twitter: వామ్మో! ట్విట్టర్ గోల్డ్ చెక్‌ కోసం అంత చెల్లించాలా..?

twitter: ట్విట్టర్ అధినేత ఎలాన్ మస్క్.. పరిచయం అక్కర్లేని పేరు. ఆయన ఏమి చేసినా ఓ సంచలనమే. అంతగా సోషల్ మీడియాను షేక్ చేస్తూ ఉంటారు. ట్విట్టర్‌ ను కొనుగోలు చేసిన తర్వాత నుంచీ పలు కీలక నిర్ణయాలు తీసుకుంటూనే ఉన్నారు. ఖర్చులను తగ్గించుకుంటూ, ఆదాయాన్ని పెంచడానికి నానా తంటాలు పడుతున్నారు. ఈ కోవలోనే బ్లూ టిక్ ను ప్రవేశపెట్టారు. తాజాగా గోల్డ్ చెక్ గురించిన సమాచారం నెట్టింట చక్కర్లు కొడుతోంది.

నెలకు వెయ్యి డాలర్లు:

వెరిఫైడ్ గోల్డ్ చెక్ మార్కు కోసం కంపెనీల నుంచి నెలకు వెయ్యి డాలర్లు(భారతీయ కరెన్సీలో దాదాపు 80 వేల రూపాయలు)ను ట్విట్టర్ వసూలు చేయనున్నట్లు వార్తలు హల్ చల్ చేస్తున్నాయి. ఈ మేరకు కొన్ని అంతర్గత మెయిల్స్ నడుస్తున్నట్లు తెలుస్తోంది. సోషల్ మీడియా కన్సల్టెంట్ ట్విట్టర్‌లో షేర్ చేసిన ఒక ఇమెయిల్‌లో.. 'వెరిఫైడ్ ఫర్ ఆర్గనైజేషన్స్' ప్లాన్‌ కోసం 1000 డాలర్లు వసూలు చేయనున్నట్లు పేర్కొన్నారు. నెలవారీ అదనంగా మరో 50 డాలర్లు రుసుముతో అదనపు అనుబంధ హ్యాండిల్స్ ను అందించనున్నట్లు అందులో తెలిపారు.

స్పందన కోసం వెయిటింగ్:

ఈ వార్తలపై ట్విట్టర్ లేదా దాని CEO ఎలాన్ మస్క్ కానీ ఇంకా స్పందించలేదు. 2022లో 44 బిలియన్ డాలర్లకు ట్విట్టర్ ను స్వాధీనం చేసుకున్న నాటి నుంచి పలు ఆదాయ మార్గాలను మస్క్ అన్వేషిస్తూనే ఉన్నారు. ట్విట్టర్ API యాక్సెస్, ధృవీకరించబడిన బ్లూ టిక్, యూడర్ ఎక్స్ పీరియన్స్ మానిటైజేషన్ వంటి వాటిని ప్రవేశపెట్టారు.

ఇప్పటికి కష్టాల్లోనే..

అయితే ఇప్పటికీ ట్విట్టర్ ప్రమాదకర స్థితిలోనే ఉందని మస్క్ స్వయంగా అంగీకరించారు. ట్విట్టర్ బ్రేక్ ఈవెన్ పాయింట్‌ కి చేరుతోందన్న వార్తలపై ఆయన స్పందించారు. అక్కడికి చేరుకోవడానికి ఇంకా కష్టపడాల్సి ఉందన్నారు. ఆర్థికంగా పూర్తి స్థాయిలో కోలుకోలేదు కానీ ట్రెండింగ్‌ లో ఉందని తెలిపారు. ట్విట్టర్ బ్లూకు సబ్‌ స్క్రైబ్ అయిన క్రియేటర్‌లతో యాడ్ ఆదాయాన్ని పంచుకుంటామని ఆయన చెప్పిన కొద్దిసేపటికే ఈ వార్త బయటకు రావడం విశేషం.