కుప్పకూలిన Silicon Valley Bank.. ఒక్క దెబ్బకు రూ.6.50 లక్షల కోట్లు ఫసక్

Silicon Valley Bank: ఈరోజు దేశీయ స్టాక్ మార్కెట్లతో పాటు అంతర్జాతీయ మార్కెట్లు భారీ క్షీణతను నమోదు చేశాయి. అమెరికాకు చెందిన సిలికాన్ వ్యాలీ బ్యాంక్ మాతృ సంస్థ SVB ఫైనాన్సియల్ గ్రూప్ షేర్లు భారీగా పతనం కావటమే దీనికి ప్రధాన కారణంగా తెలుస్తోంది. ఈ బ్యాంక్ ప్రధానంగా స్టార్టప్ కంపెనీలకు రుణాలను అందిస్తుంటుంది. బ్యాంక్ ప్రధాన కార్యాలయం కాలిఫోర్నియాలోని శాంటా క్లారాలో ఉంది.

బ్యాంక్ వెల్లడి..

నిధుల కోసం కష్టపడుతున్న స్టార్టప్‌ల నుంచి డిపాజిట్లు తగ్గిపోవడంతో బ్యాంక్ తన బ్యాలెన్స్ షీట్‌ను పెంచుకోవడానికి 2.25 బిలియన్ డాలర్ల విలువైన షేర్లను విక్రయించాలని నిర్ణయించింది. ఈ ప్రకటనతో బ్యాంక్ మార్కెట్ విలువ రూ.6.50 లక్షల కోట్లు(80 బిలియన్ డాలర్లు) మేర ఆవిరైంది. బ్యాంక్ షేర్ విలువ దాదాపు 60.41 శాతం క్షీణించింది. ఈ సమస్య కేవలం అమెరికాకు మాత్రమే పరిమితమైనప్పటికీ.. ఆ ప్రభావం ప్రపంచవ్యాప్తంగా మార్కెట్లపై కనిపిస్తోంది. జూన్ 2020 తర్వాత అమెరికా బ్యాంక్ ఇండెక్స్ ఇంత భారీ స్థాయిలో పతనం కావటం ఇదే తొలిసారి.

ఇండియాలో..

అమెరికా బ్యాంకింగ్ రంగంలో కంపనలు ఇండియాలోనూ కనిపిస్తున్నాయి. దేశీయ బ్యాంకింగ్ స్టాక్స్ సైతం నేడు మార్కెట్లో భారీగా క్షీణించాయి. దీనిపై ప్రముఖ బ్యాంక్ కోటక్ మహీంద్రా సీఈవో ఒక ట్వీట్ చేశారు. ఒక ఏడాదిలో వడ్డీ రేట్లు సున్నా నుంచి 500 బేసిస్ పాయింట్లకు చేరుకున్న తరుణంలో ఎక్కడో ఒకచోట ప్రమాదం జరగటానికి వేచి ఉందని ట్వీట్ చేశారు. గత ఏడాది కాలంలో ఫెడ్ తన వడ్డీ రేట్లను 4.5 శాతానికి పైగా పెంచింది. 2007 తర్వాత ఇదే అత్యధికమని ఉదయ్ కోటక్ తెలిపారు. ఇది మరింతగా పెరిగే అవకాశం ఉందని ఫెడ్ ఇటీవల్ కీలక ప్రకటన చేయటం ఆందోళనలను పెంచుతోంది.

బ్యాంకు వ్యాపారం..

అయితే ప్రస్తుతం అమెరికాలో దిగ్గజ బ్యాంక్ లిక్విడిటీ క్రంచ్ ఎదుర్కొంటున్న తరుణంలో దీనిని చాలా మంది 2008 లేమన్ బ్రదర్ ఘటనతో పోల్చుతున్నారు. SVB సగం వ్యాపారం US వెంచర్ క్యాపిటల్-ఇన్వెస్ట్ చేసిన స్టార్టప్ కంపెనీలతో ముడిపడి ఉందని బ్లూమ్‌బెర్గ్ వెల్లడించింది. బ్యాంక్ వ్యాపారంలో 44 శాతం వరకు టెక్నాలజీ, హెల్త్ కేర్ రంగాల కంపెనీలతో కలిసి నిర్వహిస్తోంది. వడ్డీ రేట్ల పెంపు ఈ రంగాలపై తీవ్ర ప్రభావం చూపడంతో పాటు కంపెనీలు నగదు కొరతను ఎదుర్కొంటున్నాయి. అధిక వడ్డీ రేట్లు కొనసాగే అవకాశం ఉందని ఎస్‌విబి సీఈవో గ్రెగ్ బేకర్ బుధవారం ఒక లేఖలో తెలిపారు. ఇది మా ఖాతాదారుల ముందు నగదు కొరతను కలిగిస్తుంది. అందుకే షేర్లను విక్రయించాలని నిర్ణయించినంట్లు తెలిపారు.