హెచ్-1బి, గ్రీన్ కార్డ్, స్టూడెంట్ వీసా నిబంధనలు కఠినతరం.. లబోదిబోమంటున్న అమెరికాలోని భారతీయులు..

డొనాల్డ్ ట్రంప్ ప్రభుత్వం అమెరికా వలస నిబంధనలలో ప్రతిపాదిస్తున్న నూతన మార్పులు అక్కడ స్థిరపడిన, చదువుకుంటున్న భారతీయ నిపుణులు, విద్యార్థులపై తీవ్ర ప్రభావం చూపేలా ఉన్నాయి. యూఎస్ హోంల్యాండ్ సెక్యూరిటీ (DHS), కార్మిక (DOL), విదేశాంగ (DOS) విభాగాలు విడుదల చేసిన తాజా నియంత్రణ ఎజెండాల ప్రకారం, హెచ్-1బి వీసాలు, గ్రీన్ కార్డ్ ప్రక్రియ, అంతర్జాతీయ విద్యార్థుల వీసా కాలపరిమితి, వర్క్ పర్మిట్ (EAD) పొడిగింపుల వంటి కీలక రంగాలలో పెద్ద మార్పులు రానున్నాయి. ఈ ప్రతిపాదనలు అధికారిక ప్రక్రియల ద్వారా వెళ్లాల్సి ఉన్నప్పటికీ, ప్రభుత్వ ఉద్దేశాన్ని ఇవి స్పష్టంగా సూచిస్తున్నాయి.

భారతీయ ఐటీ నిపుణులకు అత్యంత కీలకమైన హెచ్-1బి (H-1B) వీసా నిబంధనలను మరింత కఠినతరం చేయాలని ప్రభుత్వం భావిస్తోంది. వార్షిక 85 వేల వీసాల పరిమితి నుండి విశ్వవిద్యాలయాలు, పరిశోధనా సంస్థలకు ఉన్న కొన్ని మినహాయింపులను కఠినతరం చేయడంతో పాటు, భారతీయ కంపెనీలు ఎక్కువగా ఉపయోగించే థర్డ్-పార్టీ క్లయింట్ సైట్‌లలో ఉద్యోగులను నియమించే విధానంపై అదనపు ఆంక్షలు విధించనున్నారు.

యజమాని-ఉద్యోగి సంబంధాన్ని నిరూపించడం, విస్తృత డాక్యుమెంటేషన్ వంటివి ఇందులో భాగం కానున్నాయి. దీనికి తోడు 50 కంటే ఎక్కువ మంది ఉద్యోగులు ఉండి, వారిలో సగానికి పైగా H-1B లేదా L-1 వీసాదారులు ఉన్న పెద్ద కంపెనీలకు, పాత ఉద్యోగుల నివాస పొడిగింపుల (Extensions) సమయంలో కూడా కొత్తగా బయోమెట్రిక్, అదనపు రుసుములను వర్తింపజేయనున్నారు. అలాగే, ప్రవేశ స్థాయి కనీస వేతనాల పరిమితిని 17వ పర్సంటైల్ నుండి 34వ పర్సంటైల్ కు పెంచే DOL ప్రతిపాదన వల్ల యజమానులకు స్పాన్సర్‌షిప్ ఖర్చులు భారీగా పెరగనున్నాయి.

Also Read

దుబాయ్ వెళ్లే భారతీయులకు అలర్ట్.. యూఏఈ వీసా నిబంధనల్లో కీలక మార్పులు..కొత్త ఎంట్రీ రూల్స్‌ ఇవే..

మరోవైపు ఉద్యోగ ఆధారిత గ్రీన్ కార్డుల కోసం అవసరమైన PERM లేబర్ సర్టిఫికేషన్ ప్రక్రియను కూడా నవీకరించనున్నారు. అమెరికా కార్మిక మార్కెట్‌ను పరీక్షించే ప్రమాణాలను మార్చడం, విదేశీ కార్మికులకు స్పాన్సర్ చేసే ముందు స్థానిక అమెరికన్ కార్మికుల తొలగింపులను నియంత్రించే నిబంధనలను కఠినతరం చేయడం వంటి మార్పులు జూలైలోనే ప్రతిపాదించబడవచ్చు. దీనివల్ల గ్రీన్ కార్డ్ దరఖాస్తు ప్రక్రియ మరింత సంక్లిష్టంగా మారే అవకాశం ఉంది.

అంతర్జాతీయ విద్యార్థుల విషయంలో.. ముఖ్యంగా అమెరికాలోని మొత్తం విద్యార్థులలో 31 శాతం (దాదాపు 3.6 లక్షల మంది) ఉన్న భారతీయులకు ఈ నిబంధనలు పెద్ద సవాలుగా మారనున్నాయి. ఇప్పటివరకు ఉన్న 'డ్యూరేషన్ ఆఫ్ స్టేటస్' (కోర్సు పూర్తయ్యే వరకు ఉండే అనుమతి) పద్ధతిని రద్దు చేసి.. గరిష్టంగా నాలుగేళ్ల నిర్దిష్ట కాలపరిమితిని మాత్రమే విధించనున్నారు. ఆ తర్వాత వారు అమెరికాలో ఉండాలంటే ఇమ్మిగ్రేషన్ అధికారుల వద్ద పొడిగింపు కోసం దరఖాస్తు చేసుకోవాలి. అలాగే, ఫిబ్రవరి 2027 నాటికి ఐచ్ఛిక ఆచరణాత్మక శిక్షణ (OPT), మరియు పాఠ్య ప్రణాళిక ఆచరణాత్మక శిక్షణ (CPT) కార్యక్రమాలలో, ముఖ్యంగా STEM విద్యార్థుల రెండు సంవత్సరాల పొడిగింపులపై ఆంక్షలు విధించేలా సవరణలు చేయనున్నారు.

చివరగా ఉపాధి అధికార పత్రాల (EAD) 540-రోజుల స్వయంచాలక (ఆటోమేటిక్) పొడిగింపును రద్దు చేసే తుది నిబంధన ఈ నెలలోనే రానుంది. ఈ నిర్ణయం వల్ల గ్రీన్ కార్డ్ ప్రక్రియలో ఉన్న H-1B వీసాదారుల జీవిత భాగస్వాములు (H-4 వీసా హోల్డర్లు), ముఖ్యంగా దాదాపు లక్ష మంది భారతీయ మహిళలు ఉద్యోగాలు కోల్పోయే ప్రమాదంలో పడ్డారు. కొత్త నిబంధన ప్రకారం, పాత పర్మిట్ గడువు ముగిసిన తర్వాత నిరూపితమైన కొత్త కార్డు వచ్చే వరకు వారు పని చేయడానికి వీల్లేదు. H-4 EAD పునరుద్ధరణకు 180 రోజుల ముందే దరఖాస్తు చేసుకునే అవకాశం ఉన్నప్పటికీ, USCIS ప్రాసెసింగ్ సమయం అంతకంటే ఎక్కువగా ఉండటం వల్ల ఉద్యోగాల మధ్య తప్పనిసరి విరామం (గ్యాప్) ఏర్పడి తీవ్ర ఇబ్బందులు ఎదురవుతాయి.