ఉచిత UPI సేవలు బంద్..డిజిటల్ చెల్లింపులు చేయాలంటే ఫీజు తప్పదు.. RBI గవర్నర్ కీలక వ్యాఖ్యలు

ఉచిత డిజిటల్ చెల్లింపుల శకం ముగింపు దశకు చేరుకుంటుందని రిజర్వ్ బ్యాంక్ ఆఫ్ ఇండియా (RBI) గవర్నర్ సంచలన వ్యాఖ్యలు చేశారు. భవిష్యత్తులో UPI వినియోగదారులు డిజిటల్ చెల్లింపులు చేయడానికి రుసుము చెల్లించాల్సి రావచ్చు. రిజర్వ్ బ్యాంక్ ఆఫ్ ఇండియా గవర్నర్ సంజయ్ మల్హోత్రా దీని గురించి సూచనప్రాయంగా చెప్పారు.

పూర్తిగా ఉచిత డిజిటల్ లావాదేవీల యుద్ధం త్వరలో ముగిసిపోవచ్చని ఆయన అన్నారు. UPI నిరంతరం కొత్త శిఖరాలను చేరుకుంటుందని RBI గవర్నర్ తెలిపారు.అయితే దానిని ఆర్థికంగా స్థిరంగా ఉంచడానికి ప్రయత్నాలు చేయాల్సి ఉంటుంది. దీనికి సంబంధించిన ఖర్చులను ఎవరో ఒకరు భరించాల్సి ఉంటుందని ఆయన తెలిపారు.

ఫైనాన్షియల్ ఎక్స్‌ప్రెస్‌తో సంజయ్ మల్హోత్రా మాట్లాడుతూ.. యుపిఐ ప్రస్తుతం ఎటువంటి యూజర్ ఛార్జీ లేకుండా నడుస్తోందని అన్నారు. ఈ మొత్తం వ్యవస్థను వినియోగదారులకు ఉచితంగా అందించడానికి ప్రభుత్వం బ్యాంకులు, ఇతరులకు ఆర్బీఐ సబ్సిడీని అందిస్తోంది. చెల్లింపు, డబ్బు నేటి కాలానికి జీవనాడిలా మారింది. కాబట్టి మనకు సమర్థవంతమైన, బలమైన వ్యవస్థ అవసరమని ఆయన అన్నారు.

ఈ నేపథ్యంలోనే యుపిఐతో అనుబంధించబడిన బ్యాంకులు, ఇతర సంస్థలకు ప్రభుత్వం సబ్సిడీని అందిస్తోంది. తద్వారా యుపిఐ చెల్లింపు వ్యవస్థను ఉచితంగా ఉంచవచ్చు. అయితే భవిష్యత్తులో ఇది మారవచ్చు. యూపీఐ ఉపయోగం కోసం కొంత ఖర్చు చెల్లించాల్సి ఉంటుందని సంజయ్ అన్నారు. దీన్ని ఉచితంగా ఉంచాలంటే ఎవరైనా ఖర్చులు భరించాల్సిందే అని మల్హోత్రా స్పష్టం చేశారు.

UPI చెల్లింపులు వేగంగా పెరుగుతున్న సమయంలో RBI గవర్నర్ నుండి ఈ ప్రకటన వచ్చింది. కేవలం 2 సంవత్సరాలలో రోజువారీ లావాదేవీలు రెట్టింపు అయ్యాయి. 2024 నాటికి UPI లావాదేవీలు 31 కోట్ల నుండి 60 కోట్లకు పెరిగాయి.ఇది భారతదేశపు డిజిటల్ వ్యాపార విస్తరణకు నిదర్శనమన్నారు. జీరో MDR విధానాన్ని కొనసాగించాలనే నిర్ణయం అంతిమంగా ప్రభుత్వానిదేనని సంజయ్ మల్హోత్రా అన్నారు. ప్రభుత్వం UPI ద్వారా డబ్బు వసూలు చేస్తుందా లేదా అనే దానిపై చాలా కాలంగా చర్చ జరుగుతోంది.

ప్రస్తుతం యూజర్లకు ఎటువంటి ఛార్జీలు లేకుండా UPI సేవలు అందుతున్నా.. ఆర్ధికంగా దీన్ని కొనసాగించడం కష్టమవుతోందని RBI గవర్నర్ చెబుతున్నారు. ఆర్బీఐ గవర్నర్ ప్రకటన వాణిజ్య వర్గాల్లో కలవరం కలిగించే అంశంగా మారుతోంది. ఎందుకంటే MDR చార్జీలు తిరిగి వస్తే చిన్న వ్యాపారులు మరియు ఖాతాదారులపై అదనపు భారం పడే అవకాశముంది.

క్లుప్తంగా చూస్తే, UPI లాంటి ప్రపంచస్థాయి డిజిటల్ పేమెంట్ మోడల్‌ను ఉచితంగా కొనసాగించడం దీర్ఘకాలంలో ఆచరణయోగ్యం కాదనే విషయాన్ని RBI స్పష్టం చేసింది. ఇది భవిష్యత్ డిజిటల్ చెల్లింపు విధానాలపై ప్రభావం చూపే కీలక అభివృద్ధిగా మారొచ్చని నిపుణులు భావిస్తున్నారు. మరి ముందు ముందు ఆర్బీఐ దీనిపై ఎలాంటి నిర్ణయం తీసుకుంటుందో చూడాల్సి ఉంటుంది.