Defence: మాజీ సైనికుల అనాథ పిల్లలకు గుడ్ న్యూస్.. సహాయం మూడింతలు చేసిన కేంద్రం.. దరఖాస్తు ఇలా..

Defence: కేంద్ర ప్రభుత్వం దేశ రక్షణలో అమరులైన సైనికుల కుటుంబాలను ఆదుకునేందుకు కీలక నిర్ణయం తీసుకుంది. మాజీ సైనికుల అనాథ పిల్లల ప్రయోజనాల కోసం కేంద్ర ప్రభుత్వ రక్షణ మంత్రిత్వ శాఖ పెద్ద నిర్ణయం తీసుకుంది. మాజీ సైనికుల అనాథ పిల్లలకు నెలవారీ ఆర్థిక సహాయాన్ని రూ.1,000 నుంచి రూ.3,000కు పెంచేందుకు రక్షణ మంత్రి రాజ్‌నాథ్‌సింగ్‌ ఆమోదం తెలిపారు.

గౌరవంగా జీవించేందుకే..

దీనివల్ల తల్లిదండ్రులను కోల్పోయిన అనాథ పిల్లలు తమ జీవితాలను గౌరవంగా, మెరుగ్గా గడిపేందుకు ఈ సాయం దోహదపడుతుందని రక్షణ మంత్రిత్వ శాఖ విడుదల చేసిన ప్రకటనలో పేర్కొంది.

ఏ పిల్లలకు ఈ సదుపాయం అందుతుంది..

ప్రస్తుత పథకం అనాథ పిల్లల కోసం అందుబాటులో ఉంది. మాజీ సైనికుడి కుమారుడు లేదా అవివాహిత కుమార్తె ఈ ఆర్థిక సహాయం పొందేదుకు అర్హులు. ఇందుకోసం వారి వయస్సు 21 సంవత్సరాల కంటే తక్కువ ఉండాలని కేంద్ర ప్రభుత్వం స్పష్టం చేసింది.

ఎక్కడ దరఖాస్తు చేసుకోవాలి..

ఈ పథకం కింద ప్రయోజనాలను పొందడానికి సంబంధిత జిల్లా సైనిక్ బోర్డు (ZSB)కి దరఖాస్తు చేసుకోవాల్సి ఉంటుంది. దాని ఆధారంగా ఆర్థిక సహాయం అందించబడుతుంది.

దీనిని ఎవరు నిర్వహిస్తారు..

ఈ పథకం కేంద్రీయ సైనిక్ బోర్డు (KSB)చే నిర్వహించబడుతోంది. రక్షణ మంత్రి మాజీ సైనికుల సంక్షేమ నిధి (RMEWF) ద్వారా ఈ పథకానికి అవసరమైన నిధులు అందుతాయి.