Trump warning: ఇరాన్‌కు ట్రంప్ మాస్ వార్నింగ్! చర్చలకు రాకపోతే.. మ్యాప్ నుంచి ఇరాన్ అవుట్?

ప్రపంచ దేశాల మధ్య ఉద్రిక్తతలు తారాస్థాయికి చేరుకున్న వేళ, అమెరికా అధ్యక్షుడు డొనాల్డ్ ట్రంప్ (Donald Trump) ఇరాన్‌ కు మరో తీవ్రమైన హెచ్చరిక జారీ చేశారు. ఇరాన్ తన పద్ధతి మార్చుకోకపోతే, కేవలం మూడు రోజుల్లోనే ఆ దేశ చమురు పైప్‌లైన్లు లోపలి నుండి పేలిపోతాయని (explode from within) ఆయన పేర్కొన్నారు. ఫాక్స్ న్యూస్‌కు ఇచ్చిన ఇంటర్వ్యూలో ట్రంప్ చేసిన ఈ వ్యాఖ్యలు ఇప్పుడు అంతర్జాతీయంగా పెను సంచలనం సృష్టిస్తున్నాయి.

ఇది నా ఫైనల్ వార్నింగ్!

ఇరాన్ కు ట్రంప్ ఫైనల్ వార్నింగ్ ఇచ్చారు. ఆయన మాటల్లో చెప్పాలటే.. "నేను ఇరాన్‌కు ఒకటే చెబుతున్నాను.. లొంగిపోండి, లేదా చర్చలకు రండి. మీరు అణు బాంబులు తయారు చేయకూడదు, అది నా కండిషన్! మీరు నా మాట వినకపోతే, మీ చమురు వ్యవస్థ సర్వనాశనం అవుతుంది. ఒక్కసారి ఆ పైప్‌లైన్లు పేలితే, మీరు మళ్ళీ వాటిని ఎప్పటికీ నిర్మించలేరు. మీ కెపాసిటీలో 50 శాతం కూడా మిగలదు. ఇది చాలా దారుణంగా ఉండబోతోంది" అని ట్రంప్ హెచ్చరించారు.

ఆయిల్ పైప్‌లైన్లు ఎందుకు పేలుతాయి?

ట్రంప్ వాదన ప్రకారం.. అమెరికా నౌకాదళం విధించిన దిగ్బంధనం (Naval Blockade) కారణంగా ఇరాన్ తన చమురును విదేశాలకు పంపలేకపోతోంది. చమురు నిల్వ చేసే కంటైనర్లు, ఓడలు ఇప్పటికే నిండిపోయాయని, పైప్‌లైన్లలో చమురు ప్రవాహం ఆగిపోవడం వల్ల కలిగే యాంత్రిక ఒత్తిడి (mechanical stress) కారణంగా అవి భూమిలోనే పేలిపోయే ప్రమాదం ఉందని ఆయన హెచ్చరించారు. ఒకసారి ఇవి పేలిపోతే, తిరిగి నిర్మించినా పాత సామర్థ్యంలో 50 శాతం కూడా రాదని ట్రంప్ (Trump) జోస్యం చెప్పారు.

నిపుణులు ఏమంటున్నారు?

అయితే, ఎనర్జీ అనలిస్టులు , ఇంజనీర్లు ట్రంప్ వాదనతో విభేదిస్తున్నారు. పైప్‌లైన్లలో ఒత్తిడి పెరిగినప్పుడు పంపింగ్‌ను నిలిపివేయడానికి సెన్సార్లు, సేఫ్టీ వాల్వ్‌లు ఉంటాయని వారు చెబుతున్నారు. ఒకవేళ ఆయిల్ కదలకపోతే, ఉత్పత్తిని నిలిపివేస్తారు తప్ప పైప్‌లైన్లు పేలవు అనేది వారి వాదన. ఇరాన్ వద్ద కనీసం 2-3 నెలల పాటు చమురును నిల్వ చేసుకునే సామర్థ్యం ఉందని వారు గుర్తు చేస్తున్నారు.

యుద్ధం, చర్చల పరిస్థితి

ఫిబ్రవరి 28న ప్రారంభమైన అమెరికా-ఇజ్రాయెల్ దాడుల తర్వాత ఇరాన్‌తో యుద్ధ వాతావరణం నెలకొంది. అయితే, ఏప్రిల్ 7న కుదిరిన కాల్పుల విరమణ (Ceasefire) ప్రస్తుతం కొనసాగుతోంది.

• హోర్ముజ్ జలసంధి: ప్రపంచ చమురు రవాణాలో కీలకమైన హోర్ముజ్ జలసంధి వద్ద ఉద్రిక్తతలు కొనసాగుతున్నాయి.
• కొత్త ప్రతిపాదన: ఇరాన్ నుండి ఒక మెరుగైన ప్రతిపాదన వచ్చిందని, అయితే ఇరాన్ వద్ద అణు ఆయుధాలు ఉండకూడదనేది తన ప్రధాన కండిషన్ అని ట్రంప్ (Trump) స్పష్టం చేశారు.
• మధ్యవర్తిత్వం: పాకిస్థాన్, ఖతార్ , సౌదీ అరేబియా దేశాలు అమెరికా-ఇరాన్ మధ్య చర్చల కోసం ప్రయత్నిస్తున్నాయి.

ప్రస్తుతానికి కాల్పుల విరమణ అమల్లో ఉండటం ఊరట కలిగించే విషయమే అయినా, ట్రంప్ (Trump) ఇచ్చిన ఈ 'త్రీ డేస్' వార్నింగ్ తర్వాత గల్ఫ్ రీజియన్‌లో ఏం జరగబోతుందోనన్న ఆందోళన ప్రపంచ దేశాల్లో నెలకొంది.