Byju's: బైజూస్ రవీంద్రన్‌కు అమెరికా కోర్టు ఝలక్.. రుణదాతలకు అనుకూలంగా తీర్పు

Byju's: అమెరికా న్యాయస్థానంలో బైజూస్ యాజమాన్యానికి గట్టి ఎదురుదెబ్బ తగిలింది. రుణదాతలకు అనుకూలంగా US కోర్టు తీర్పు వెలువరించింది. సంస్థ డిఫాల్ట్ కావడంతో యూనిట్ నియంత్రణను చేతుల్లోకి తీసుకునే హక్కు వారికి ఉందని పేర్కొంది. ఈ మేరకు బైజూస్ ఫిర్యాదును తిరస్కరించింది.

బైజూస్ డిఫాల్ట్ అయిన కారణంగా బోర్డు సభ్యుని స్థానంలో తమ నామినీని నియమించుకునే హక్కు రుణదాతలకు ఉందని కోర్టు నిర్ణయించింది. కంపెనీ యాజమాన్యం వారి నుంచి 1.2 బిలియన్ డాలర్లు రుణం పొందడంతో డైరెక్టర్ ను ఎంచుకోవడానికి ఆమోదం తెలిపింది.

దీంతో రుణదాతలు ఎంచుకున్న డైరెక్టర్.. బైజూస్ ఆల్ఫా బాధ్యతలను చేపట్టారు. దీనికితోడు స్పెషల్ పర్పస్ వెహికల్ (SPV) బోర్డు నుంచి సంస్థ వ్యవస్థాపకుడి సోదరుడు రిజు రవీంద్రన్‌ను తొలగించడానికీ కోర్టు అంగీకరించింది. ఒకప్పుడు ఇండియాలో అత్యంత విలువైన స్టార్టప్ గా రికార్డులకు ఎక్కిన బైజూస్ ప్రస్తుతం ఆర్థిక, న్యాయ పరమైన సవాళ్లను ఎదుర్కొంటోంది.

'ఫిర్యాదిదారులు గ్లాస్ ట్రస్ట్ కో, తిమోతీ పోల్ లు.. బైజూస్ ఆల్ఫా ఇంక్ ఏకైక డైరెక్టర్‌ మరియు అధికారిగా రవీంద్రన్‌ ను తొలగించినట్లు డిక్లరేషన్ కోరుతున్నారు. ఆయన స్థానంలో పోల్‌ ను నియమించారు. విచారణ అనంతరం పోల్‌ ను బైజూస్ ఆల్ఫా ఏకైక డైరెక్టర్ మరియు నిజమైన అధికారిగా నిర్ధారించాను' అని డెలావేర్ ఛాన్సరీ కోర్టు న్యాయమూర్తి మోర్గాన్ జుర్న్ ప్రకటించారు.