ఇరాన్ యుద్ధంపై ట్రంప్ సంచలన ప్రకటన.. ముడి చమురు ధరలు కుప్పకూలబోతున్నాయంటూ..

Trump's Iran War Claim: అమెరికా - ఇరాన్ మధ్య గత ఏడు నెలలుగా కొనసాగుతున్న యుద్ధం అతి త్వరలోనే ముగుస్తుందని, యుద్ధం ముగియగానే అంతర్జాతీయ మార్కెట్‌లో చమురు ధరలు తీవ్రంగా కుప్పకూలుతాయని అమెరికా అధ్యక్షుడు డోనాల్డ్ ట్రంప్ ధీమా వ్యక్తం చేశారు. శాన్ ఆంటోనియోలో జరగనున్న రిపబ్లికన్ ప్రచార ర్యాలీకి వాషింగ్టన్ నుండి బయలుదేరుతున్న సమయంలో ఆయన విలేకరులతో మాట్లాడారు.

ఇరాన్ యొక్క అణు సామర్థ్యాలను, అణ్వాయుధ సంపత్తిని అమెరికా బలగాలు పూర్తిగా ధ్వంసం చేశాయని.. ప్రస్తుతం ఆ దేశం తీవ్రంగా నష్టపోయిందని ఆయన పేర్కొన్నారు. ఒకవేళ ఇరాన్ వద్ద అణ్వాయుధాలు ఉండి ఉంటే ప్రపంచం మునుపెన్నడూ చూడని నష్టాన్ని ఎదుర్కొని ఉండేదని వ్యాఖ్యానించారు.

ఇదిలా ఉండగా యుద్ధ ఒత్తిడి కారణంగా ఇరాన్ చమురు మంత్రి రాజీనామా చేశారని ట్రంప్ చేసిన వ్యాఖ్యలను ఇరాన్ తీవ్రంగా ఖండించింది. ఇరాన్ ప్రభుత్వ అధికార ప్రతినిధి ఫాతిమా మొహజెరానీ స్పందిస్తూ, ట్రంప్ తన వైఫల్యాలను కప్పిపుచ్చుకోవడానికే ఇలాంటి అసత్య ప్రచారాలు చేస్తున్నారని విమర్శించారు.

చమురు మంత్రి రాజీనామా అనేది బలహీనతకు సంకేతం కాదని.. అది తమ దేశ రాజకీయ వ్యవస్థలోని సుస్థిరతకు నిదర్శనమని స్పష్టం చేశారు. అయితే ఇరాన్ చమురు మంత్రి తనతో మాట్లాడుతూ తమ దేశంలో ఆర్థిక వ్యవస్థ, చమురు ఉత్పత్తి పూర్తిగా పడిపోయాయని చెప్పినట్లు ట్రంప్ గతంలో పేర్కొనడం గమనార్హం.

Also Read

ఇరాన్ యుద్ధం ముగింపుపై ట్రంప్ కీలక వ్యాఖ్యలు.. అమెరికా ఓటర్లకు సంచలన లేఖ రాసిన IRGC

మరొకవైపు ఇరాన్ తన జాతీయ భద్రత, ప్రయోజనాలను కాపాడుకోవడానికి దౌత్య మార్గాలను ఉపయోగించుకోవాలని భావిస్తున్నట్లు ఆ దేశ విదేశాంగ మంత్రి అబ్బాస్ అరాఘ్చి తెలిపారు. ఐక్యరాజ్యసమితి జనరల్ అసెంబ్లీ పర్యటనలో భాగంగా, వ్యూహాత్మకంగా అత్యంత కీలకమైన హోర్ముజ్ జలసంధిని తిరిగి తెరవడానికి, యుద్ధాన్ని నిలిపివేయడానికి ఏడు రోజుల శాంతి ప్రణాళికను ఇరాన్ ప్రతినిధి బృందం అమెరికాకు సమర్పించింది. అయితే ఈ ప్రతిపాదనను ట్రంప్ తోసిపుచ్చినప్పటికీ.. అణ్వాయుధ సుసంపన్నత సామర్థ్యాన్ని ఇరాన్ గణనీయంగా తగ్గించుకుంటేనే శాంతి ఒప్పందానికి అంగీకరిస్తామని అమెరికా ఉపాధ్యక్షుడు జేడీ వాన్స్ స్పష్టం చేశారు.

కేవలం మాటల హామీలకు అమెరికా లొంగదని.. ఇరాన్ తన 60 శాతం సుసంపన్నమైన ఇంధనాన్ని వదులుకోవాలని జేడీ వాన్స్ రాయిటర్స్ ఇంటర్వ్యూలో పట్టుబట్టారు. టెహ్రాన్‌లో అంతిమ నిర్ణయాధికారం ఎవరి చేతిలో ఉందో అమెరికాకు స్పష్టత లేదని వాన్స్ వ్యాఖ్యానించగా.. అమెరికా అధికారుల పరస్పర విరుద్ధ వైఖరి, గందరగోళ సందేశాలే అసలు సమస్యని ఇరాన్ విదేశాంగ శాఖ ప్రతినిధి ఇస్మాయిల్ బఘాయీ తిప్పికొట్టారు.

నవంబర్ మధ్యంతర ఎన్నికల ముందు పెరుగుతున్న ఇంధన ధరలు ట్రంప్ యంత్రాంగానికి రాజకీయంగా సున్నితమైన అంశంగా మారినప్పటికీ.. అమెరికా బలగాలకు ఆయుధాల కొరత లేదని, హోర్ముజ్ జలసంధి గుండా ఇంధన రవాణాను అడ్డుకోవడంలో ఇరాన్ దళాలు అసమర్థంగా ఉన్నాయని వాన్స్ వివరించారు.