UPI పేమెంట్స్‌లో ఎవరు విజేతలు? ఎవరు పరాజితులు? తెలిసితే ఆశ్చర్యపడతారు!

ఒకప్పుడు కేవలం కాష్‌నే నమ్మిన మనం, ఇప్పుడు ఫోన్‌లో రెండు ట్యాప్స్‌తోనే బిల్లు క్లియర్ చేసేస్తున్నాం. UPI వచ్చాక కొనుగోళ్లు చేయడం కేవలం సులభమే కాదు అలవాటైపోయింది కూడా. అయితే ఈ డిజిటల్ పేమెంట్ హవా అందరికీ లాభం చేకూర్చిందా? అంటే లేదు. కొన్ని రంగాలు UPIతో పటాపంచలుగా ఎదుగుతుంటే, ఇంకొన్ని మాత్రం ఒక్కొక్కటిగా దుకాణం మూసేస్తున్నాయి.

దూసుకెళ్తున్న రంగాలు:

ఫాస్ట్ ఫుడ్ రెస్టారెంట్లు: 2025 ఏప్రిల్-ఆగస్టులో ఫాస్ట్ ఫుడ్ దుకాణాల్లో UPI పేమెంట్స్ 255% పెరిగి 5.9 బిలియన్ ట్రాన్సాక్షన్లకు చేరాయి. మొత్తం విలువ 228% పెరిగి రూ. 69,133 కోట్లకు చేరింది. 5 నెలల్లో ఒక్కో వ్యక్తి సగటున 4.1 సార్లు ఫాస్ట్ ఫుడ్ కొన్నారని అర్థం. (2023లో ఇది కేవలం 1.2 మాత్రమే) అయితే ఒక్కో ట్రాన్సాక్షన్ సైజ్ మాత్రం రూ. 127 నుంచి రూ. 117కి కాస్త తగ్గింది.

ఆన్‌లైన్ మార్కెట్‌ప్లేస్‌లు: ఈ-కామర్స్ ప్లాట్‌ఫార్మ్‌లలో పేమెంట్స్ 238% పెరిగి 505 మిలియన్లకు చేరాయి. మొత్తం విలువ రూ. 33,947 కోట్లకు చేరింది. ఒక్కో వ్యక్తి సగటున 0.35 సార్లు ఈ-కామర్స్ ట్రాన్సాక్షన్లు చేశారు. ఇది ఈ రంగంలో UPI ఆధిపత్యాన్ని చూపిస్తోంది.

గ్రోసెరీస్ మరియు సూపర్ మార్కెట్లు: రోజువారీ ఖర్చుల్లో UPI బలంగా స్థిరపడిపోయింది. గ్రోసరీ షాపుల్లో 14.5 బిలియన్ ట్రాన్సాక్షన్లు జరిగి రూ. 3.2 లక్షల కోట్లకు చేరాయి. అంటే 5 నెలల్లో ఒక్కో వ్యక్తి దాదాపు 10 సార్లు ఇక్కడ UPI వాడినట్టే!

కిందకు పడుతున్న రంగం:
డిపార్ట్‌మెంట్ స్టోర్‌లు: ఈ స్టోర్లలో ట్రాన్సాక్షన్లు దాదాపు 80% తగ్గి 332 మిలియన్లకు పడిపోయాయి. విలువ కూడా రూ. 21,156 కోట్లకు తగ్గింది. అయితే ఒక్కో బిల్లు మాత్రం పెద్ద మొత్తంలో ఉంటోంది. సగటు టికెట్ సైజ్ రూ. 637కి పెరిగింది (మూడు రెట్లు పెరుగుదల!) అంటే, ఇక్కడ ఇప్పటికీ కొంతమంది ఉన్నా వారు పెద్ద బిల్లులకే UPI వాడుతున్నారు.

మిగతా రంగాల్లో కూడా UPI వినియోగం బాగా పెరిగింది. ఉదాహరణకి, మందుల దుకాణాలు మరియు ఫార్మసీల్లోనే 1.36 బిలియన్ లావాదేవీలు జరిగి, దాదాపు రూ. 54,721 కోట్లు చెల్లింపులు జరిగాయి. ఒక్కొక్క ట్రాన్సాక్షన్ సగటు రూ. 400 చుట్టూ ఉంది. ఇదే విధంగా, డెయిరీల్లో కూడా 870 మిలియన్లకు పైగా లావాదేవీలు జరిగి రూ. 21,928 కోట్లు తిరిగాయి. అలాగే ప్రభుత్వ సేవలకూ ఆన్‌లైన్ పేమెంట్ సిస్టమ్స్ మంచి ఊపునిచ్చాయి. 508 మిలియన్ ట్రాన్సాక్షన్ల ద్వారా రూ. 48,847 కోట్ల చెల్లింపులు పూర్తయ్యాయి.

మొత్తానికి UPI వినియోగం ఇప్పుడు మన రోజు వారీ జీవనశైలిలో బలంగా కలిసిపోయింది. ఫాస్ట్ ఫుడ్, ఈ-కామర్స్, గ్రోసరీ షాపులు రికార్డు వృద్ధిని సాధిస్తుంటే, డిపార్ట్‌మెంట్ స్టోర్స్ మాత్రం ఒక్కో అడుగు వెనక్కి వేస్తున్నాయి. డిజిటల్ పేమెంట్ మ్యాప్‌లో అవి నెమ్మదిగా కనుమరుగవుతున్నాయి!