నేను గన్ పట్టుకుని రంగంలోకి దిగానంటే.. ఇరాన్‌కు ట్రంప్ తాజా వార్నింగ్ .. టెహ్రాన్ స్పందన ఏంటంటే..

వాషింగ్టన్ - టెహ్రాన్ మధ్య సాగుతున్న దౌత్య యుద్ధం ఇప్పుడు మునుపెన్నడూ లేని విధంగా అత్యంత ప్రమాదకర స్థాయికి చేరుకుంది. అమెరికా అధ్యక్షుడు డొనాల్డ్ ట్రంప్ తన సోషల్ మీడియా ప్లాట్‌ఫామ్ 'ట్రూత్ సోషల్'లో పోస్ట్ చేసిన ఒక చిత్రం ప్రపంచ దేశాలను ఉలిక్కిపడేలా చేసింది. ఆ చిత్రంలో ట్రంప్ మెషిన్ గన్ పట్టుకుని ఉండగా, వెనుక ఇరాన్ భూభాగం బాంబుల ధాటికి ధ్వంసమవుతున్నట్లు కనిపిస్తోంది. ఈ శక్తివంతమైన దృశ్యం ద్వారా.. ఇరాన్ త్వరగా బుద్ధి తెచ్చుకోకపోతే పరిణామాలు తీవ్రంగా ఉంటాయని ఆయన పరోక్షంగా హెచ్చరించారు. అణ్వాయుధ రహిత ఒప్పందంపై సంతకం చేయడం ఇరాన్‌కు చేతకావడం లేదని, వారు సరిగ్గా వ్యవహరించలేకపోతున్నారని ట్రంప్ నిప్పులు చెరిగారు.

ఈ హెచ్చరికకు కొన్ని గంటల ముందే.. ఇరాన్ ఆర్థికంగా, రాజకీయంగా 'పతనం అంచున' ఉందని ట్రంప్ బాంబు పేల్చారు. ఇరాన్ నాయకత్వం తీవ్ర సంక్షోభంలో ఉందని, తమ దేశ పరిస్థితిని చక్కదిద్దుకునే వరకు ప్రపంచ చమురు నాడి అయిన హార్ముజ్ జలసంధిని తెరవాలని వారు అమెరికాను కోరుతున్నట్లు Trump పేర్కొన్నారు. ఇది ఇరాన్ నిస్సహాయతను ప్రపంచానికి చాటిచెప్పే ప్రయత్నంగా కనిపిస్తోంది. అయితే, రెండు నెలలుగా సాగుతున్న ఈ రక్తపాతాన్ని ముగించేందుకు ఇరాన్ పంపిన తాజా ప్రతిపాదనలు వాషింగ్టన్‌ను ఏమాత్రం సంతృప్తి పరచలేదు. దీంతో శాంతి చర్చలు సఫలమవుతాయన్న ఆశలు ఆవిరైపోయాయి. అమెరికా ఇరాన్ ప్రతిపాదనలను తీవ్రంగా వ్యతిరేకిస్తోంది.

అసలు ఈ ఉద్రిక్తతలకు బీజం పాకిస్థాన్ వేదికగా జరిగిన చర్చల్లో పడింది. ఏప్రిల్ 11, 12 తేదీల్లో ఇరు దేశాల ప్రతినిధులు ముఖాముఖి భేటీ అయినప్పటికీ, ఫిబ్రవరిలో మొదలైన యుద్ధానికి ముగింపు పలకడంలో ఏకాభిప్రాయం కుదరలేదు. గత వారం ఇరాన్ విదేశాంగ మంత్రి అబ్బాస్ అరాఘ్చీ ఇస్లామాబాద్ సందర్శించినప్పుడు చర్చలు మళ్ళీ మొదలవుతాయని భావించారు. కానీ అమెరికా బృందం అక్కడికి చేరుకునేలోపే ఆయన నిష్క్రమించడం పెద్ద దౌత్యపరమైన వైఫల్యంగా మారింది. ఈ పరిణామంతో ఆగ్రహించిన ట్రంప్, తన సన్నిహితులు జారెడ్ కుష్నర్, స్టీవ్ విట్కాఫ్‌ల పర్యటనను రద్దు చేసి, ఇకపై ముఖాముఖి చర్చలు ఉండవని, అన్నీ ఫోన్ ద్వారానే జరుగుతాయని తెగేసి చెప్పారు.

Also Read

ఇరాన్ యుద్దంపై ట్రంప్‌కు అన్నీ అబద్దాలు చెబుతున్నారు.. అమెరికా డేంజర్ జోన్‌లోకి వెళ్లిందంటున్న జేడీ వాన్స్..

ఇరు దేశాల మధ్య ప్రతిష్టంభనకు ప్రధాన కారణం 'నావికా దిగ్బంధనం'. అమెరికా తన నౌకాదళాన్ని ఉపసంహరించుకుంటేనే చర్చలకు వస్తామని ఇరాన్ పట్టుబడుతోంది. అటు ఇరాన్ చమురు మార్గాలను మూసివేయడంతో, దానికి ప్రతిస్పందనగా అమెరికా గత 20 ఏళ్లలో ఎన్నడూ లేని విధంగా మూడు భారీ విమాన వాహక నౌకలను మధ్యప్రాచ్యంలో మోహరించింది. ఈ సైనిక బల ప్రదర్శన, ఇటు ఇరాన్ అణు కార్యక్రమం, ఇజ్రాయెల్ దాడుల నేపథ్యంలో మధ్యప్రాచ్యం ఒక అగ్నిపర్వతంలా మారింది. ఇరాన్ తన పంథా మార్చుకోకపోతే, ఈ దౌత్య యుద్ధం కాస్తా పూర్తిస్థాయి సైనిక సంఘర్షణగా మారే ప్రమాదం పొంచి ఉంది. ఇంధన సరఫరా నిలిచిపోయి ప్రపంచవ్యాప్తంగా ద్రవ్యోల్బణం పెరిగే ముప్పు ఉన్నందున, ప్రపంచ దేశాలన్నీ ఇప్పుడు ట్రంప్ తదుపరి అడుగు వైపు ఆశగా, ఆందోళనగా చూస్తున్నాయి.