మరోసారి వేలానికి ట్విట్టర్ గుర్తులు.. గతంలో ట్విట్టర్ బర్డ్ ప్రత్యేక ఆకర్షణ ఇప్పుడేమో..

Twitter: ప్రపంచ కుబేరుడు ఎలాన్ మస్క్ ఏది చేసినా సంచలనమే. ట్విట్టర్ కొనుగోలు తర్వాత కంపెనీలో పలుమార్పులకు శ్రీకారం చుట్టారు. మొదటగా ఉద్యోగుల సంఖ్యను తగ్గిస్తూ, ఆదాయం పెంచడానికి ప్రయత్నించారు. ఇటీవల దాన్ని కాస్త X గా రీబ్రాండింగ్ చేశారు. ఇప్పుడు తన కంపెనీలోని పాత గుర్తులను సైతం చెరిపివేసే పనిలో ఉన్నారు.

ట్విట్టర్ బిల్డింగ్ కు సంబంధించిన పలు వస్తువులు, గుర్తులను వేలానికి సిద్ధంగా ఉంచారు. పదుల కొద్దీ డస్కులు, కుర్చీలు సహా ఇతర సామాగ్రి ఈ లిస్టులో ఉన్నాయి. గతంలో ట్విట్టర్లో వైరల్ గా మారిన 2 ఆయిల్ పెయింటింగ్స్ కూడా ఈ వేలంలో లిస్ట్ కాబడ్డాయి. 2014 అకాడమీ అవార్డ్స్ లో తీసిన ఎల్లెన్ డిజెనెరెస్ స్టార్-స్టడెడ్ సెల్ఫీ ఒకటి కాగా.. నవంబర్ 2012లో బరాక్ ఒబామా తిరిగి ఎన్నికైనప్పుడు పోస్ట్ మరొకటి.

ఇవి కాక గిటార్స్, డ్రం కిట్స్, ఆంప్లిఫైయర్స్, కంట్రోలర్ మరియు మిక్సర్ స్పీకర్స్ తో కూడిన డీజే బూత్ కూడా వేలానికి లిస్ట్ అయ్యాయి. సెప్టెంబర్ 12న వీటి కోసం బిడ్డింగ్ ప్రారంభం కానుండగా.. రెండు రోజుల తర్వాత ఈ తతంగం ముగుస్తుంది. ఈ ఏడాది ప్రారంభంలో కూడా తన సాన్ ఫ్రాన్సిస్కో హెడ్ క్వార్టర్స్ నుంచి ట్విట్టర్ పలు వస్తువులను వేలం వేసింది. ఐకానిక్ ట్విట్టర్ బర్డ్ బొమ్మ అత్యధికంగా లక్ష డాలర్లకు అమ్ముడైంది.