ఇరాన్ యుద్ధంపై ట్రంప్ సంచలన ప్రకటన.. చారిత్రాత్మక ఒప్పందంపై ఏమన్నారంటే..

పశ్చిమ ఆసియాలో నెలకొన్న యుద్ధ వాతావరణం 5వ వారానికి చేరుకుంది. ఇరాన్‌పై అమెరికా-ఇజ్రాయెల్ జరిపిన దాడుల ఫలితంగా అక్కడ 'పాలన మార్పు' (Regime Change) సాధ్యమైందని అమెరికా అధ్యక్షుడు డొనాల్డ్ Trump సంచలన ప్రకటన చేశారు. ఆదివారం విలేకరులతో మాట్లాడుతూ.. ఇరాన్ పాత నాయకత్వం స్థానంలో ఇప్పుడు అత్యంత హేతుబద్ధంగా వ్యవహరించే కొత్త సమూహం వచ్చిందని, దీనివల్ల త్వరలోనే టెహ్రాన్‌తో ఒక చారిత్రాత్మక ఒప్పందం కుదిరే అవకాశం ఉందని ధీమా వ్యక్తం చేశారు. అయితే, ఈ దౌత్యపరమైన ప్రకటనల వెనుక యుద్ధ తీవ్రత భయంకరంగానే కొనసాగుతోంది.

గత నెల రోజులుగా సాగుతున్న ఈ యుద్ధంలో ఇరాన్ విద్యుత్ కేంద్రాలే లక్ష్యంగా దాడులు జరగడంతో.. టెహ్రాన్, దాని పరిసర ప్రాంతాలు పూర్తిగా చీకటిలో మునిగిపోయాయి. దీనికి ప్రతీకారంగా ఇరాన్ తన పొరుగు దేశాలైన కువైట్, సౌదీ అరేబియాపై క్షిపణి దాడులకు దిగింది. కువైట్‌లోని ఒక విద్యుత్ కేంద్రంపై జరిగిన దాడిలో ఒక భారతీయ కార్మికుడు మరణించడం విషాదకరం.

అటు సౌదీ అరేబియా తమపైకి వచ్చిన ఐదు బాలిస్టిక్ క్షిపణులను అడ్డుకున్నట్లు ప్రకటించింది. మరోవైపు, దక్షిణ లెబనాన్‌లో హిజ్బుల్లాపై ఇజ్రాయెల్ దాడులు కొనసాగిస్తుండగా, ఐక్యరాజ్యసమితి శాంతి పరిరక్షక దళం (UNIFIL) స్థావరంపై జరిగిన దాడిలో ఒక సైనికుడు మరణించడం అంతర్జాతీయంగా ఆందోళన కలిగిస్తోంది.

ఇరాన్ మా షరతులకు ఒప్పుకుంది..అణ్వాయుధాలు విడిచిపెడుతోంది..ట్రంప్ సంచలన ప్రకటన..

ఈ ఉద్రిక్తతల నడుమ ఇరాన్ పార్లమెంట్ స్పీకర్ మొహమ్మద్ బఘేర్ ఘాలిబాఫ్ అమెరికాపై తీవ్ర విమర్శలు చేశారు. వాషింగ్టన్ ఒకవైపు శాంతి చర్చలంటూ మాయమాటలు చెబుతూనే, మరోవైపు రహస్యంగా భూతల దాడులకు ప్రణాళికలు రచిస్తోందని ఆయన ఆరోపించారు. అమెరికా సైనికులు ఇరాన్ భూభాగంలోకి అడుగుపెడితే వారిని దహనం చేయడానికి తమ సైన్యం సిద్ధంగా ఉందని హెచ్చరించారు.

ఈ యుద్ధం కారణంగా సామాన్య ప్రజల జీవితాలు అతలాకుతలమయ్యాయి. ఎడతెరిపిలేని బాంబు దాడులతో టెహ్రాన్ నగరం మొత్తం కంపిస్తోందని, ప్రజలు నిద్రలేని రాత్రులు గడుపుతున్నారని అక్కడి స్థానికులు ఆవేదన వ్యక్తం చేస్తున్నారు.

ఆర్థిక పరంగా ఈ యుద్ధం ప్రపంచానికి పెద్ద ముప్పుగా పరిణమించింది. ప్రపంచ చమురు వాణిజ్యంలో కీలకమైన హోర్ముజ్ జలసంధిని ఇరాన్ మూసివేయడంతో ఇంధన మార్కెట్లు సంక్షోభంలో పడ్డాయి. దీని ప్రభావంతో అంతర్జాతీయ మార్కెట్‌లో చమురు ధరలు ఆకాశాన్ని తాకాయి. బ్రెంట్ చమురు ధర బ్యారెల్‌కు 115 డాలర్లకు పైగా పెరగగా, వెస్ట్ టెక్సాస్ ఇంటర్మీడియట్ 100 డాలర్ల మార్కును దాటింది. ఇజ్రాయెల్ సైతం తన రక్షణ బడ్జెట్‌ను 45 బిలియన్ డాలర్లకు పెంచుతూ యుద్ధం దీర్ఘకాలం కొనసాగేలా సంకేతాలిచ్చింది.

ప్రస్తుత సంక్షోభాన్ని పరిష్కరించేందుకు పాకిస్తాన్ మధ్యవర్తిగా చొరవ చూపుతోంది. ఇస్లామాబాద్‌లో సౌదీ, టర్కీ, ఈజిప్ట్ దేశాల విదేశాంగ మంత్రులతో చర్చలు జరిపిన పాకిస్తాన్, యుద్ధాన్ని ముగించేందుకు 15 సూత్రాల ప్రణాళికను ప్రతిపాదించింది. అమెరికా మరియు ఇరాన్ రెండు దేశాలూ పాకిస్తాన్‌పై విశ్వాసం వ్యక్తం చేయడం కొంత సానుకూల అంశం. అయితే, ఒకవైపు చర్చలు జరుగుతున్నా, అమెరికా తన 'యూఎస్ఎస్ ట్రిపోలి' వంటి భారీ యుద్ధ నౌకలను మధ్యప్రాచ్యానికి పంపడం చూస్తుంటే, దౌత్యం విఫలమైతే భూతల దాడులకు కూడా వెనకాడబోమని ట్రంప్ ప్రభుత్వం హెచ్చరిస్తున్నట్లు కనిపిస్తోంది.