కేంద్ర ప్రభుత్వ ఉద్యోగులకు అదిరిపోయే వార్త.. 63 శాతానికి చేరనున్న డీఏ!

భారతదేశంలోని లక్షలాది మంది కేంద్ర ప్రభుత్వ ఉద్యోగులు , పెన్షనర్లకు ఒక సూపర్ గుడ్ న్యూస్ రాబోతోంది. జూలై 2026 నుండి వారి డియర్నెస్ అలవెన్స్ (DA), డియర్నెస్ రిలీఫ్ (DR) మరో 3 శాతం పెరిగే అవకాశం ఉన్నట్లు తెలుస్తోంది. ప్రస్తుతం దేశంలో ఉన్న ద్రవ్యోల్బణం (ఇన్‌ఫ్లేషన్) లెక్కలను బట్టి చూస్తే ఈ పెంపు దాదాపు ఖాయంగా కనిపిస్తోంది. కేంద్ర ప్రభుత్వం కనుక దీనికి ఆమోదం ముద్ర వేస్తే, ప్రస్తుతం ఉన్న 60 శాతం డీఏ కాస్తా ఏకంగా 63 శాతానికి చేరుకుంటుంది. దీనివల్ల ఉద్యోగుల చేతికి వచ్చే జీతాలు, రిటైర్డ్ వ్యక్తుల పెన్షన్లు భారీగా పెరుగుతాయి.

గుర్తుండే ఉంటుంది.. ఈ ఏడాది ఏప్రిల్‌లోనే మోదీ ప్రభుత్వం ఉద్యోగులకు 2 శాతం డీఏ పెంచింది. దాంతో అంతకుముందు 58 శాతంగా ఉన్న అలవెన్స్ కాస్తా 60 శాతానికి పెరిగింది. ఇప్పుడు మళ్లీ మరో 3 శాతం పెరిగే సూచనలు కనిపిస్తున్నాయి.

3 శాతం డీఏ పెంపు ఎందుకు ఖాయం?

లేబర్ బ్యూరో విడుదల చేసిన తాజా 'కన్స్యూమర్ ప్రైస్ ఇండెక్స్ ఫర్ ఇండస్ట్రియల్ వర్కర్స్' (CPI-IW) డేటా ప్రకారం.. ఏప్రిల్ 2026 లో ఈ ఇండెక్స్ 0.8 పాయింట్లు పెరిగి 149.9 కి చేరింది. అంటే మార్కెట్‌లో వస్తువుల ధరలు, ద్రవ్యోల్బణం పెరుగుతూనే ఉన్నాయని ఈ లెక్కలు స్పష్టం చేస్తున్నాయి.

2026 మొదటి నాలుగు నెలల్లో ఈ క్యాలిక్యులేషన్ చాలా స్థిరంగా పెరిగింది. ఏప్రిల్ నాటికి లెక్కించిన డీఏ 62.54 శాతంగా ఉంది. మే, జూన్ నెలల డేటా కూడా ఇలాగే వస్తే.. ఫైనల్ ఫిగర్ 63.72 శాతానికి చేరుకుంటుంది. సాధారణంగా ప్రభుత్వం డీఏ పెంపును రౌండ్ ఫిగర్ (సమీప పూర్ణాంకం) చేస్తుంది కాబట్టి, ఈసారి 3 శాతం పెంపుతో DA రేటు 63 శాతానికి ఫిక్స్ అయ్యే ఛాన్స్ ఉంది.

ఎవరి జీతం ఎంత పెరుగుతుంది?

డీఏ పెంపు అనేది పూర్తిగా ఉద్యోగి యొక్క బేసిక్ శాలరీ (ప్రాథమిక వేతనం) మీద ఆధారపడి ఉంటుంది. ఉదాహరణకు, లెవెల్-1 లో ఉంటూ కనీస బేసిక్ శాలరీ రూ. 18,000 తీసుకునే ఉద్యోగికి ప్రస్తుతం 60% లెక్కన రూ. 10,800 డీఏ వస్తోంది. ఒకవేళ అది 63% కి పెరిగితే, నెలకు రూ. 11,340 డీఏ వస్తుంది. అంటే ప్రతి నెల జీతంలో రూ. 540 అదనంగా పెరుగుతుంది.
ఎక్కువ బేసిక్ శాలరీ ఉన్నవారికి వచ్చే లాభం ఇలా ఉంటుంది..

• బేసిక్ శాలరీ రూ. 25,500: నెలవారీ పెంపు రూ. 765
• బేసిక్ శాలరీ రూ. 35,400: నెలవారీ పెంపు రూ. 1,062
• బేసిక్ శాలరీ రూ. 44,900: నెలవారీ పెంపు రూ. 1,347

పెన్షనర్లకు ఎంత లాభం?

ఇదే పెంపు రిటైర్డ్ ఉద్యోగులకు ఇచ్చే డియర్నెస్ Relief (DR) కి కూడా వర్తిస్తుంది. కనీస బేసిక్ పెన్షన్ రూ. 9,000 తీసుకునే ఒక పెన్షనర్‌కు ప్రస్తుతం రూ. 5,400 డియర్నెస్ రిలీఫ్ వస్తోంది. ఇది 63 శాతానికి పెరిగితే, నెలకు రూ. 5,670 వస్తుంది. అంటే నెలకు రూ. 270 అదనంగా లాభం చేకూరుతుంది.

అధికారిక ప్రకటన ఎప్పుడు వస్తుంది?

ఈ డీఏ పెంపు అనేది జూలై 1, 2026 నుండి వర్తిస్తుంది. అయితే, కేంద్ర ప్రభుత్వం నుండి అఫీషియల్ అనౌన్స్‌మెంట్ రావడానికి కొంత సమయం పడుతుంది. సాధారణంగా ప్రభుత్వం ఏడాదికి రెండుసార్లు డీఏ పెంచుతుంది (మొదటిది జనవరి-జూన్ కాలానికి గానూ మార్చిలో, రెండోది జూలై-డిసెంబర్ కాలానికి గానూ సెప్టెంబర్ లేదా అక్టోబర్‌లో ప్రకటిస్తారు). కాబట్టి ఉద్యోగులు ఈ అధికారిక గుడ్ న్యూస్ కోసం దీపావళి పండుగ వరకు వెయిట్ చేయాల్సి రావచ్చు. కానీ, ఆలస్యమైనా సరే జూలై నుండి పెరిగిన నెలల తాలూకు బకాయిలను (Arrears) ప్రభుత్వం ఒకేసారి అందిస్తుంది.

ఉద్యోగ సంఘాల డిమాండ్ ఏంటి?

మార్కెట్‌లో పెరుగుతున్న ధరలకు అనుగుణంగా జీతాలు పెంచాలని, అలాగే 8వ వేతన సంఘం (8th Pay Commission) ఏర్పాటులో జరుగుతున్న ఆలస్యాన్ని భర్తీ చేయడానికి ఈ డీఏ పెంపును త్వరగా ప్రకటించాలని ఉద్యోగులు కోరుతున్నారు. అంతేకాదు, 8వ పే కమిషన్ సిఫార్సులు అమల్లోకి రాకముందే.. ప్రస్తుతం ఉన్న డీఏలో కనీసం 50 శాతాన్ని బేసిక్ శాలరీలో విలీనం (Merge) చేయాలని పలు ఉద్యోగ సంఘాలు ప్రభుత్వంపై ఒత్తిడి తెస్తున్నాయి.