దేశంలో UPI, క్రెడిట్ కార్డుల హవా.. 2027 నాటికి ఏకంగా..

UPI: భారత పేమెంట్స్ వ్యవస్థ UPI రికార్డులు సృష్టిస్తోంది. అగ్ర రాజ్యాలకు సైతం సాధించలేని ఘనతను UPI ద్వారా ఇండియా తన ఖాతాలో వేసుకుంది. అయితే ఇప్పుడు తన పాత రికార్డులను చెరిపేస్తూ, కొత్త శిఖరాలకు దూసుకుపోతోంది. తాజాగా విడుదలైన ఓ నివేదిక.. దేశంలో UPI సత్తాను మరోసారి తెలియజేసింది.

'ది ఇండియన్ పేమెంట్స్ హ్యాండ్‌బుక్ - 2022-27" పేరుతో PwC ఇండియా ఓ నివేదిక విడుదల చేసింది. దీని ప్రకారం, 2026-27 నాటికి యూనిఫైడ్ పేమెంట్స్ ఇంటర్‌ఫేస్ (UPI) లావాదేవీలు క్రమంగా పెరుగుతూ, రోజుకు 1 బిలియన్ లావాదేవీల మార్కుని చేరుకుంటాయని తెలిపింది. దేశంలో డిజిటల్ చెల్లింపుల విప్లవాన్ని ముందుకు తీసుకువెళ్లడంలో UPI కీలకపాత్ర పోషించగా.. 2022-23 మధ్య రిటైల్ విభాగం మొత్తం లావాదేవీల్లో దాదాపు 75 శాతం వాటాను కలిగి ఉన్నట్లు వెల్లడించింది.

రిటైల్ డిజిటల్ పేమెంట్స్లో UPI ఆధిపత్యం మరింత పెరగనుందని PwC నివేదిక అంచనా వేసింది. రాబోయే ఐదేళ్లలో మొత్తం లావాదేవీల్లో 90 శాతం UPI ద్వారానే జరుగుతాయని అభిప్రాయపడింది. ఇప్పటికే భారతీయ డిజిటల్ చెల్లింపుల మార్కెట్ స్థిరమైన వృద్ధిని సాధించింది. లావాదేవీ పరిమాణంలో 50 శాతం CAGRతో హవా కొనసాగిస్తోంది. 2022-23 ఆర్థిక సంవత్సరంలో ఈ లావాదేవీల సంఖ్య 103 బిలియన్ల కాగా.. 2026-27 నాటికి 411 బిలియన్లకు పెరుగుతుందని. పేర్కొంది.

ఈ వృద్ధి పథం కొనసాగుతుందని నివేదిక అంచనా వేసింది. UPI లావాదేవీలు 2022-23లో 83.71 బిలియన్ల నుండి 2026-27 నాటికి 379 బిలియన్లకు గణనీయంగా పెరుగుతాయని తెలిపింది. UPI తర్వాత రిటైల్ డిజిటల్ చెల్లింపులకు డెబిట్ మరియు క్రెడిట్ కార్డ్‌లతో సహా కార్డ్ చెల్లింపులు ప్రాముఖ్యత కలిగి ఉన్నట్లు వెల్లడించింది. 2024-2025 నాటికి క్రెడిట్ కార్డ్ లావాదేవీలు.. డెబిట్ కార్డ్ పేమెంట్స్ ను అధిగమిస్తాయని భావిస్తోంది.