ఇరాన్‌పై ఇక దాడులు చేయం.. అమెరికా సంచలన ప్రకటన.. ట్రంప్ కొత్త వ్యూహం ఏంటంటే..

అమెరికా-ఇరాన్ మధ్య వార్ ఇప్పట్లో ఆగేలా కనిపించడం లేదు. రెండు దేశాల మధ్య జరుగుతున్న యుద్దంతో పశ్చిమాసియాలో ఆందోళనకర పరిస్థితులు నెలకొన్నాయి. ఈ నేపథ్యంలోనే అమెరికా విదేశాంగ కార్యదర్శి మార్కో రూబియో ఇటీవల పలువురు విదేశీ మిత్రదేశాల మంత్రులతో ఫోన్ ద్వారా మాట్లాడారు.

ఈ సందర్భంగా ఆయన వాషింగ్టన్ ప్రస్తుత ఇరాన్ విధానాన్ని స్పష్టం చేశారు. ఆక్సియోస్ నివేదిక ప్రకారం.. ప్రస్తుతానికి ఇరాన్‌పై కొత్తగా సైనిక దాడులు ప్రారంభించే ఆలోచన అమెరికాకు లేదని ఆయన పేర్కొన్నారు. దానికి బదులుగా ఆర్థిక ఒత్తిడిని పెంచడం, సైనిక చర్య కాకుండా ఇతర మార్గాల ద్వారా టెహ్రాన్‌ను అదుపు చేయడానికే వాషింగ్టన్ ప్రాధాన్యత ఇస్తోందని తెలిపారు. ముఖ్యంగా ట్రెజరీ డిపార్ట్‌మెంట్ ఇటీవల ప్రకటించిన కఠినమైన ఆంక్షల కార్యక్రమాన్ని అమలు చేయడమే ఇప్పుడు తమ ప్రధాన లక్ష్యమని ఆయన వివరించారు.

అమెరికా మళ్లీ పెద్ద ఎత్తున నేరుగా పోరాట చర్యల్లోకి దిగాలని భావించడం లేదని రూబియో స్పష్టం చేసినప్పటికీ.. ఒకవేళ ఇరాన్ వైపు నుండి ఏదైనా ముందస్తు దాడి జరిగితే మాత్రం ప్రతిదాడి చేసే అవకాశాన్ని తోసిపుచ్చలేమని అమెరికా అధికారులు తెలిపారు. రాజకీయం, వ్యూహాత్మక పరంగా చూస్తే, ప్రస్తుతానికి సైనిక ఘర్షణలకు దూరంగా ఉండటం, నౌకా దిగ్బంధనం చేయడం, ఆర్థిక ఆంక్షలను మరింత తీవ్రతరం చేయడం ట్రంప్ పరిపాలన యొక్క ముఖ్య ఉద్దేశంగా కనిపిస్తోంది.

దీనితో పాటు, ప్రపంచ మార్కెట్లకు ఇంధన కొరత రాకుండా హార్ముజ్ జలసంధి ద్వారా వీలైనంత ఎక్కువ చమురును రవాణా చేయడానికి అమెరికా ప్రాధాన్యత ఇస్తోంది. ఈ తాత్కాలిక సడలింపు విధానం రాబోయే మధ్యంతర ఎన్నికల వరకు కొనసాగే అవకాశం ఉందని, ఆ తర్వాత అవసరమైతే సైనిక చర్యలను పునఃప్రారంభించే అంశాన్ని మళ్లీ పరిశీలిస్తారని ఒక అమెరికా అధికారి అభిప్రాయపడ్డారు.

Also Read

అమెరికాలో ఉద్యోగం మరిచిపోండి.. H-1B వీసా ఫీజును మళ్లీ భారీగా పెంచిన ట్రంప్ సర్కారు..

మరొకవైపు ఇరాన్ ఆర్థిక వ్యవస్థ ప్రస్తుతం పతనం అంచున ఉందని.. ఆ దేశపు సైనిక శక్తి కూడా తీవ్రంగా దెబ్బతిందని అమెరికా విదేశాంగ శాఖ ప్రతినిధి టామీ పిగాట్ వ్యాఖ్యానించారు. ఇరాన్ ప్రభుత్వానికి మిగిలి ఉన్న అన్ని రకాల ఆర్థిక జీవనాధారాలను వాషింగ్టన్ క్రమంగా కత్తిరిస్తోందని ఆయన తెలిపారు. అలాగే ఇరాన్ ఎప్పటికీ అణ్వాయుధాన్ని సాధించకుండా నిరోధించడమే అధ్యక్షుడు డొనాల్డ్ ట్రంప్ దృఢ సంకల్పమని, దానిని నిరోధించడానికి అమెరికా వద్ద ఉన్న అన్ని రకాల సాధనాలను ఉపయోగిస్తామని ఆయన స్పష్టం చేశారు.

వ్యూహాత్మకంగా కీలకమైన హార్ముజ్ జలసంధిలోని అత్యధిక ప్రాంతం నుండి మైన్‌లను తొలగించడం ద్వారా ఒక పెద్ద విజయం సాధించామని అమెరికా అధికారులు తెలిపారు. దీనివల్ల ప్రపంచ ఇంధన మార్కెట్లపై ఇరాన్ కలిగి ఉన్న పట్టు పూర్తిగా సడలిపోయిందని.. జలసంధిపై నియంత్రణను ఇరాన్ కోల్పోగా, ప్రస్తుతం అది అమెరికా పర్యవేక్షణలోకి వచ్చిందని వారు పేర్కొన్నారు. దీనికి నిదర్శనంగా గత పక్షం రోజులుగా ఇరాన్‌లోని అత్యంత ముఖ్యమైన ఖార్గ్ ద్వీప ఎగుమతి కేంద్రం నుండి దాదాపు ఒక్క చమురు ట్యాంకర్ కూడా బయలుదేరలేదని అధికారులు వెల్లడించారు.

ఈ ఉద్రిక్తతల నడుమ, పాకిస్తాన్ సైన్యాధిపతి ఫీల్డ్ మార్షల్ అసిమ్ మునీర్ ఆదివారం టెహ్రాన్‌లో పర్యటించి కీలక చర్చలు జరిపారు. ఆయన అంతకుముందే అధ్యక్షుడు ట్రంప్‌తో మాట్లాడి ఇరాన్ వివాద పరిష్కారానికి ఒక కొత్త ప్రణాళికను ప్రతిపాదించినట్లు సౌదీ ప్రసార సంస్థ అల్ అరబియా పేర్కొంది. అయితే ఈ ప్రతిపాదనపై స్పందించిన వైట్ హౌస్, ఆ సంభాషణను ఖండించనప్పటికీ, ప్రస్తుతం ఇరాన్‌తో ఎలాంటి చర్చలు జరపడం లేదని స్పష్టం చేసింది. ప్రస్తుతానికి కేవలం తీవ్రమైన ఆర్థిక, దౌత్య ఒత్తిడి తేవడంపైనే దృష్టి పెట్టామని.. ఈ ఒత్తిడే భవిష్యత్తులో ఇరానీయులను తిరిగి చర్చల బల్ల ముందుకు తీసుకువస్తుందని అమెరికా నమ్ముతోంది.