Indian Economy: 2024 భారత ఆర్థికంపై యూఎన్ సానుకూలం.. వృద్ధి రేటు అంచనా ఇదే..

UN Report: కొత్త ఏడాది భారతదేశంలో ఎన్నికలు రాబోతున్నాయి. ఈ సమయంలో దేశ ఆర్థిక వృద్ధి రేటు చాలా కీలకమైనది. ఇప్పటికే ప్రభుత్వం భారీగా ఇన్ ఫ్రా నిర్మాణ వ్యయాలతో ఆర్థికాన్ని ముందుకు నడుపుతోంది. ఇంకెంత కాలం ఇది కొనసాగుతుందో తెలియదు.

ఇలాంటి క్రమంలో భారత ఆర్థిక వృద్ధి రేటు 6.2 శాతంగా ఉంటుందని ఐక్యరాజ్య సమితి తన సానుకూలతను ప్రకటించింది. ఈ అంచనాలు కేంద్రంలోని బీజేపీ ప్రభుత్వానికి అనుకూలమని నిపుణులు అంచనా వేస్తున్నారు. అలాగే వరల్డ్ ఎకనామిక్ సిట్యుయేషన్ అండ్ ప్రాస్పెక్ట్స్ నివేదిక ప్రకారం 2024లో జీడీపీ 5.2 శాతం పెరుగుతుందని అంచనా వేయబడింది. ప్రపంచ ఆర్థిక వ్యవస్థలో భారత్ గణనీయమైన కృషిని కలిగి ఉంది.

దేశీయంగా మంచి డిమాండ్, తయారీ, సేవల రంగాల్లో వృద్ధి రేట్లు కొనసాగుతాయని నివేదిక పేర్కొంది. అయితే 2023తో పోలిస్తే కాస్త తగ్గుదల నమోదవుతుందని పేర్కొంది. భారతదేశ జీడీపీ 2025లో 6.6 శాతానికి పెరుగుతుందని అంచనా వేసింది. ఇండియన్ ఎకానమీ ఈ ఏడాది మాత్రమే కాకుండా గత కొన్నేళ్లుగా ఇతర ఆర్థిక వ్యవస్థల కంటే మెరుగైన పనితీరు కనబరిచిందని హమీద్ రషీద్ అన్నారు.

2024, 2025లో కూడా ఇదే ధోరణి కొనసాగుతుందని, ద్రవ్యోల్బణం ఎక్కువగా ఉన్నప్పటికీ భారతదేశం వడ్డీ రేట్లను పెద్దగా పెంచాల్సిన అవసరం లేదని హమీద్ పేర్కొన్నారు. అగ్రగామి ఆర్థిక వ్యవస్థల్లో కంటే అభివృద్ధి చెందుతున్న మార్కెట్లలోనే పెట్టుబడులు పెరిగినట్లు నివేదిక వెల్లడించింది. 2023లో దక్షిణాసియాలో ముఖ్యంగా భారతదేశంలో పెట్టుబడులు పెరిగాయి. నిర్మాణ రంగం వల్ల చైనాలో పెట్టుబడులు భారీగా దెబ్బతిన్నాయి. అలాగే వాతావరణ మార్పులు దక్షిణాసియాకు హాని కలిగిస్తుందని నివేదిక హైలైట్ చేసింది.

జూలై, ఆగస్టు వరకు విస్తరించే కరువు భారతదేశం, నేపాల్, బంగ్లాదేశ్‌లలో చాలా వరకు ప్రభావితం చేస్తుందని నివేదిక హెచ్చరించింది. అయితే సగటు కంటే ఎక్కువ వర్షపాతం పాకిస్తాన్‌లో సమస్యలను కలిగిస్తుందని పేర్కొంది. GDPలో అత్యధిక వాటా కలిగిన దేశాలపై ఈ విపత్తులు అత్యంత తీవ్రమైన ప్రభావాన్ని చూపే అవకాశం ఉందని వెల్లడైంది.