Aadhaar update: మరోసారి ఆధార్ అప్‌డేట్ గడువు పెంపు.. డేటా ధ్రువీకరణకు అప్పటివరకే ఛాన్స్!

myAadhar: దేశంలో ప్రజలకు అందించే ప్రతి సేవనూ డిజిటలైజ్ చేసేందుకు కేంద్రం తీవ్రంగా ప్రయత్నిస్తోంది. ఇందులో భాగంగా అన్ని సర్వీసులకు ఆధార్ కార్డును తప్పనిసరి చేసింది. పేదవారికి సైతం ఇది భారం కాకూడదని భావించి ఉచితంగా ఆధార్ కార్డ్ అప్‌డేట్ చేసుకునేందుకు అవకాశం కల్పించింది.

ఆధార్ కార్డుతో అనుసంధానించబడిన పత్రాలను ఉచితంగా అప్‌డేట్ చేసుకునేందుకు కేంద్రం కొంతం సమయం ఇచ్చింది. అదికాస్తా నేటితో ముగియనుంది. కాగా తాగాజా ఈ గడువును మరోసారి పొడిగిస్తూ.. ఆధార్ కార్డు జారీ చేసే సంస్థ యూనిక్ ఐడెంటిఫికేషన్ అథారిటీ ఆఫ్ ఇండియా (UIDAI) నిర్ణయం తీసుకుంది.

'14.12.2023 వరకు ఉచితంగా 'myAadhar' పోర్టల్‌లో ఆధార్ పత్రాలు నవీకరించడానికి అనుమతించాం. మరింత ఎక్కువ మంది ఈ సేవను వినియోగించుకునేందుకు ప్రోత్సహించాలని భావిస్తున్నాం. ప్రజల నుంచి వచ్చిన రిక్వెస్ట్ లను పరిగణలోకి తీసుకుని, మరో 3 నెలల పాటు గడువును పొడిగించాలని నిర్ణయించాం' అని UIDAI తన ఆఫీస్ మెమోరాండంలో పేర్కొంది.

'myAadhar' పోర్టల్‌లో మాత్రమే ఈ ఉచిత సర్వీసు అందించబడుతోందని గమనించాల్సి ఉంటుంది. అయితే స్థానిక ఆధార్ సెంటర్లలో ఈ సేవలు పొందాలంటే మాత్రం 50 చొప్పున వెచ్చించాల్సిందే. 10 ఏళ్ల క్రితం మంజూరు చేయబడి, అనంతరం అప్‌డేట్ చేయని ఆధార్ ఖాతాలను తిరిగి ధ్రువీకరించడానికి గుర్తింపు మరియు చిరునామా రుజువులను సమర్పించాల్సి ఉంటుంది.