ష్యాన్ని చేరుకోవడానికి గతంలో ఊహించిన 2028 కంటే ఆలస్యంగా 2029 వరకు సమయం పడుతుందని వివరించింది. ట్రంప్ ప్రభుత్వం విధించిన దిగుమతి సుంకాలు, ఆర్టిఫిషియల్ ఇంటెలిజెన్స్ రంగంలో భారీ పెట్టుబడులు, పశ్చిమాసియా యుద్ధ ఉద్రిక్తతల వల్ల మళ్లీ పెరుగుతున్న ముడి చమురు ధరలు ద్రవ్యోల్బణంపై నిరంతరం ఒత్తిడి పెంచుతున్నాయి.

మరోవైపు అమెరికా ఆర్థిక వ్యవస్థ బలమైన పునాదులపై ఉందనే సూచనలను కూడా ఫెడ్ ఇచ్చింది. 2026 ఆర్థిక సంవత్సరానికి అమెరికా జిడిపి (GDP) వృద్ధి రేటు అంచనాను 2.2 శాతం నుండి 2.3 శాతానికి పెంచగా, నిరుద్యోగ రేటు ఆశాజనకంగా 4.1 శాతానికి చేరుకుంటుందని అంచనా వేసింది. చమురు ధరల ప్రభావం భవిష్యత్ నిర్ణయాలను తీవ్రంగా శాసించనుండటంతో, రాబోయే నెలల్లో ఫెడ్ తీసుకోబోయే ద్రవ్య విధాన సంకేతాల కోసం గ్లోబల్ మార్కెట్లు అత్యంత ఆసక్తిగా ఎదురుచూస్తున్నాయి. ఈ రేట్ల పెంపు అమెరికా బాండ్ ఈల్డ్స్, డాలర్ సూచీలతో పాటు భారతదేశం వంటి వర్ధమాన దేశాల స్టాక్ మార్కెట్లు, బంగారం ధరలు, కరెన్సీల కదలికలపై రాబోయే రోజుల్లో స్పష్టమైన ప్రభావాన్ని చూపనుంది.

డిస్క్లైమర్: ఈ వెబ్‌సైట్‌లోని అభిప్రాయాలు, సూచనలు పూర్తిగా వ్యక్తిగత విశ్లేషకులు లేదా ఇతర సంస్థలవి మాత్రమే. ఇవి Goodreturns.in లేదా Greynium Information Technologies Private Limited అధికారిక అభిప్రాయాలు కాదని గమనించగలరు.మేము ఈ విషయం యొక్క ఖచ్చితత్వం, సమగ్రత లేదా విశ్వసనీయతపై ఎటువంటి హామీ ఇవ్వడం కాని, అనుమతించడం కాని బాధ్యత వహించడం జరగదు. మేము ఎలాంటి పెట్టుబడి సలహా ఇవ్వము. అలాగే ఎటువంటి సెక్యూరిటీ కొనుగోలు లేదా అమ్మకాలు ప్రోత్సహించము. ఈ వెబ్‌సైట్‌లోని కథనం పూర్తిగా సమాచారం, విద్యా ప్రయోజనాల కోసమే అందించబడుతుంది. మీరు ఏదైనా పెట్టుబడి నిర్ణయం తీసుకునే ముందు, లైసెన్స్ పొందిన ఆర్థిక సలహాదారుల సహాయం తీసుకోండి. ఈ కథనాన్ని కేవలం సమాచారంగా మాత్రమే పరిగణించండి.