Kotak Mahindra Bank: ఒక్క రోజులోనే రూ.10225 కోట్లు నష్టపోయిన ఉదయ్ కోటక్..

కోటక్ మహీంద్రా బ్యాంక్ వ్యవస్థాపకుడు, నాన్ ఎగ్జిక్యూటివ్ డైరెక్టర్ ఉదయ్ కోటక్ ఒక్క రోజులో భారీ నష్టపోయారు. కోటక్ మహీంద్రా బ్యాంకుపై రిజర్వ్ బ్యాంక్ ఆఫ్ ఇండియా ఆంక్షాలు విధించింది. ఆన్ లైన్ ఖాతాలు ఓపెన్ చేయకూడదని అలాగే కొత్త క్రెడిట్ కార్డులను ఇష్యు చేయకూడదని స్పష్టం చేసింది. దీంతో కోటక్ మహీంద్రా బ్యాంక్ స్టాక్ గురువారం భారీగా పతనమైంది. దాదాపు 11 శాత వరకు పడిపోయింది. దీంతో ఉదయ్ కోటక్ తన ఆస్తిలో 1.3 బిలియన్లు కోల్పోయారు.

అంటే మన భారత కరెన్సీ ప్రకారం ఉదయ్ రూ.10225 కోట్లు నష్టపోయాడు. ఉదయ్ కోటక్ కు కోటక్ మహీంద్రా బ్యాంక్‌లో 25.71 శాతం వాటా ఉన్న సంగతి తెలిసిందే. ఈ బ్యాంక్ స్టాక్ గురువారం దాదాపు 10.85 శాతం పతనంతో రూ.1643 వద్ద ముగిసింది. ఏప్రిల్ 24, 2024న కోటక్ మహీంద్రా బ్యాంక్ మార్కెట్ క్యాప్ రూ.3,66,383 కోట్లుగా ఉంది. ఇది గురువారం నాటికి రూ.326,615 కోట్లకు తగ్గింది. అంటే ఒక్క సెషన్‌లో మార్కెట్ క్యాప్ రూ.39,768 కోట్లు క్షీణించింది.

ఈ స్టాక్ పతనం కారణంగా ఉదయ్ కోటక్ షేర్ హోల్డింగ్ మార్కెట్ విలువ రూ.10225 కోట్లు తగ్గింది. కోటక్ మహీంద్రా బ్యాంక్ స్టాక్ పతనం కారణంగా బ్యాంక్ వాటాదారులైన మ్యూచువల్ ఫండ్స్ మరియు బీమా కంపెనీలు కూడా నష్టపోయాయి. ఎల్ఐసీ దాదాపు రూ.2570 కోట్ల నష్టాన్ని చవిచూసింది. ఆర్బీఐ చర్యలతో పలు బ్రోకరేజ్ లు కోటక్ మహీంద్రా బ్యాంక్ టార్గెట్ ప్రైస్ ను సవరించాయి. శుక్రవారం కూడా కోటక్ మహీంద్రా బ్యాంక్ స్టాక్ దాదాపు 1 శాతం పడిపోయింది.

అయితే త్వరలో కోటక్ మహీంద్రా బ్యాంకులో ఆర్బీఐ అడిట్ నిర్వహించే అవకాశం. కోటక్ మహీంద్రా బ్యాంక్ తన తప్పులను సవరించుకుంటే ఆంక్షాలు ఎత్తివేసే అవకాశం ఉంది. దీంతో అప్పటి వరకు స్టాక్ పై ఎలాంటి అంచనాకు రాలేమని నిపుణులు చెబుతున్నారు.