అమెరికా రాజకీయాల నుంచి టెక్ రంగం వరకూ… ట్రంప్ సృష్టిస్తున్న తుఫాన్

డొనాల్డ్ ట్రంప్ ఈసారి కొత్తగా ఆయన బాణం అమెరికా టెక్ రంగం దిగ్గజం ఇంటెల్ CEOపై వేశారు. జాతీయ భద్రత పేరుతో ఇంటెల్ CEO వెంటనే రాజీనామా చేయాలని ట్రంప్ బహిరంగంగా చెప్పడంతో, స్టాక్ మార్కెట్‌లో గందరగోళం మొదలైంది.

ఆగస్టు 7న ట్రంప్ తన సోషల్ మీడియా ట్రూత్ సోషియల్లో, 'ఇంటెల్ CEO వెంటనే రాజీనామా చేయాలి, ఇంకో మార్గం లేదు' అని పోస్ట్ చేశారు. ఈ మాటలు నేరుగా CEO లిప్-బూ టాన్‌కే ఉద్దేశించినవి. ట్రంప్ ఈ వ్యాఖ్య చేసిన కొద్ది గంటల్లోనే ఇంటెల్ షేర్లు 3%-3.5% వరకు పడిపోయాయి. ఇన్వెస్టర్లలో అనుమానాలు, ఆందోళనలు పెరిగాయి.

ట్రంప్ ఆరోపణల ప్రకారం, లిప్-బూ టాన్ చైనాలోని కొన్ని టెక్నాలజీ కంపెనీల్లో పెట్టుబడులు పెట్టారు. వాటిలో కొన్ని చైనా సైన్యానికి కూడా సంబంధం ఉన్నాయని ఆయన చెబుతున్నారు.
ఇంటెల్ అమెరికా జాతీయ భద్రతకు కీలకమైన చిప్ తయారీ కంపెనీ కావడంతో, ఇలాంటి పెట్టుబడులు కాన్ఫ్లిక్ట్ ఆఫ్ ఇంటరెస్ట్ కు దారితీస్తాయని ట్రంప్ వాదన. లిప్-బూ టాన్ వ్యక్తిగతంగా, తన వెంచర్ ఫండ్ల ద్వారా దాదాపు 200 మిలియన్ డాలర్ల పెట్టుబడులు చైనా తయారీ, చిప్ కంపెనీల్లో పెట్టారు. వీటిలో కొన్ని చైనా సైన్యానికి సరఫరా చేసే కంపెనీలూ ఉన్నాయి.

ఇంటెల్ మాత్రం తమ CEOకి పూర్తి మద్దతు ఇచ్చింది. 'మేము అమెరికా జాతీయ భద్రత, ఆర్థిక ప్రయోజనాలకు కట్టుబడి ఉన్నాం. లిప్-బూ టాన్ ఈ బాధ్యతను బాగా నిర్వహిస్తున్నారు' అని కంపెనీ తెలిపింది. ఒక ప్రైవేట్ కంపెనీ CEOపై ఇలా నేరుగా ఒత్తిడి తేవడం చాలా అరుదు. ఇంతకుముందు 2009లో, బరాక్ ఒబామా సమయంలో జనరల్ మోటార్స్ CEOను రాజీనామా చేయమని కోరిన సంఘటన జరిగింది.

ఈ వివాదం మరింత ముదిరింది. రిపబ్లికన్ సెనేటర్ టామ్ కాటన్, లిప్-బూ టాన్ పెట్టుబడులు మరియు ఆయన మాజీ కంపెనీ క్యాడెన్స్ డిజైన్‌పై ఉన్న క్రిమినల్ కేసు గురించి ఇంటెల్ బోర్డును ప్రశ్నించారు. టాన్ క్యాడెన్స్ సీఈఓగా ఉన్నప్పుడు, ఆ కంపెనీ చైనా సైనిక విశ్వవిద్యాలయానికి చిప్ డిజైన్ అమ్మినట్లు ఆరోపణలు ఉన్నాయి. ఈ కేసులో క్యాడెన్స్ తప్పు ఒప్పుకుని, అమెరికా కోర్టులో $140 మిలియన్ జరిమానా చెల్లించేందుకు అంగీకరించింది.

ఇటీవలి కాలంలో, తైవాన్కు చెందిన TSMC వంటి కంపెనీలు తయారీ రంగంలో ముందడుగు వేస్తున్నాయి. నెవిడియా వంటి కొత్త కంపెనీలు డేటా సెంటర్ మరియు పర్సనల్ కంప్యూటర్ మార్కెట్లో ముందుకువచ్చాయి. దీనివల్ల ఇంటెల్ లాభాలు తగ్గిపోయాయి.

2024లో ఇంటెల్ మార్కెట్ విలువ 60% తగ్గిపోయింది, 2025లో షేరు ధరలు కూడా స్థిరంగా ఉన్నాయి. గత సంవత్సరం, సంస్థ సీఈఓ ప్యాట్ గెల్సింగర్ను బోర్డు తొలగించింది. లిప్-బు టాన్ కొత్తగా సీఈఓగా నియమితులయ్యాక, ఖర్చులు తగ్గించేందుకు ఉద్యోగులను తగ్గించారు, విదేశాల్లో కొత్త ప్లాంట్లను వాయిదా వేశారు, ఓహైయోలో నిర్మించాల్సిన ప్లాంట్ కూడా ఆలస్యమవుతోంది.

లిప్-బూ టాన్ ఇంటెల్ CEOగా కొనసాగుతారా లేక రాజీనామా చేస్తారా అన్నది బోర్డు నిర్ణయంపై ఆధారపడి ఉంది. కానీ ట్రంప్ జోక్యం, రాజకీయ ఉద్రిక్తతల వల్ల కంపెనీపై ఒత్తిడి పెరుగుతోంది. జాతీయ భద్రత, తైవాన్-చైనా-అమెరికా మధ్య పెరిగిన ఉద్రిక్తతల కారణంగా ఈ విషయం మరింత ముఖ్యమైంది. ఇప్పుడు ఇంటెల్ మళ్లీ స్థిరత్వం సాధించడం పెద్ద సవాలుగా మారింది. ఇది అమెరికా టెక్ రంగానికీ, ప్రపంచ టెక్ మార్కెట్కీ ఎంత ప్రభావం చూపుతుందో చూడాలి.