Airbnb: అతిథుల దెబ్బకి ఇంటి ఓనర్‌ ఫ్యూజులు అవుట్.. ఎయిర్‌ బీఎన్బీ లిస్టింగ్‌లో వింత రూల్..

Electricity: ఖాళీగా ఉన్న ఇళ్లను ఓయో, ఎయిర్ బీఎన్బీ వంటి సంస్థలకు లీజుకి ఇచ్చి చాలామంది హోటల్స్ గా చెలామణీ చేస్తున్నారు. ఇలా చేస్తూ భారీ మొత్తంలో ఆర్జించేవారు కూడా ఉన్నారు. నిబంధనలకు విరుద్ధంగా జనావాసాల మధ్య ఉన్న గృహాలను ఇలా వినియోగించడంపై ఇటీవల ఆందోళనలు నెలకొన్నాయి. వీటి సంగతి పక్కన పెడితే డబ్బు కోసం ఊరు,పేరు తెలియని వారికి స్టే ఇచ్చేవాళ్లు జాగ్రత్త ఉండాలని అమెరికాలో జరిగిన ఈ ఘటన హెచ్చరిస్తోంది.

సాధారణంగా ఎక్కడైనా పని ఉంటే ఆ చుట్టుపక్కల ఉండే హోటళ్లలో దిగి అదికాస్తా పూర్తయ్యే వరకు స్టే చేస్తుంటారు. ఈ సమయంలో ఎక్కువగా బయట తిరుగుతూ, గదిలో చాలా తక్కువ సమయం మాత్రమే గడుపుతారు. దీనికిగాను సదరు హోటల్ యాజమాన్యానికి కరెంట్ బిల్లు నామమాత్రంగానే వస్తుంటుంది. అయితే ఎయిర్ బీఎన్బీలో లిస్ట్ కాబడిన నార్త్ కరోలినాలోని హోటల్ ఓనర్ కు వింత అనుభవం ఎదురైంది. అతిథులు ఇచ్చిన షాక్‌ కి దిమ్మ తిరిగి బొమ్మ కనిపించింంది.

యాష్లీ క్లాస్ అనే మహిళకు సంబంధించిన ఇంటిలో ఇద్దరు వ్యక్తులు అతిథులుగా దిగారు. మూడు వారాలపాటు అక్కడే స్టే చేశారు. వారు ఖాళీ చేసిన అనంతరం వచ్చిన కరెంటు బిల్లు చూసి ఒక్కసారిగా ఆమెకు గుండె ఆగినంత పనైంది. ఏకంగా 1.25 లక్షల మేర విద్యుత్ వినియోగించినట్లు బిల్ వచ్చింది. ఇలా ఎలా జరిగిందో అర్థంకాక దాని ఓనర్ తల పట్టుకుంది. సర్వేలైన్స్ ఫుటేజ్ చెక్ చేయగా అసలు విషయం తెలిసింది. అక్కడ స్టే చేసిన ఇద్దరు అతిథులు క్రిప్టో కరెన్సీ మైనింగ్ కు పాల్పడ్డారు. ఇందుకుగాను భారీ ఎలక్ట్రిసిటీ అవసరం కావడంతో లక్షల్లో బిల్లు వచ్చింది.

ఇది తెలుసుకున్న యాష్లీ.. బిల్లు చెల్లించాల్సిందిగా ఆ అతిథులను కోరింది. అందుకు వారు మొదట నిరాకరించడంతో ఆధారాలతో సహా ఎయిర్ బీఎన్బీని ఆశ్రయించింది. ఎట్టకేలకు విద్యుత్ బిల్లు చెల్లింపునకు వారు అంగీకరించారు. తత్వం బోధపడటంతో ఎయిర్‌ బీఎన్బీ లిస్టింగ్‌లో 'నో క్రిప్టో మైనింగ్' అని ట్యాగ్ చేసింది. ఈ మొత్తం తతంగాన్ని ఆమె టిక్ టాక్ లో షేర్ చేయడంతో వైరల్‌గా మారింది.